RENUNGAN MINGGUAN – 29 Januari 2023

TADAU MINGGU KA-APAT
ID TIMPU TOOMOD, TOUN A @ 29/1/2023
“II KO-AISO-AN DOTOKOU”

Ii tuhu do kalamazan ontok Tadau Minggu Ka-apat id timpu toomod, Toun A ontok tadau minggu diti “II ko-aiso-an dotokou’ poposoou dotokou do aiso i’ dotokou nung okon mantad koginavaan do Kinoingan.  Komozon, doiti tokou id pomogunan diti maa-mantad no titaak toomod do Kinoingan.    Kosudong di poogi monongkotohuod tomoimo doid Kinoingan di koginavaan Disido.  “Tu noikot toomod ginazo do koginavaan do Kinoingan do pomogunan, do pinataak Dau ii tanak tontoisoon Dau, mooi do iisai nopo ii otumbazaan doid Disido, au i’ mai apatai nga’ kaanu do koposizon selajul.” John 3: 16

Id Pambasaan Koiso mantad di Profeta Zephania noboos do “Iumo’ no i Tuhan, oi saviavi; kou, ii tongohuduk do id tana’, ii mimozo’ dii ponuu’ ngaavi’ Dau’.  Iumo’ no o katapatan, iumo’ no o kohudukan: ko-ium kou i’ dati’ do susuton do ontok dii tadau do kohohodong di Tuhan.”  Ingkaa nokozo unsub kumaa tuhun do Isreal dii noohu-ohu ontok timpu dii,  ii kakaal po otumbazaan doid Kinoingan do atampasi i’ izioho nung mogium tomoimo do Kinoingan. Montok dii kogumuan ii minonohikud do Kinoingan, kopunsaan o otoimo dioho. 

Mudizo tokou di dotokou sondii:  “Kakaal zou i’ nangku otumbazaan doid Kinoingan?”  “Ii koposizon ku osomok nangku do Kinoingan?” Ondomo no do aiso id dotokou nung ‘aino’ ii Kinoingan id koposizon diti.  Iho no, iumo no ii Tuhan do kakaal po Isido do o-ium.  Poinhansan tomoimo do kotoimo do kosokodungan Disido – ii notuhuk maza no kinoikatan dii Jesus id tanga koposizon do tuhun.  Nunu o pihion dotokou?  Koposizon miampai do Kinoingan nangku toi ko koposizon ii doun pomogunan?.

Ii sisimba id hozou kosimbaan “Songkuo nodii o sinanang dii tongosiibo o kogiiginovoo’; dioho’ no dii pomolintaan do surga” kopongunsub nodaa dotokou do mogium om tumihombus otumbazaan doid Kinoingan. Id Disido no do kaanu tokou do koposizon ii doun Kinoingan.

Id Pambasaan Koduvo mantad suat koiso’ di Sangti Paul doid dii tuhun ngaavi’ do Corinth obuhat isido pinoposoou dioho do apatut tomoimo monongkotohuod doid Kinoingan sabap nodii titaak do koginavaan Disido doid tuhun maza dii kinosusuvon di Kristus id tanga do tuhun.  Au di kosudung do mokiazou sabap di pinuavangan, ningkototon toi kinahantazan sondii o tuhun tu kobosuanan i’ iti id mato do Kinoingan. Ii kosumbungan do songuhun kapangantob disido do monongkiambahut do Kinoingan om monoimo di koposizon selajul ii agampot maamantad do otumbazaan doid di Kristus. 

Pinosoto di Sangti Paulus iti: “Miaga booson dii buuk tobitua: nung kiva iisai noopo do mokiazou, nga’ potumbazaai no isido do mokiazou kokomoi di Tuhan.”  Doid Kinoingan no, om okonko id dau sondii, songuhun apatut monongkotohuod, om doid Kinoingan no do apatut isido do manaak do koponongkotohuod doid oonu ii nahantoi dau id koposizon.  Unsubon tokou di Sangti Paulus do apatut do humansan tomoimo doid Kinoingan om okonko oonu ii kivaa doid pomogunan mooi do ahantoi di ii dandi do koposizon miampai do Kinoingan.

Id Gospel, maza dii pason do ‘kounsikaan’ mongia ii Kristus ingkuo do ingkuo tokou kapamahantoi di pomolintaan do Surga id duvo lahan poimbida:

Koiso: Tuhun ngaavi dii ongosiibo, tongohuud, obinsianan om oniting  o ginavo/kogiiginovoo om ii dumadi do ii popipibabas – dioho’ no dii pomolintaan do surga ka dii Jesus. Iti no ii ‘kunsi’ do mamahantoi di kopomolintaan do surga.  Ingkuo o kogiiginovoo dotokou sabaagi do tuhun Katolik? “Tongob no, tu osomok no ii kopomolintaan do Kinoingan”

Koduvo:  “Iisai nopo ii aanangan do tumanud Dogo, mositi do zadaan dau o dau sondii, saanon ii salip dau om tumanud no dogo: Markus: 8: 34.   Iti no ii lahan do koposizon do tuhun ngaavi ii mipadan di monoimo di pomolintaan do surga:  mundoso om oundoso sabap di Abal Tavasi: kopiuman mogiad, houson om tutuuvan do nunu ii kotunud; poimamangon om undosoon.   Avazaan ngaavi iti sabaagi do tuhun ii otumbazaan doid Kinoingan.  Kounsikou no tu noboos id Gospel di baino “Koondos no om kounsikou no, tu agazo’ i’ ii tingadan diozu do id surga”.

Tadau minggu diti ponogi mamalamai o panambazangan dotokou diti Tadau Minggu Katekatikal Sompomogunan miampai tuhu kalamazan “Monginvagu do Iklizia miampai Kotumbazaan id Paganakan” / “Memperbaharui Gereja dengan Iman dalam Keluarga” / Renewing the Church with Families of Faith”.

Sohinaid somok duvo toun notutub o panambazangan sabap di ‘covid-lockdown’.  Nga’ ii panambazangan toniini id paganakan pointihombus do poingukab. Nga’ nung otutub iti panambazangan toniini id paganakan tu natagakan do kotumbazaan, otutub  o panambazangan ngaavi.  Atagakan tokou do kahansanan do kosuang di pomolintaan do surga.

Kanou, mohoing kusai om tondu ngaavi om tanak ngaavi ponogi: mogiuhan-uhan om osompuu “iso ginavo” do monuidong diti panambazangan toniini id paganakan dotokou.  “Paganakan di sumambayang songovian, osompuu tomoimo”  Iti no ii lahan di ouhan ii kaanu mamadadi do paganakan do avakas o kotumbazaan.  “Dalam doa, kita bertemu dengan Yesus secara peribadi yang akan menguatkan iman kita.” Maza diti mamadadi do puu paganakan ngaavi’ do opulokis nogi monompuuan do Iklizia om gumampot do papaabal di Abal Tavasi.  

Papana’on om potihombuson nodaa di mohoing kusai  ii tonggungan dau sabaagi do ii ‘padri / imam’ id paganakan.  Maza sakadai do sinavaan disido sabaagi do ii ‘mononokodung’ avakas tomoimo ii kotumbazaan id paganakan.  Kavakas nogi ii panambazangan id kinoizonon sondii.  Dodizo no ii sambayang do paganakan sabaagi do lahan koposizon dotokou.!

Kounsikaan manaandak do Tadau Minggu Katekatikal doid dizou songovian.  “Moginvagu do Iklizia miampai Kotumbazaan id Paganakan”.   Sambayang no do otuhuk no iti id paganakan dotokou.

Athanasius J. Ebol
Paroki St. Michael Penampang