RENUNGAN MINGGUAN – 29 May 2022
KALAMAZAN-TAGAZO – II KINOINSAVATAN DI TUHAN TOUN C
Acts 1: 1-11 Hebrews 9: 24-28; 10: 19-23 Luke 24: 46-53
Tadau baino mamalamai tokou do Tadau Tagazo Kinoinsavatan di Kristus Jesus doid Surga’ ii ponokotanda do koguhian Disido doid di Ama Dau. Kinoinsavatan diti nogi ii papatapas do kahansanan do Kristian ngaavi’ do insan tadau mugad i mai’ id nombo i Kristus’ om mogiigizon miampai Disido do sogiigisom.
Om miampai Kinotungagan, iti no’ i kointahangan do kamanangan di Jesus nopongo’ Disido ii palan koponomposian’ do Kinoingan. Om tantu no’ do kounsikaan id surga om id tana sabap Tanak Tonsoisoon nokoguhi om poindikau id avananan di Ama Dau miampai kuasa poimponu Disido. Om songkuo vinasi’ giningo’ do poingamung om poin’agko tokou tomoimo’ diti kalamazan do Kinoinsavatan, kivaa do koluang tavasi dotokou, i Jesus’ i doiho id tampat di takavas kozo’ do surga, manampung montok dotokou, popobuung id di Ama Dau’ dii toinsanan gunoon ngaavi’ dotokou.
Pambasaa koiso monuusuzan mahik’ dii kaantakan ngaavi’ nimaan om pino’ia di Jesus mantad tinimpuunon, id di timpu touvi no’ om ii pinituubungan Disido’ songovian miampai dii mokiki’ia ngaavi’ Disido’ pinopoingat dioho do tumood id Jerusalem gisom otuhuk po’ ii dandi ngaavi’ di Ama Disido. Om monoimo kou mai’ di kuasa do ontok opodsu kou po’ di Spiritu Tobitua’ ii manakadai diozu tumihombus tumoboi om ouhi’. Om iziozu’ nodii mai’ o sasi’ Ku ngaavi’ do okon noopo ko id Jerusalem nga’ id pototongkop do Judaea om Samaria om totootopot do gisom dii pompod do tana.
Miaga dii mokiki’ia ngaavi’ zotokou nga’ mimozo nogi daa’ di Kristus om papasaga di Spiritu Tobitua do sumuang id ginavo ngaavi’ dotokou om mogukab do mato ngaavi’ do pomusaavan dotokou’ miaga ingkuo’ i Sangti Paul do suminambayang montok dotokou doid pambasaan koduvo. “Onuan konou daa di Kinoingan i Tuhan dotokou Jesus Kristus’ i Tama do kobontugan do Spiritu do kabaahan om kopomolotian do nunu’ ii tanda ngaavi’ koimbuhai mogovit dotokou mintutun poimponu’ kokomoi Disido, om iti nodaa’ ii sambayang om hizab dotokou doid koposizon do tadau-tadau. Magahap di Spiritu Tobitua do monguasa di toinsanan tuduvon om pinggisaman dotokou. Magahap Disido do mamabang dii titik tongoitom doid koposizon dotokou om do momuuan dotokou id tindahanon mooi do katanud tokou ngaavi’ Disido.
Id Abal Tavasi do tadau diti’ kaanu tokou momusoou toi reflect do Kinoinsavatan no’ ii kapataadaan toondos kozo toi’ joyful goodbye sabap’ minamadandi i Jesus do Spiritu Tobitua. Nung aiso’ do kinotongkizadan’ au’ kotuun i Spiritu. Nga’ nokoiho i Jesus do momoguno’ ii mokiki’ia ngaavi’ Disido do kotuhungan’ mooi kaanu do kahantazan miaga Disido. Ii no do, tinudukan Disido izioho do, ‘Tumimpoon id di kakadazan tagazo do Jerusalem gisom abasaanan po’ di kuasa mantad savat’ komozon’ sumondot i doid diozu i Spiritu Tobitua om id ngaan Disido’ po’iaon mai’ doid saviavi’ dii tinau o katangaban montok kopohiangan do douso’ tumimpuun mantad Jerusallem
Om maza dii kopongokunan do kotumbazaan dotokou id di sambayang do Kotumbazaan (Nikea-Constantinopel). “Mininsavat Isido doid Surga’ om pino’iikau do id avananan di Tama’. Mikot mai’ vagu Isido id Kobontugan do mombisala’ dii songimpasi om nangapatai om kopomolintaan Dau’ aiso mai’ kopupuson.”
Kanou no mintong’ sumolong id di Huguan dotokou nokotungag’ moguhu kumaa id kobontugan do pomolintaan di Ama Disido’ manaak dotokou di lahan kahansanan do insan tadau’ zotokou’ ii puu ngaavi’ di tinan om Panambazangan Disido nga’ minsavat nogi mai’ tumanud mogiigizon selajur’ id di pomolintaan di Tama’ dotokou, nung ouhi tokou no’ migit dii ponuu om dandi ngaavi’ do kinopodsuan dotokou. Amen.
Pinosodia di: Clement Jinidu|
Puu Kat. Paroki Penampang.
