RENUNGAN MINGGUAN – 5 Februari 2023
POMOOGIZAN MINGGU KO-5 TIMPU TOOMOD TOUN A
05 February 2023
Tobpinai kou ngaavi, pambasaan ngaavi tadau diti poposoou dotokou di tonggungan dotokou sabaagi tutumanud di Kristus do sumasi, dumadi do tusi om titiu do pomogunan.
Iti nopo Abal-tavasi do tadau di baino nga toput di Abal-tavasi di minggu nakatahib, ii minongomoi do koposizon di Kopopounsikou. Om mooi do kotoimo do koposizon di kopopounsikou, minanaak i Tuhan Jesus do duvo(2) poungkadanan ii mositi tonudon dotokou. Mositi dumadi tokou do tusi om titiu do pomogunan.”
Nokoiho tokou ngaavi do iti nopo tusi om titiu nga oponsol kozo id koposizon dotokou do tadau-tadau. Nung aiso do tusi om titiu nga kotoguvang tokou do kobohingkaangan. Momoguno tokou do tusi do pomoloso do nansakan om momoguno tokou do titiu do ponitiu do totuvong. Mositi nogi do soovon tokou do aiso i guno do tusi nung poingopi ii. Kiguno ii nung pohongoton do nansakan. Ingkaa nogi sabaagi tuhun Kristian, nung au humongot di tuhun id posoihi dau, au isido kopokito do kososian tavasi sabaagi tuhun Kristian totopot.
Iho no sabap do minoboos i Tuhan Jesus do: “Iziozu no ii tusi, iziozu no ii titiu.” Au minoboos i Tuhan Jesus do, “Mositi dumadi ko do ‘tusi’, toi, “Mositi miaga ko do ‘titiu.” Iho nodii poogi do hoovon tokou di Tuhan Jesus do humabus mintahang papasasi di koimaan tangavasi dotokou sabaagi tanak totopot do Kinoingan, do monuhung di tongomosikin, miaga di noboos id pambasaan koiso do, “Boogizai no do louti ii houson, om posusuto no ii tongomosikin aiso izonon, basaanai no ii tuhun ii okito nu do pobuhagas om kada tohikudai ii
tobpinai nu sondii,” ka. Om i nopo poombitanan tavasi do kokomoi diti nga i Sangti Theresa do Culcuta. Miampai koginavaan, tinuhung dosido ii tongomosikin, songkosuvazan, do au monutul tinau, kotumbazaan, om votik.
Tobpinai kou ngaavi, minanaak i Tuhan Jesus do kopoingatan doid dotokou. “Nung atagak inosin do tusi, aiso nodii do hoogo dii,” ka. Ingkaa nogi iti koposizon dotokou nung do aahung no do sinindak do pomogunan, atagak o inosin o kotumbazaan dotokou, om opisok ii titiu do koimaan tangavasi dotokou.
Miaga do tusi do songkodut no, koposimban i do loso do taakanon, ingkaa nogi daa ii koimaan om boos dotokou, koposimban daa i do koposizon do tuhun ii nokoinsodu mantad Kinoingan, hoohobi no kozo mantad do puu paganakan dotokou sondii.
Nga au tokou kaanu do mimang diti nung momoguno tokou no do kabaahan dotokou sondii. Iho no sabap do pinopoiho i Sangti Paul id
pambasan koduvo, do au tokou daa momoguno do kabaahan om pomolotian dotokou sondii do mogovit do tuhun doid di Kinoingan, nga mositi humansan do kuasa di Spiritu Tobitua. Om nung magangat tokou do tuhun do otumbazaan doid di Mononobus, mositi nogi do hobi poguhu okito tokou do notobus no.
Tobpinai kou ngaavi, kanou no sumambayang mokianu do Kinoingan do grasia om siniou ginavo do adadi tokou daa do tusi om titiu tavasi, tu ka dii Hozou Kapaazaan, “Ii nopo tuhun tavasi nga titiu id totuvong montok dii totuhid,” ka.
Lewis J.
