RENUNGAN MINGGUAN – 12 Februari 2023

TADAU MINGGU’ KOONOM ID TIMPU TOOMOD TOUN A
IH NUHUVAN: II UNDANG-UNDANG DI KINOINGAN.
Id Pambasaan mantad dii buuk do Ecclesiasticus 15:15-20

Tumanud dii ponuu ngaavi, id suang i’ do kuasa nu’ o mimang do ouhi. Onunu kopizo iti’ komozon do’ ouhi. Nung i tanak susumikul, mositi do ouhi id’ balajalan dau, i sontob toina’on id sikul om nogi ponu’an do’ mongingia. Id’ pakalajaan dotokou nga’ ingkaa ponogi. Ingkaa nogi iti’ ponuu ngaavi do Kinoingan, nokosodia om pointounda, mantad dotokou nung atanud ngaavi iti. Nga’ poingintong, pointudung Kinoingan do potitikid koimaan do tuhun.

Ingkaa nogi iti Hozou Kosimbaan (Psalm) minggu diti: Ongounsikou izioho’ ii tumanud dii undang-undang di Kinoingan! Nokotounda om nongokosodia iti undang-undang, kootulan ngaavi om zotokou ii suupu di Kinoingan ongounsikou, kapantod ii haang, abalakatan om katanud gisom doid kohimpupuson.

Id Pambasaan Koduvo, mantad dii suat koiso’ di Sangti Paul doid tuhun ngaavi’ do Corinth 2:6-10.

Popoiho kokomoi do kabaahan toi wisdom. Toiso-iso dotokou diti, nonuan do Kinoingan do vava toi titaak, kabaahan maza’ di Spiritu Tobitua. Songian do’ nopodu tokou ( id baptism), kotoimo tokou diti titaak mantad Kinoingan. Vookon dotokou au’ dati nokoiho, au’ kopiuman, nga mositi muot tokou di Kinoingan miampai sumambayang, mokinsian mokianu om mokisokodung Disido.

Pambasaan mantad dii Abal-tavasi tobitua sinuat di Matthew 5:17-37 minggu diti, ii Tuhan Jesus minanaak dotokou do katatapan om kootulan mooi do sumuni, sumukod tokou miampai do kabaahan. Nangakataak iti montok do kovosian dotokou om nogi kovosian doid pogigizon id komuniti ngaavi dotokou, sundung ogumu i koukatan, ponginaman ngaavi ii kopogovit doid kopomidousaan. Pinoposoou  i Tuhan Jesus do minikot Isido okon ko mooi pongidu’dii undang-undang nga’ mooi pomogonop. Komozon kaanu daa iti tuhun do tumanud ponuu ngaavi diti miampai kotunud, pointopot om poinpantod o ginavo. Iso mantad ponuu’ di Tuhan Jesus dii tagazo no’ kopizo nga, guminavo dovokon miaga nopo do guminavo dotokou sondii.

Miaga dotokou diti, ii tutumanud ngaavi di Tuhan Jesus, kada’ nodaa do kahasa o kopomolotian onunu ngaavi ii sontob kopononsunudan, tutuduk om kopongia’an Disido kokomoi diti Undang-undang, kootulan ngaavi. Au’ nogi kavasa do pomomoinan toi au’ tokou monongkoiho do onunu ngaavi iti kootulan om ukum. Tu’ sontob pino’ia Disido nopo ngaavi diti nga’ mooi do hobi podii do minsomok poh vagu tokou kumaa doid Kinoingan ii’ minamangun dotokou.

Monongkotohuod tokou kumaa doid di Tuhan Jesus dii sontob pinataak, minomogonop di ukum om kootulan. Adadi tokou nodaa dii tutumanud Dau di ouhi, noponu do koginavaan kumaa doid dovokon. Abantug no daa o ngaan di Kinoingan! Amen.

Sinuat di: George J Maison