MINGGU KO-25 TIMPU TOOMOD TOUN C
Id minggu ko-25 timpu toomod diti, monuu dotokou o Eklizia do momusoou di koulaalaho dotokou kokomoi do usin, kotos, om hoohobi po kozo di ula dotokou kumaa doid di tangasampit om ii au poguugunoon. Iti aiso kaadanagan, dinoot om kapanatahan no ii tagazo no kozo do monoto di tangasampit om maso aantakan iti do baino.
Id Abal-tavasi di baino, posoovon tokou di Tuhan Jesus do usin om kotos ngaavi nopo nga au oovit do matai. Iho no sabap do pinapalati Isido dotokou do poingkuo momoguno diho mooi do au atagakan do koposizon. Kivaa iso boobooson do ka: “I nopo lahan tavasi do papaapu nga papaapu doid di tangasampit.” Kosudong kozo iti do mositi papaapu tokou doid di tuhun tangasampit do manakadai dioho. Monimung pinuavangan montok sondii miampai au manakadai di tangasampit nopo nga komozon do odoot om mongkudaadau.
Ki-hoogo o pinuavangan nung gunoon no i do abaa do manakadai do tuhun tasampit id posoihi dotokou. Ii no tuhun bosuon o lumongivit do usin om kotos hobi ko mantad Tuhan. Om nogi, ii tuhun au guminavo do Kinoingan no ii momoguno do pinuavangan dioho do monoto di tongomosikin om ii tongomungkang. Miaga izioho di tuhun bosuon ii moboos do “aiso i do Kinoingan”, ka.
Nga montok nopo di tuhun tabaa nga gunoon dioho ii kotos dioho do manakadai di tuhun tasampit, komozon do monimung izioho do kotos dioho sondii id surga. Mantad diho, do songian oihaan tokou do noonuan tokou do Kinoingan do pinuavangan, zotokou nopo nga mintatamong noopo dii. Ii nopo pinuavangan pinataak doid dotokou nga panakadai do popomogot do kopooposizo di tangasampit. Okon ko saviavi ii do montok dotokou om paganakan dotokou, nga panakadai nogi dovokon.
Tadau diti, monuu dotokou i Sangti Paul do sumambayang montok do tuhun ngaavi, hoohobi no kozo do laja, polinta om buu’an ngaavi do pogun. Sambayang diti kiguno montok kosimbanon om montok kabaahan do buu’an ngaavi. Nung sumimban o buu’an dotokou om abaa, tantu no do manakadai izioho popotood do kalaatan do suapan, au kaadanagn, om kapanatahan id pogun dotokou. Tu, ka dii Sangti Paul id pambasaan koduvo: “Mimang i Kinoingan do saviavi’ do atampasi om kodimpot doid toihaan poimponu’ dii katapatan.” Om ii nopo katapatan nga ii-iso’ no i Kinoingan, om tanak tokou ngaavi Disido. Ginovoon tokou ngaavi Disido do oizo, aiso pogoogozoon Disido om mimang Isido do saviavi tokou do mongkoongoo om ohidas. Minanaak nogi dotokou i profeta Amos do kopoingatan id pambasaan koiso, do au tokou daa mamadadi do usin sabaagi tujuan koiso id koposizon dotokou.
Kada tokou no paganu do kosivatan mantad di tangasampit montok do kobuu’on dotokou sondii, nga sakadazon tokou daa izioho tu noboos id hozou-kapaazaan: “Kakaton Disido do mantad siovuk ii tongohuduk”
Pinosodia di: Kat. Lewis Juit