RENUNGAN MINGGUAN – 19 Jun 2022
II TINAN OM ZAA TOBITUA KOZO DI KRISTUS (CORPUS CHRISTI)
Iti Kalamazan-tagazo do Tinan om Zaa Tobitua Kozo di Kristus i lamazon do Eklizia do tadau dati nopo nga poposoou dotokou di saviavi taak tangavasi do Kinoingan doid dotokou maza di Jesus Kristus id Sakramen Tobitua kozo. Ii nopo Tinan om Zaa di Kristus nga i taak tapagon hoogo aiso kabaga vinasi pinataak di Kristus doid dotokou. Popokito iti do songkuo kogiiginovoo do Kinoingan doid dotokou. Iho nodii poogi do onu ii lamazon dotokou do tadau diti nga ii kotindapaan di Kristus id Sakramen Tobitua kozo id Panambazangan Dau.
Saviavi pambasaan tadau diti mongomoi do iso no ahal – Tinan om Zaa ii pataakon do potohuodon doid dotokou.
Id pambasaan koiso, ponopoiho dotokou do i Abram minanaak baagi do opod piatus doid di Melchizedek(paderi tagazo) mantad konunu i kivaa id disido. Okon ko pinataak disido i om humansan do ohusian, nga pinataak disido i miampai ginavo di otohuod. Om binalakatan di Melchizedek isido, om minonongkotohuod di Kinoingan miampai pinopohubuk do louti om anggur id koobian Abram miaga kozo di aantakan id Misa.
Id pambasaan koduvo, pinopoiho i Sangti Paul do tuminaak Dau sondii i Kristus doid dotokou do popointahang di koginavaan Dau aiso gontob. “Iti no i tinan Ku, ii montok diozu; maai zu no iti sabaagi do kaandaman Dogo,” ka. Iho no poogi do ii Eklizia mangajal dotokou do iti nopo ponuu di Jesus do monugut mahik di koimaan om boos ngaavi Disido gisom do koikot vagu isido nga mooi do osoou dotokou onu ii nimaan ngaavi Disido. Om osugut ngaavi iti id kalamazan liturgi do montok kaandaman di Kristus. Om songian do suguton tokou iti, totootopot kozo do mangakan tokou di Tinan om monginum di Zaa Disido.
Id Abal-tavasi, minoboos i Jesus doid di mokiki’ia ngaavi Dau: “Onuai zu no sondii izioho do akanon tokuudi.” Tadau diti ponogi, i Kristus monuu dotokou do manaak tokuudi doid dovokon. Sabap, sundung potuu do nakaakan tokou no di Tinan om Zaa di Kristus, nga ogumu po tuhun i au po nakaakan do Tinan om zaa di Kristus. Iho nodii poogi do monuu dotokou o Eklizia do manakadai dioho do mikot mintutun di Kristus mooi do izioho nga kaakan nogi di Tinan om Zaa di Kristus. Om songian mogovit tokou dioho doid di Kristus, katanud izioho di pamakanan di Kristus ii papaakan dioho miampai di tinan om zaa Disido. Kanou no sakadazo izioho i omungkang, i houson do kobituahan om tutuuvan do tumanud diti Kalamazan-tagazo do Tinan om Zaa di Kristus. Sabap, onu i pataakon di Kristus doid dotokou nga totootopot do ii Tinan om Zaa Disido.
Id Ekaristi, mikot i Kristus doid dotokou. Pointindapou i Kristus miampai dotokou id Ekaristi Tobitua sabaagi do buu’an do Eklizia. Iho nodii poogi, iti kalamazan do tadau diti, manaak dotokou do kosivatan do mangazou om monongkotohuod di Kristus i pointindapou id Sakramen Tobitua kozo. Kanou no mangazou di Kristus miampai monugut di hozou, i hozoon ontok Timpu Kasambaan Tobitua kozo(Holy Hour): “Oi Sakramen Tobitua kozo, Oi Sakramen Poingkinoingan, Saviavi’ kazaan om koponongkotohuadan, adadi’ id potitikid timpu Nu.” Amen.
L. Juit
