RENUNGAN MINGGUAN – 12 Jun 2022

KOINTOHUVAN TOBITUA
Tukadan (Proverbs) 8:22-31;   Romans 5:1-5;   John 16:12-15

Minggu Kointohuvan nopo nga’ minggu koiso’ ahapas Pentecost, pantangon om lamazon o Kointohuvan Tobitua do insan sontoun, id nombo pambasaan ngaavi’ pointuddu doid di Tohu Persona do Kointohuvan Tobitua.

Sabap no do mistiri’ o Kointohuvan Tobitua, poingkuo dii iti do hobi kopogovit kovosian doid koposizon tosoosonguhun om tinmungan tuhun. Otopot Kointohuvan Tobitua nopo nga’ okonko’ susuzan toomod nga’ mistiri’, ii poinhosok mantad umulan om sinakagon ngaavi’ nga’ nokointahang maza di Kristus.

Sonsuat do buuk do Tukadan(Proverbs) – monokodung do ula di Jesus sabaagi Boos do Kinoingan – papatahang do koimbuhazan selajul do kabaahan do Kinoingan, id saviavi’ katapatan poguhu i kinopomongunan, ii okito om au’-okito. Minanagi do okonko’ vinangun nga’ minimbuhai miampai do Kinoingan; Minamung miampai Disido ontok vinangun o pomogunan om minonokodung Disido’. Minanaak kuasa om katapatan ii ohou do Kinoingan. Id Disido ii ohou’ do moboos om pakalaja miampai Disido’. Manaak dotokou iti do pomusaavan kokomoi di Spiritu Tobitua do Kinoingan pakalaja id Disido’ mantad id suang koinano disido. Ii boos pinosohimbou Disido – ii minamadadi saviavi’ do tonsi’ om minizon poingamung dotokou, ii Jesus Kristus.

Ii suat di St. Paul doid tuhun ngaavi’ Rome, pinotopot do Kinoingan o tuhun maza kotumbazaan id di Jesus Kristus om nogi Sacramen do Kopodsuan – “…Podsuo no  izioho’ do id Ngaan di Tama’ om di Tanak om di Spiritu Tobitua”, ka. Iti no ii palan koponomposizan di Tama’ poinsurga minomihi di Jesus sabaagi Mononobus dotokou. Vagu, popoiho dotokou ii St. Paul do, mamaagi i’ ii Kristian nokopibabas miampai kahansaan id koposizon di Jesus nokotungag. Saviavi’ titaak notoimo dotokou mantad Kinoingan – grasia, kotumbazaan, kahansanan, pibabasan, katapatan, nakataak doid dotokou maza di Kointohuvan Tobitua. Komozon: Ii grasia do Kinoingan maza do kuasa di Spiritu Tobitua id di Ngaan Tobitua kozo di Jesus do popointahang di Kinoingan, ii koginavaan Dau’ id dotokou, miampai dotokou om maza dotokou do kababang daa ii ninavau Dau’ doid pomogunan.

Id Gospel, popoimagon dii koimaan di Kointohuvan Tobituaid koposizon dotokou. Ii Tama’ om ii Tanak pinopougad di Spiritu Tobitua doid pomogunan sabaagi Spiritu do katapatan do momuu’an dotokou kumaa doid katapatan. Au’ minoboos ii Jesus do Dau-sondii, nga’ nunu ii noongou Dau’ mantad di Tama’, ingkaa nogi ii Spiritu Tobitua – au’ minoboos Dau-sondii nga’ moboos nunu ii noongou Dau’. Noongou tokou ii Jesus minoboos, ‘Ogumu podaa pobooson Ku nga’ oindamaan kou dati’.

Vagu, ‘Nunu noopo ii kivaa di Tama’ nga’ Dogo’, ka di Jesus; om momungaan nogi Dau’-sondii do ‘Tanak do Kinongan’, om moboos do persona kotohu sabaagi ‘Spiritu do katapatan’. Au’ tokou daa ohoilan sabap kokomoi i iti do Kinoingan saviavi’ kuasa, ii minonoodo do tavan om tana om aiso’ i kaanu moninduai kozo kokomoi do Kinoingan. Poingkuukuo po, mantad kointahangan di Jesus kokomoi do Kinoingan, om songkuo noopo inahom do tolotian dotokou kokomoi do Kointohuvan Tobitua, kakaal i’ mistiri’ ii’.

Au’ i tagal do ountingau tokou momusoou, ’Poingkuo o iso Kinoingan do tohu Persona’. Dati muot tokou vagu, ‘poingkuo i dii miaga do Kinoingan’. Nakabalajal tokou do mositi no do minsomok do Kinoingan om tumimpuun mamaamasi miambahut miampai Disido, sabap poingizon no o Kinoingan doid toiso-iso ii otumbazaan. Om ka di St. Paul, “ ii nopo koginavaan di Kinoingan nga’ nokotuntug no doid ginavo ngaavi’ dotokou di Spiritu Tobitua ii nakataak doid dotokou”.

Okito dotokou do baino, maza pamaamasi poinsomok doid di Kointohuvan Tobitua ii poingizon id suang dotokou, dati koiho tokou dii do poingkuo miaga do Kinoingan om do tumimpuun mamaamasi miaga do Kinoingan – miaga kozo do tohu dian poingikit nga’ iso no ninavau om ababang o saviavi’ ii mikot minsomok dii. Sabap Kinoingan, sabaagi Kointohuvan mamaamasi id koposizon do tinimungan tuhun, ingkaa tokou nogi momohizo do tiso-om-tiso om okonko’ monongkudaadau.

Poimbuhat kozo do ii-iso no o Kinoingan minimbuhai, om poimbuhat nogi do minintahang o Kinoingan sondii doid tinau-tuhun id susuzan sabaagi Kinoingan ii minamangun (Tama’), Kinoingan do Tanak (Boos nadadi do tonsi) om Kinoingan do Spiritu Tobitua. Aiso’ i kaanu mongia do tohu Kinoingan nga’ iso Kinoingan ii minintahang Dau’-sondii id tohu koinano ii nokoimagon do Abal Tavasi’- ii pungaanan do Minggu Tohu persona.

James Jimmy Totu
Paroki St. Michael Penampang.