RENUNGAN MINGGUAN – 22 Februari 2023

TADAU KOTOHU DO TAVU  A,B,C

Joel 2:12-18;  2 Cor 5:20-6 :2;  Matthew 6:1-6, 16-18;

REFLECTION:

Tadau Kotohu Tavu nopo nga’ tadau tobitua do sambayang om kopogkuasaan ii lamazon do Katulik id kaadat-adato do Roman. Tu’ tadau koiso’ do koponogitan  (Lent) iti, ogumu tuhun Kristian mikot doid koponompuanan panambazangan poinsuusuvai diti, id nombo ii ongotumbazaan ngaavi’ monoimo do tavu id labas dioho miampai boos, ‘Tongob no om kotumbazaai no di Abal Tavasi’ toi’ ‘Siovuk ko haid om mahik ko vagu doid siovuk’. Ii nopo tavu gunoon nga’ loun paam tinutudan mantad di kalamazan Minggu Paam ngaavi’ toun nakatahib. Doid kaantakan poinghoohobi diti, hoovon tokou do mibabas miampai do Kinoingan. Maza do sactamental do tavu, ii tanda do katangaban, popoingat dotokou sabaagi momimidouso do tavu om siovuk no toomod.

Id koposodia’an dotokou montok kounsikaan Paska ii mikot, humaad tokou doid kobinsianan di Tuhan Jesus montok balakat ngaavi’ om kopohiongan Disido; tu’ au’ i’ mimang ii Tama’ poinsurga do apatai tokou nga’ mamaamasi miampai di Kristus nokotungag ii momolinta sohiihinaid. Mantad diho, do maza di grasia do Kinoingan om kuasa di Spiritu Tobitua, sumodia tokou-sondii do mamalamai do kinapatazon om kinotungagan tabantug di Kristus Mononobus dotokou, do ohiungan mantad douso ngaavi’ maza kopongimvaguvan do spiritu.

Mononsunud dotokou o susuzan Panambazangan do, ii nopo kopomogigihan do tavu doid labas ontok timpu do koponogitan toi Lent nga’ koubasanan kasambaan mantad po dii nuugan tounan kavahu (8th century), miampai mogikavo-kavo lahan do mogkodos, sumambayang, kohubukan om koponohuodan kumaa suvai’. Iti no ii kosivatan do manampasi-mahik di Mistirum Paska di Tuhan Jesus Kristus, popoimbuhai dotokou doid iso tukuan koposizon kavavagu om pamanaan dotokou, om nogi momogonop dotokou montok kobontugan do Paska. Ka di Pope Francis, ‘Koponogitan (Lent) nopo nga’ timpu do kaahanan toi’ kopongimvaguvan montok do Panambazangan poinsangkazu, montok do tinimungan tuhun om toiso-iso ongotumbazaan’.

Nga’ ka dotokou nonggoo dii pakaazan do koposizon?…Kivaa naku kahansanan do koposizon selajul?…sumukod tokou naku id koposizon spiritu maza do sambayang, mambasa boos do Kinoingan om momuondom mahik dii, monoimo do sacramen ngaavi’.

Hoovon tokou di Tuhan Kinoingan do gumuhi doid Disido miampai aavi’ ginavo, mogkodos, miad om mogkoudu – do papahapas di lahan ngaavi’ doun pomogunan, umagko doid lahan ngaavi’ tobitua om minghuda doid katangaban totopot, tu’ noponu ii Tuhan Kinoingan do hinuud om kobinsianan. Katangaban nopo nga’ iso’ pangaan kiguno do id pogiigizon do tuhun Kristian, tu’ aiso’ i’ dotokou do koongoi-ongoi po dii kapamahaavan tagazo ii doun dotokou sabaagi do Kristian ngaavi’. Vagu, popoondom dotokou dii kopomohidangan, ii pinopovihiu kotumbazaan id di Kristus ontok tadau minomoimo tokou do Sacramen Kopodsuan.

Noongou dotokou ii St. Paul do mokitimbang doid dotokou id koobian di Jesus do kopibabas miampai do Kinoingan om sungkad-tukad dotokou om mositi nopo do kikoinsibaan-ginavo tokou do mokianu kopohiongan mantad dii sontob nosinduahan dotokou. Kinoingan Tama’ pinopougad di Tanak Tontoisoon Dau’, Jesus Kristus, ii aiso’ do douso, do matai montok dotokou id salip, minaganu do tampat dotokou om tinantaman do songuhun momimidouso do adadi tokou daa do tongotuhid ngaavi’ id mato do Kinoingan. Iti no timpu dotokou do popokito do kopomohoogo’an doid di Tuhan Kinoingan do mamanau id kotuhidan Disido’ do otungkusan tokou daa di koponomposizan maza do koginavaan aiso’ gontob om kobinsianan Disido. 

Id Abal Tavasi di Matthew, ‘okonko’ tumihombus tokou doid lahan ngaavi’ doun pomogunan nga’ umagko doid pomusaavan kobituahan, mooi do sumukod tokou id di Kristus maza do grasia do Kinoingan om kuasa di Spiritu Tobitua’. Id timpu do Lent diti, poingaton tokou vagu do Sumambayang, Mogkodos om Monohuod, om mositi daa kointahang ii kobituahan tosoosonguhun id piahatan do Kinoingan om dotokou sondii, do momiumon di kaahanan poimponu om mamanau miampai di Kristus id koposizon dotokou tikid tadau. Om ka do Buuk Tobitua, ‘Kokito i’ ii Tama’ dotokou do nunu noopo maan dotokou do poinhosok’. Komozon: Tu’ hizab-sondii dotokou iti do mamanau miampai di Kristus, mositi maan dotokou iti miampai koinsibaan-ginavo, kikounsikaan om osuau tu’ Kinoingan sondii i’ maganu saviavi’ dii kobontugan.

Iho nodii poogi do nung kaanu tokou mimang tavaavasi saviavi’ diti, adadi i’ timpu diti do timpu do grasia om kaanangan, sabap oongou i’ di Kinoingan o sambayang ngaavi’ dotokou om popohiong dotokou do douso ngaavi’ dotokou. Dadi, naamot dotokou do monoimo do tavu id labas dotokou, kanou no mokianu do Kinoingan montok di grasia do tumimpuun om nogi momupus pamanaan diti id timpu Lent diti, miampai sumambayang, “Kosianai no doid dagai Oi Tuhan, tu’ nokomidouso izikoi”.

Pinosodia di:

James Jimmy Totu
Paroki St. Michael Penampang.