RENUNGAN MINGGUAN – 10 Julai 2022

RENUNGAN MINGGUAN

Kopivosian om tabi pibabasan.

TADAU MINGGU’ KO-OPOD OM HIMO ID TIMPU’ TOOMOD TOUN C.
Ii Nuhuvan : ID SOMOK II BOOS DISIDO.

Id pambasaan koiso’ minoboos ii Moses di tuhun ngaavi’ do mimozo do ohou di Tuhan Kinoingan, tonudon ii ponuu ngaavi’ om kootulan ngaavi’ dau ii nongokosuat do id dii Buuk  Undang-undang, om koguhi kou mai’ doid di Tuhan Kinoingan diozu miampai do aavi’ o ginavo om nogi koduuduvo.

Iti undang-undang nopo ngaavi’ diti nga adampot, id somok kozo, id kabang om id ginavo ponoogi.

Nung soizukon om basaon tokou itia Opod Ponuu do Kinoingan, kumoiso om koduvo – do ii Kinoingan no ii sambaon dotokou om kada’ tokou samba do suvai ko i ki- Kinoingan no.  Ponuu kotohu om kaapat – ingkuo tokou do mamantang do ngaan’ di Kinoingan om migit do Tadau minggu tadau di Tuhan, i’ tadau tokou do sumambayang montok disido, maganu tokou do timpu ngaavi’ mongoi sambayang, zotokou om paganakan ngaavi’dotokou. Ponuu kohimo gisom koopod nopo nga’ kokomoi do Interpersonal in nature, koulalaho do tuhun (human), ingkuo tokou kumaa doid dovokon. Nung olotian, piumonon om atanud tokou ngaavi iti ponuu, pointantu nopo do iti pogigizon dotokou nga’ avasi, ouhud, tomoimo i balakat do Kinoingan om i Spiritu Tobitua dau maapahud miampai dotokou.

Miaga ditia Hozou Kapaazaan @ Psalm

Sisimba: Iumo’ no I Tuhan, iziozu ii tangasampit, om oposizan I’ o ginavo ngaavi’ diozu.

Kada’ tokou tood mogium di Tuhan, vookon nogi ditia tuhun songian nopo id’ Kasanangan nga’ kohiu di Tuhan Kinoingan. Songian kivaa’ koukatan, kosusaan id pogigizon om doiho nogi dii do mogium, mokituhung om mokiinsian. Nga’ kanou no tomoimo miampai Disido, dumadi do tutumanud di tohuduk, kumalaja id pongumaan Disido.

Id pambasaan Koduvo suat di Sangti Paul doid di Tuhun ngaavi do Colossi.

Pinopoiho do ii Kristus Jesus nopo nga’ ii Tinimpuunon om i Kopupuson. Alfa and the Omega.

Id Pambasaan di Abal Tavasi minggu diti.

Ii tabaa Undang-undang toi’ ahli Taurat, monginam, momuuvong toi mogium do hasa di Tuhan Jesus. Nga’ nosimba ngaavi’ di Tuhan Jesus ii pinonguatan.

Tu’ au nasantaban ginavo i’ tabaa undang-undang dii, minuot vagu di Tuhan Jesus do iisai’ dii o vokon ku ka?

Minanaak ii Tuhan Jesus do boovihan. Songuhun Padri@Imam om songuhun Livai. Ontok timpu do naantakan i songuhun nosusaan, sasabab minaan avangai, napanakaan om binobog vagu do magagaau. Songian kokito ditia Padri om tuhun Livai itia tuhun mogimpapatai no diti, onunu’ minaan dioho? tohiibai nopo dioho i tuhun nosusaan dii. (ontok nopo di guhu ii, iti nopo Padri om tuhun Livai nga’ ii komozon do tuhun tangavasi ngaavi izioho diti’, i pantangon do tuhun ginumuan) nga’ aiso do kosianan id ginavo dioho diti’, tinohiban dioho i’ tuhun maso mogimpapatai.

