RENUNGAN MINGGUAN – 30 Januari 2022
TADAU-MINGGU’ KA-APAT ID TIMPU’ TOOMOD TOUN C
Jeremiah 1:4-5, 17-19.
Corinth 12:31 – 13:13.
Luke 4:21-30
Tadau baino’ mamalamai tokou do Minggu Ka-apat id Timpu Toomod toun C. Tumanud diho tema’ do minggu diti’ ii nuhuvan do ‘I Iklizia sabaagi do profeta do Kinoingan’. Muot di tokou sondii’, isai dii’ i Iklizia om profeta ngaavi’? Kaanu tokou momusoou om mamalati’ maza diho nazatan boos’ id tema’. Avasi’ o kinoikoto’ dotokou tu’ nohoou do Kinoingan do dumadi do profeta ngaavi’ Dau’ do papakaa’ dii Boos ngaavi’ Disido doid munung dotokou om papaabal dii doid pomogunan.
Montok pomusaavan toi reflection, ‘Ingkuo kopomoguzu dogo’ iti boos do Kinoingan, onu vaza dii’ do monuidong doid dogo? Om ingkuo zou dumadi do sasi om profeta do id pomogunan id di pamaamasi ku’ do tadau tadau.
Zotokou’ ii ongotumbazaan om nongopodsu’ no’uug id kopooposizon Kristian Katulik, maza kotompuanan di Abal Tavasi nodaa’ i kaanu popoizon’ id dotokou’ di boos do Kinoingan mooi’ kaanu tokou dii’ popouvat om monuhung do vokon ngaavi’ dotokou, momosik dioho’ do ingkuo o Kinoingan kumalaja ngaavi’ id di sambayang ngaavi’ dotokou. Pikiikito nogi daa tokou o pomogunan maza dii mato ngaavi’ do kotumbazaan’ mooi do kopiuman tokou tomoimo di kotindapaan di Kinoingan Tobitua kozo om koginavaan dotokou.
Baino’ pambasaan ngaavi’ poposoou om manaak vagu dotokou do poombitanan toi tukadan. Miaga pambasaan koiso, ‘Ingkuo o Kinoingan minomohou om minamadadi di Jeremiah do profeta. Sundung okuang’ o toihaan nga’ sinakadai do Kinoingan isido miampai minomogonop do toihaan maza ditia boos, ‘Poguhui i’ do notoodo ku iziau doid pagaganakan di Ina Nu, noihaan Ku no iziau, poguhu i do nokohivan ko, nopihi ku no iziau. Dadi do baino, imang no tounda do pakalaja’, Ingkakat no om poihoon no izioho dii sontob ponuu’an Ku diau’. Poposoto o Kinoingan do kosodian om guno do kumalaja tuutulus papapanau di ponuu ngaavi’ Disido.
Om id pambasaan koduvo pinopoiho i Paul doid dii Kristian komuniti do Corinth, om zotokou nogi’ ii okito’ disido o koponompuanan om koponoimaan dii titaak ngaavi’ do Kinoingan nga, miaga aiso piuhudan’ okito o kopipihadan om kopiboogizan. Minanaak isido dotokou do lahan dii avaavasi po’ om otogui; ii Kotumbazaan, Kahansanan om Koginavaan. Tu’ nung aiso koginavaan, sundung naavi’ o kabaahan do moboboos miaga do tasab ngaavi, nga miampai ma’ do aiso i’ do koginavaan, nga’ miaga no’ dii tagung do motung-hotung toi’ ii tababang do maang-gaang. Komozon, au’ i kopogovit ii’ do nuununu kovosian doid Kinoingan. Ii no, do ivangon tokou o ginavo kumaa di Jesus om pakavasaon ii koginavaan Disido do momohidang dotokou mooi do id kopiisaan tokou miampai Disido tomoimo.
Abal Tavasi, popoiho do tinoimo dioho i Jesus om nongoimazaan do nokoongou dii boos ngaavi’ tangavasi minikot doid munung Disido, ii koponuhukan do pinogoohungungan di profeta Isaiah om pinopotopot ngaavi dii. Nga’ Iti nobo’ ii tanak di Joseph dii, kon i’? ka dioho do minogiboboos miaga do au’ songkuo navanangan tu’ tanak i’ dii gia do tukang kazu om miduvo dii o pomusaavan dioho. Pokianu no’ zioho do tanda’ ponokodung di katapatan kalaja’ tongobitua do minangan Disido doid Capernaun. Biisaai no’ di Jesus izioho, poihoon ku iziozu totootopot, aiso i’ do profeta do otoimo do id pogun dau’ sondii. Om nangaasang izioho’ songian nokoongou boos di Jesus’ do ontok timpu di Profeta Elisha, do aiso tongoiso dii ginumu tuhun Johudi ginomuon’ do navasi nga’ i Naaman no, songuhun tuhun do Syria. Dadi kigiiginavo di daa izioho do papaatu Disido do doiho id ungib, nga sisip no Isido di ginumuan tuhun om pamanau no do minogidu.
Kaanu tokou mintong dii naantakan id di Jesus doid kakadazan kinoizonon sondii’ Disido do Nazareth nopo, nga’ iso susuzan, ii kapanaak dotokou do pomusaavan do kaantakan’ miaga diti nga’ kopogovit nogi dotokou, miaga di tuhun Johudi ngaavi’. Nga’ ogumu i’ o lahan do Kinoingan momohou dotokou. Aanangan toi poinsodia tokou i naku do mokinongou om sumimba do pamahaavan Disido diti, om monoomo dii tonggungan ngaavi’ doun Kinoingan. Iho no ngaavi’ o tavazaan toi challenge’ do otoguvang dotokou sabaagi profeta do Panambazangan… Amen
Pinosodia di: Clement Jinidu
St. Michael’s Parish Penampang
