Koubasanan do potitikid minggu kotohu do vuhan, misovohi o Faado do sumivat tumakad doid Zon Terian(Terian om Timpayasa) om Zon Buayan (Buayan om Tiku), do tumombuhui di ongotumbazaan ngaavi. Kotombuhuzan diti izanan do moi hangad di ongotumbazaan ngaavi, om manaandak Misa Tobitua miampai dioho. Potitikid minggu, kivaa Litugi do Boos ii buu’anon do Katigis doiho nga aiso kosombutan. Iho no sabap do sumivat o Faado do tumakad tumombuhui miampai manaandak Misa moi do kasambut izioho.
Tohu tadau pinoobi do kotombuhuzan diti tumimpuun mantad doungosuvab tadau minggu hobi kuang jam 10.00, patakadan doid Kg. Terian miampai manaandak do Misa Tobitua id Chapel St. Bernard, om mundoong sonsodop do doiho. Kosuvabon tadau Koiso opongo po minum doungosuvab, jam 9.00, pakaazan nodii doid Kg. Tiku miampai manaandak Misa Tobitua id Chapel Tina do Kinoingan i tumimpuun hobi kuang jam 11.00 doungosuvab(mozo vinasi do lahan). Opongo po Misa Tobitua om pizungan makan doungadau, tuutulus nodii do pakaazan doid Kg. Buayan miampai mundoong sonsodop do doiho. Kosuvabon tadau Koduvo, jam 9.00, lamazon Misa Tobitua id St. Patrick Buayan om opongo po makan doungosuvab, poundukan nodii do id Kg. Timpayasa miampai manaandak Misa Tobitua id Chapel St Julius I. Opongo pizunguan makan doungadau, poundukan nodii do muhi.
Nga saasabap no do toluo Covid 19 om panagahan humabus mamanau tuminimpuun di vuhan Kotohu, do iti no kotohu vuhan do au notombuhui o kampung ngaavi diti om tantu no do sopihaahangad dati, tu ka di Rector Rev Fr. Rector Wilfred Atin, “hangadon zou dioho” ka.
Kumaa di ongotumbazaan ngaavi id kampung Timpayasa, Terian, Tiku om Buayan, kounsikou no tu piondom-ondom kou di Fr. Wilfred om Fr. Gilbert id sambayang dioho om otombuhui kou i vagu do toduuk tadau.
SocCom Paroki Penampang