MINGGU KO-DUVO NGOOPOD OM APAT TIMPU TOOMOD TOUN B
Kopongokunan dotokou do Kotumbazaan id di Kristus sabaagi Messiah mogovit dotokou do umagko do Salip dotokou tikid tadau sabaagi lahan totopot doid koposizon.
Nga’ isai di ii Jesus kumaa toiso-iso dotokou? Popointahang o Gospel do pinosumpakan do Kotumbazaan dotokou sabaagi koponoimaan dotokou di Jesus Kristus, Tanak do Kinoingan poimpasi, Tuhan dotokou om Mononobus, miampai poposoto do tohu ula do tutumanud di Jesus: Mamazada dau-sondii, Manaan do salip dau, Tumanud di Jesus.
Nokito di Jesus o ula ngaavi’ do koposizon Dau’-sondii om koponompuanan nopogoohungungan id di hozou ngaavi’ di suupu touhi’ do Kinoingan: Kinadaan, Kinapatazon om Kinotungagan – id kosimbaan do kointahangan kotumbazaan di Peter id di Jesus sabaagi Messiah do Kinoingan om Mononobus.
Minamaamasi ii Jesus do id kobongimozoan om kopoimaganan om hizab do Kinoingan. Id hozou kapaazaan, magahap dotokou do maahing om humansan doid di Tuhan montok tutuhung id tanga do ponginaman ngaavi’ doid pomogunan diti. Id Kinoingan no do kokito tokou do kahapasan mantad kosusaan om kagaanan mantad koundasaan ngaavi’. Poingaton tokou di St. James do koundasaan nopo nga’ okon noopo ko ii toimoon nga’ inggaanan nogi dotokou, om kotumbazaan id di Jesus no monokodung dotokou do monginggaan do koundasaan ngaavi’ do suvai’ dotokou maza do kalaja ngaavi’ koginavaan, kobinsianan om kopohiongan – duuduvo corporal om spiritual. Ka di Jesus, “Isai nopo kumaandak mikot doid Dogo, mositi mamazada dau-sondii, manaan do salip dau om tumanud Dogo”.
Montok do Koposizon dotokou, duminadi ii Jesus do ii Poimpasi miampai dotokou, Katapatan montok dotokou, guminavo dotokou, popohiong dotokou, monokodung dotokou, popoohon do koposizon om kokiikitanai dotokou om popotuidong do piombohutan miampai tiso-om-tiso. Umahom om sumuni o piombohutan diti do maso tokou mokinongou doid di Jesus maza do kapambasaan om momusoou-mahik do Buuk Tobitua, monongkiboos doid di Jesus tikid tadau, sambayang ngaavi’ sondii om paganakan, papataak do koposizon dotokou doid di Jesus doid altari id Misa Tobitua, mibabas miampai di Jesus, mokianu kopohiongan montok douso tikid sodop om id di Sacrament do kopohiongan. Touvi’ nopo nga’ papaazou om monongkotohuod do Kinoingan id saviavi’ kaantakan doid koposizon dotokou tu’ koginavaan nopo do Kinoingan nga’ mamalan potitikid kaantakan do koposizon dotokou.
Sinuat di,
Kat. Jimmy Totu