RENUNGAN MINGGUAN – 17 Oktober 2021

KOPOMOOGIZAN:
MINGGU KO-DUVO NGOOPOD OM SIZAM MINGGU TOOMOD TOUN  B
Isaiah 53:10-11;   Hebrew 4:14-16;   Mark 10:35-45

Pambasaan ngaavi’ minggu baino nopo nga’ iso kapamahaavan di Jesus dotokou iisontob kumaandak doid nindamaan totopot do kaakun do monompuan do Kinoingan om sungkad-tukad, om do papataak potuu do koposizon dioho’ id koponompuanan.

Ii koundasaan talaat kozo ii noimaan doid di Jesus mantad po dii kinapamagakaman Disido gisom doid kinapatazon doid Salip Tobitua do tinoimo Disido montok dotokou saviavi’ om tosoosonguhun tuhun mooi do kapadan tokou maagi do kopolintaan do Kinoingan.

Maza di Jesus okonko’ ahantoi dotokou ii koposizon toomod id tana diti nga’ ii koposizon selajul id kopolintaan Kinoingan, “Maza do koponogitan do Zaa’ di Kristus, au’ nodii soosoovon po di Tama’ Poinsurga’ dotokou o douso ngaavi’ dotokou”(Is 43:25). Somoonu muot tokou, “Nookuo tu au’ osimba di Jesus o sambayang ngaavi’ dotokou. Nung sumambayang tokou om au’ i’ mongoi doid panambazangan; sumambayang tokou nga’ au’ mangakun do douso ngaavi’ dotokou; au’ monoimo do Louti Poimpasi id sakramentum Oikaristia Tobitua; Komozon: koposizon nopo dotokou nga’ okonko’ id koingkookoto do grasia om aiso’ nogi do koposizon di Kristus id dotokou;  Koiho tokou do au’ i’ mokinongou o Kinoingan di momimidouso ngaavi’ nga’ mokinongou Isido doid songuhun ii sumamba om mimozo di hizab Dau’.

Kosudong i dii do tumaak miampai koinsibaan ginavo doid hizab tobitua do Tuhan Kinoingan id kosuupuvanan om kogongimozoan. Naaha di Jesus o pomogunan om pinoinsavat Isido id dumbangan di Tama’ Poinsurga’, nadadi do padri takavas do manampung montok dotokou. Maahing tokou doid Disido montok do grasia tobitua om kobinsianan Dau’ do magaha do komungkangan ngaavi’ do tuhun.

Noongou dotokou ii John om ii James mokianu do kapantangan miikau id avananan om ogibangan do tiikoon-laja Poinsurga’ di Jesus, nga’ pinoiho Disido izioho’ do mositi no dumadi tudipon do saviavi’; Ii Jesus sondii minikot okonko’ mokitompuan nga’ do monompuan, om pinapataak do koposizon Dau’ sabaagi pambalai montok ginumuan tuhun.

Okonko’ minonuat o Kinoingan do kootulan ngaavi montok toiso-iso kaantakan, nga’ noonuan tokou do ginavo om pinosuat Disido ii undang undang ngaavi’ doid ginavo ngaavi dotokou. Noonuan tokou nogi Disido do kotumbazaan om atag mooi do kaanu tokou mamaamasi maza dii, om mamajamin do ogiot o kotumbazaan dotokou. Nung pokodoon dotokou o ginavo ngaavi’ dotokou, au’ tokou kaanu mangakun do kotumbazaan dotokou, au’ tokou koongou di spiritu di Kristus momobuung di undang undang ngaavi’ do Kinoingan id suang dotokou, aiso’ lati do atag dotokou.

Havanon tokou di Kristus do mugad moguhu do kalaja do songuhun om monompuan do sompi-tuhun miampai-aiso’ kahansanan do kountungan toi tohuod, miampai-aiso’   koponongkotohuodan toi kaazaan. Iti no poogi, do koponompuanan totopot nopo do Kristian nga’ oimaan maa-mantad no do koginavaan miampai-aiso’ kohobizanan sondii, mooi do kotihombus ii kalaja di Kristus do mogovit do ninavau om kahansanan, sokodung om kopomohingasan doid koposizon ngaavi’ do suvai’.   

Pomogunan nopo dotokou nga’ noponu do tuhun houson okonko’ momogusa do koponompuanan nga’ koingkookoto toi kapamantangan, au’ potuu kapadan izioho’ dii; lumonggivit izioho’ doid kuasa do pangkat, miaga koi poinghohobi guno dioho’; kivaa nogi tuhun ii kopiuman do aiso’-nuununu sabap natagakan izioho do lahan doid nindamaan om momoguno izioho’ soginumu tuhun do sumambayang montok dioho’ toi sokuukuang no do monginsasamod dioho’. Iti nopo nga’ do momosik do pomogunan, ii natagakan do topiipiuman toi kopodulianan  doid suvai’, do pinahaod di Jesus ii ohou kopnompuanan do Kinoingan.

Minggu ponogi do ‘Mission’ toi koponompuanan, id nombo ii Jesus Kristus, ii minogovit do Abal Tavasi, insan po popoingat dotokou di kosohimbaan abal talaat doid pomogunan id nombo o kavakasanmaza do kopinimaan kotos toi pinuavangan om kopogovitan ginumuan tuhun doid kalamazan kololoizan miaga ko’ isoo-i’. Poposoou dotokou do monompuan tokou i do Kinoingan om tinimungan tuhun mogiigizon soosongian noopo tokou monoina do kalaja tikid tadau miampai kohubukan om kotuhidan om do monokodung do tuhun suvai’. Ii Jesus minaganu do gaa do tanak do tuhun, ii kivaa kogompitan do kuasa om ngaan tavasi’, om pinaamung dii miampai gaa suupu minundoso. “Ii tanak do tuhun nopo nga’ okonko’ minikot do mokitompuan nga’ do monompuan”

Monongkotohuod tokou di poogi doid saviavi’ nimaan di Jesus montok dotokou, pinapataak do koposizon Dau’ do minanampasi dotokou, pinopoinsavat dotokou, minamadadi dotokou do tanak ngaavi’ nogompi do Kinoingan ponoko-tumungkus ngaavi’ do koposizon selajul.

Mantad: Tobpinai Mascentius James Jimmy.