Nga’ poinsusuvai iti kogiginovoo ditia tuhun Samaria, (ontok nopo timpu’ di guhu ii, iti tuhun Johudi nopo nga’ au anangan, kababaazatan om gagut dioho iti tuhun ngaavi’ Samaria. Tuhun Samaria nopo kah dioho’ nga’ Kapil), sundung tu’ do kivaa nogi do nokopisasavo id piahatan diti’ Johudi om tuhun Samaria.

Mantad no do kivaa’ koginavaan, kosianan do vokon dau, tinuhung ditia tuhun Samaria i’ tuhun nosusaan gisom novit dau id hamin tundoongon om minaan usapo. Au’ minonutul onunu’ o agama, bangsa toi’  ko’ kotulunan.

Dadi’ zotokou tobpinai kou ngaavi, ingkuo zotokou do dau kumaa doid dovokon sokio’ nung koduumak tokou kaantakan miaga diti?

Nung aantakan iti, id tanga lahan, kaantakan’ accident kulita toi kulita nokopilumpak, onunu’ ii tokito dotokou, kivaa’ di atangkangau maganu gambal toi’ vedio, okon nopo ko’ iho,maan vagu viral posuangon id media sosial, mogiguugusa viral onunu’ ii naantakan, adadi’ miaga do reporter. Ii tuhun nosinduahan mantad kohigaganan maso’ mogimpapatai. Iti no koulalaho do tuhun baino diti, nga’ okon ko’ saviavi bogia kio. Tuhungon daa tokou iti’ nosusaan, au’ monutul isai izioho diti. Sokio’ do noindadamaan nosinduahan, sikapon tokou momohoou do Ambulance toi’ Bomba.

Nga kivaa nogi aantakan, kivaa mimpupula vagu’ do poinhuvi id tisan talun-alun, nga tuhun magagau i ma’. Piingat-ingat toi’ pisoosou nogi vagu, tumanud tokou do conscience toi’ nunu ka id suang do’ ginavo. Kivaa nogi aantakan songuhun poinduvi id tisan talun-alun, miaga ko noizazangan au’ kopiuman (noontok toluotunduundu dati?), songian oinsamakan, poingodop, noindamaan naavuk, au’ kopiuman, noindamaan aramai ti.  Soovon tokou, oindadamaan do moginum, gisom do au kopiuman dau sondii nga’ kahasa nogi, tu’ au tokou momohizo toi’ guminavo do tinan dotokou sondii. Miaga di Abal Tavasi’ pinosuat di Sangti Lukas 21:34. Mingat-ingat kou no, tu’ kahangas dati’ o ginavo diozu do id kozomutan om kopogovukan om i kotogipusan ngaavi’ do koposizon, om mikot mai’ o tadau dino’ doid diozu do au’ oingaangatan, miaga do tungkasip.

Id timpu miaga do baino diti tobpinai kou ngaavi, kozuuzuvo do vinoun, doiti’ doiho kivaa’ nopo do pigogutan, pisangadan aiso piangazan, aiso piuhudan pomusaavan sasabab no do kuasa ngaavi’ do pomogunan. Miaga kaantakan id pomogunan do Ukraine om Russia, om kivaa po’ id pogun suvai ponoogi. Onunu’ ii toponsol mangan toi’ lahan dotokou, nga’ sumambayang tokou nopo, montok piisaan id pogun dioho’ diti (oviton id sambayang) om oovit’ nogi sambayang pokinsianan diti id panambazangan dotokou (iso’ tanda do koginavaan kumaa’ doid dioho toi’ dovokon).

Miaga di Tuhan Jesus ii hobi po do gumininavo dotokou, au’ monutul isai’ tokou ngaavi’, ginovoon ngaavi’ Disido. Minikot Isido tuminaak dau sondii id pomogunan, minonobus do douso ngaavi’ dotokou, miampai minatai id kazu Salip. 

Kanou no mogisosokodung, mogigiiginavo, miiso id sambayang, mokinongou mimozo di Boos Abal Tavasi’ miaga di pinosuat di Sangti John 1: 1  Di timpuun i’ nopo nga’ i Boos: i Boos nopo nga’ miampai do Kinoingan om i Boos nopo nga’ Kinoingan. Amen.

George J. Maison