RENUNGAN MINGGUAN – 27 March 2022
MINGGU KO-4 DO KOPONOGITAN TOUN C
Tobpinai kou ngaavi, nokosuang tokou no do minggu ko-4 do Koponogitan. Om minggu diti pungaanan nogi do Minggu Kounsikaan
(Laetare Sunday), poposoou dotokou do kounsikaan do Paskah.
Id Abal-tavasi di baino, minonusui i Jesus do tukadan kokomoi do kounsikaan songuhun tanak i minogiduan haid di ama dau, do minuhi
om nokotoimo do kopohiongan mantad di ama dau ii tobinginavo kozo. Sinusui nogi di Jesus i kounsikaan di tama tobinginavo tu nokoguhi i tanak kusai dau om tuutulus minanaak di tanak do kalamazan sabap no dii kounsiisikoo do ginavo dau.
Id Abal-tavasi ponogi diti, popokito do ula di tanak totuo ii opipihadan. Maza do tukadan diti papalati i Jesus do au tokou daa koomit do ula di tanak totuo i opipihadan om au kaanu popohiong di tobpinai dau, nga momit tokou daa dii tanak tomuhok ii tuminongob om suminimban. Tukadan diti popointahang nogi kozo do kogiiginovoo do Kinoingan, do i Kinoingan nopo nga Tama di Tobinginavo. Id tukadan diti, popoiho nogi do nung gumabas tokou mantad do Kinoingan tantu no do koinsodu tokou om kopomidouso tokou.
Tobpinai kou ngaavi, i kinapatazon di Jesus id salip minambalai di tutang do douso ngaavi dotokou om nadadi tokou do tuhun kavavagu. Iti no i komozon di Sangti Paul id pambasaan koduvo do, “Ponongkibabas no di Kinoingan,” ka. Monuu i Sangti Paul do
mamazada di kotuutuhuno haid dotokou miampai monongkibabas doid di Kinoingan. Monuu isido do mongimvagu do koposizon dotokou om dumadi do hahansanon montok di Kristus. Kanou no momit di tanak minogiduan haid di ama dau, miampai tumongob om mongidu do malu om kosumbungan do ginavo dotokou, om monongkibabas no di Kinoingan Tama maza di Jesus id timpu do koponogitan diti.
Sabaagi do Tama, humangad i Kinoingan do koguhian dotokou doid Disido. Kanou no mikot doid di Kinoingan Tama, miampai tumongob om sumugut di sambayang di tanak natagak haid, “Oi Ama’, nokopomidouso zou do huminavan do surga om guminaga Diau,” ka. Tu miaga di tuhun Israel id pambasaan koiso ii luminamai do ounsikou kozo songian nokoikot id tana do pinadandi do Kinoingan, zotokou nga kotoimo nogi kounsikaan do touvi tadau songian koikot di tana pinadandi di Kinoingan doid dotokou, i tana pungaanan do ‘Surga’.
L. Juit
