RENUNGAN MINGGUAN – 22 Januari 2023

Minggu’ Ko-3 Toun A
22^nd  Januari 2023

‘’ I JESUS, II TITIU DO POMOGUNAN’’
1st  Reading : Isaiah  8 :23-9  : 3
2nd Reading :  Corinthians 1 : 10-13.1
Gospel : Mathew 4 : 12-23

Kopivosian kumaa doid diozu toinsanan. Minggu’ nopo di baino nga’ minggu’ ko -3 do toun A om tuhu’ nopo do pambasaan ngaavi’ di baino nga’ “I Jesus, Ii Titiu do pomogunan’’.  Pambasaan nopo ngaavi’ diti nga’ popoiho dotokou do i Jesus Kristus nopo nga’ ii titiu do koposizon om  titiu nogi do kaandasan. Iisai nopo ii monoimo’ di Kristus sabaagi do i Titiu nga’ mogiigizon mai’ doid kavasian. Au’ tokou i kaansau nung miampai tokou no di Titiu. Ii kinaantakan id Kampung Cana ii kosunduvan koiso di Jesus id nombo do pinapavahiu i Jesus do vaig kuminaa do anggur pinopointahang do Isido no i Titiu Totopot.

Id pambasaan di Abal Tavasi popoiho dotokou do i Jesus nopo nga’ Titiu do Koposizon om kaandasan. Oponsol kozo komozon diti sabap mongia’ Isido kokomoi do katangaban ‘’ Tongob no tu’ osomok no i kopomolintaan do Kinoingan’’ ka. Komozon nopo do tumongob nga’ hobi mantad do modihiu mantad do douso’ ngaavi’, mongomoi nogi iti do mamazada’ ngaavi’ di doun pomogunan. Sabap nung tumongob tokou noopo om au’ i  mamazada’ di doun pomogunan nga’ miguuguhi’ tokou dati do momidouso’. Mamazada di doun pomogunan okonko’ komozon mogidu mantad di doun pomogunan om aiso’ di do tonggungan montok do pomogunan, nga’ komozon nopo diti nga’ au’ tokou daa otumbazaan do kaanu o kuasa, pinuavangan om ningkokoton do manaak dotokou do koposizon om kasanangan.

Nunu i toponsol nga’ popoiho dotokou id Abal Tavasi diti do okon noopo ko’ zadaan dotokou i douso’ ngaavi’ dotokou  om pomogunan nga’ do kumaa’ tokou doid Kinoingan, otumbazaan doid Disido, otumbazaan doid di kobinsianan om di kopohiangan Disido, otumbazaan do kaanu i Kinoingan do manaak dotokou do koposizon om kaandasan. Id Abal Tavasi nopo diti baino’ nga’ popoiho dotokou do i Jesus Kristus nopo nga’ i kapamangahan di kopogohuungungan di Profeta Isaiah id pambasaan koiso.

Id pambasaan koiso’ mantad di Profeta Isaiah, id nomboo do ontok timpu dii do  sinangod do Assyria o Zebulun om Naptali om minoguzazang dioho. Id timpu’ diti no do minoboos i Profeta Isaiah do ‘Ii tuhun ngaavi’ ii minamanau id totuvong nokokito do ninavau tagazo; doid dii songingizon id tana’ do tinggohungung takadop nakababang o ninavau. Pinagazo’ Nu i  kounsikaan dioho’, nuangan Nu i  kaandasan dioho’, munsikou izioho’ id dumbangan Nu miaga di tuhun ngaavi’ do munsikou id timpu do pangamatan, miaga di tuhun ngaavi’ do ounsikou do ontok mogibaabaagi izioho’ dii kotos nanga-aau.’’ka. Id Abal Tavasi di baino popoiho’ dotokou do notuhuk i pinogohuungungan di Profeta Isaiah kokomoi do koposizon om kaandasan, ‘’ Tongob tu’ osomok no i kopomolintaan do  Kinoingan’’ ka.

Id hozou kosimbaan, manakadai dotokou do momiumon om mamalati’ kozo di pambasaan koiso’. Monuu dotokou iti do ahansan om otumbazaan kozo do Kinoingan do Ii-isido no i Kinoingan i puun do koposizon. Ingkaa no do sisimba nopo id hozou kosimbaan diti humozou tokou do ‘’ I Tuhan no i Titiu om sakadai ku’’ ka.

Id pambasaan koduvo’, minonuat i Sangti Paul doid tuhun ngaavi’ do Corinth monuu’ dioho’  do kada daa’ do aiso piunungan doid taatanga’ dioho’. Iti nga’ aantakan nogi doid taatanga’ do paganakan dotokou, id tinimungan om nogi id panambazangan. Iho nodi poogi do kada’ tokou no tongkizad mantad di Titiu mooi do koivad tokou mantad do aiso’ pitunudan. I Jesus no i Titiu i kaanu popitunud om popiunung do tuhun ngaavi’. Nung tumanud tokou nopo di Jesus nga’ au’ tokou i kaansau tu’ kivaa do popotunud dotokou di lahan.

Kanou pupusai tokou i boogizan koduvo di Abal Tavasi, ii kinapamahaavan di mokiki’ia’ koiso. Id Abal Tavasi popoiho dotokou do ontok nopo do hoovo di Jesus i  Peter om i Andrew, tuutulus do zinadaan dioho’ i pukot om tuminanud Disido.  Om hoovo nopo vagu Disido i James om i John, izioho’ nga’ tuutulus do dinuanan dioho’ i padau dioho’ om ii mohoing dioho’ om tanud no Disido. Nookuo tu’ tuutulus do suminimba izioho di hohoou di Jesus om minomoduan do saviavi di doun dioho’?. Sabap nopo diti nga’ papaabal nopo di Abal Tavasi nga’ ii no hobi’ toponsol om i kopoguhu do maan toguvango’. Mongunsub o panambazangan kumaa doid dotokou do humabus om papaabal di Abal Tavasi mooi do otumbazaan o pomogunan om atampasi, om mooi do ko’ium o pomogunan do koposizon om kaandasan maza’ di Jesus Kristus ii Titiu do pomogunan.

Zotokou nga’ nohoou nogi  do dumadi’ do tutumanud di Jesus do sumasi’ di Titiu. Nga’ uoton nogi zotokou sondii do nadadi’ tokou naku’ do titiu kumaa do suvai tuhun, doid paganakan dotokou toi’ doid tinimungan dotokou?. Nadadi tokou naku do titiu do Kinoingan? Kanou nodii poogi do sumambayang om mokiinsian doid Kinoingan do kaanu tokou no daa do kavakasan om kounsuban do dumadi do titiu do Kinoingan do kaanu tokou nodii papaabal di Abal Tavasi kumaa doid paganakan, kinoluangan ngaavi’ om nogi id tinimungan dotokou.

Amen.

Albert Mining, Paroki Penampang