RENUNGAN – 24 JANUARI 2026
January 25th 2026
Tema: I Kristus Ii Ninavau Do Pomogunan
Pambasaan nopo ngaavi do tadau dibaino nga iso kapamahaavan do tokou do miiso id kotumbazaan. Popoiho do tokou do poingkuo i ninavau do mamabang di totuvong. Poingkuo i Jesus do minomohoou do tuhun toomod do tumanud Disido om poingkuo do apatut do misompuu tokou doid kotumbazaan om pogiigizon.
Sundung tuu do ogumu i kobohingkangan, ii au pilotian do otoguvang do tokou nga doiho tomoimo i Kinoingan do popotunud do tuhun ngaavi Dau. Doiho Isido do monitiu do tuhun ngaavi. Zo tokou nga ingkaa nogi, saasau tokou do koduumak do totuvong, atagakan tokou do kahansanan nga sabaagi tanak do Kinoingan doiho Isido do manaak do kahansanan, monuu do tokou do humansan poimponu doid Disido. Doiho Isido do monitiu di koposizon do tokou.
Pambasaan koiso pinopoiho do poingkuo i tuhun ngaavi do Zebulun om Naphtali do minogiigizon doid totuvong tu nokuasa izioho do tuhun ngaavi tangalaat. Minogiigizon izioho doid koosi om aiso kataanangan nga doiho i Kinoingan do minonitiu di kopooposizon dioho i nakapanaak dioho do kahansanan.
I pambasaan koduvo sinuu tokou di Sangti Paul do mogiunung unung om miiso doid di Jesus. Iso kopoingatan do tokou do timpu baino i ogumu kozo o pogimbaazatan. Zo tokou nopo nga i Kristus o sanganu om aiso no do suvai.
I pambasaan di Abal Tavasi tuminimpuun i Jesus do minogovit di Abal Tavasi kuminaa di mokikiia Dau kumoiso nogi i Simon i pungaanan do i Peter om i tobpinai dau i Andrew, i James om i John. Au Isido minomihi do tuhun. Saviavi nga hoovon Disido. Zinadaan dioho o saviavi i kivaa dioho om tanud no di Jesus. Poimponu o kahansanan dioho doid di Jesus.
Kanou no mogiunung unung om sumimba di pamahaavan di Kinoingan miampai poinsodia do monompuan doid oonu noopo i ponuuan do tokou.
Amen.
Kat. Andrew Sipajan
