RENUNGAN MINGGUAN – 30 April 2023
Pambasaan Koiso
Pambasaan mantad dii Koimaan ngaavi’ di Apostol ngaavi’ 2:14, 36-41
Pambasaan Koduvo
Pambasaan mantad dii suat koiso’ di Sangti Peter
Abal Tavasi
Pambasaan mantad dii Abal-tavasi’ tobitua sinuat di John 10:1-10
TADAU MINGGU KA’APAT DO PASKA TOUN A
“I GUGUMOMPI OM MINTAMONG DO KODUDUVO NGAAVI’ DOTOKOU”
Kopivosian om tabi pibabasan kumaa doid diozu tobpinai kou ngaavi id Kristus.
Otumbazaan zou do songian tokou nokongou di Abal tavasi dibaino, poposoou dotokou kokomoi do koposizon tokou nopo diti nga iso pinanau ii kiva tuddu om kiva dimpoton tokou om au tokou kaanu do mamanau sosonguhun nga mositi no do maza dii kiva manakadai om monontuduk dotokou om tantu no ii Jesus Kristus no ii mananakadai dotokou, miaga di noboos doid di Abal tavasi dibaino “Izou no Vavazaan do kukungan di kambing biri-biri”.
Aahom kozo kopomolotian di Abal tavasi dibaino. Sahagi do poimpasi po tokou doiti id pomogunan gompizon tokou koduduvo tokou tomoimo id konitingan om id kovosian. Ingkuo tokou maamasi, gumompi om mintamong do koduduvo tokou nga mamaza do di Jesus Kristus. II Jesus papatahang do isido no “panon om vavazaan”. Tuudu di Jesus kumaa dotokou do mokinongou tokou om sumimba disido maza koimaan om kotumbazaan dotokou. Ii Jesus Kristus nodaa ii mahud-pahud doid koposizon tokou.
Nunu daa ii kihoogo doid koposizon tokou nga momogompi tokou dii koduduvo tokou id konitingan om id kotuhidan sabap insan tadau gumuhi tokou doid Disido. Mimang tokou daa do mogigizon tokou poin spiritu tobitua miampai Disido. Ii Jesus minoboos id Abal tavasi dibaino do “Izou no ii vavazaan, isai noopo ii sumuang maza dogo nga atampasi”. Ii Jesus sondii ii vavazaan om ii pinapataak koposizon Dau kumaa dotokou om minonuidong do panambazangan montok dotokou om sabaagi do Tinan id upa do louti ii toimoon dotokou sabaagi do tutumanud Dau. Minikot ii Jesus doid dotokou do kaanu tokou koposizon selajur.
Panambazangan om Eklizia dotokou nogi mongunsub dotokou do sumimba kapamahaavan di Tuhan miampai monompuuan kumaa tiso om tiso, monuhung popobuu doid tinumungam dotokou miampai manaak tokou pombitanan tavasi om papabaagi timpu tokou do monompuuan id panambazangan.
Savi-avi tokou ii nopodsu id ngaan di Jesus Kristus nga nadadi tokou nodii songuhun panon do kambing biri-biri di Jesus ii kaanu mogovit om papasasad di Abal tavasi kumaa savi-avi tuhun. Miaga id paganakan tokou sondii num songuhun tokou mohoing kusai om kaanu tokou papaabal di Abal tavasi kumaa tanak tokou ngaavi.
Om montok do kopoingatan om sisimba kumaa kapamahaavan di Jesus, do songuhun nangku tokou di mongigia tavasi di Jesus om nakapanau tokou nangku nunu ii pinonuuan di Jesus id kapaabalan di Abal tavasi Dau om mogovit di panon ii nakansau do gumuhi id panambazangan om monoimo di Tinan di Kristus. Ii Jesus no ii pombitanan tokou do sabaagi kambing biri-biri ii apatut tonudon tokou.
Kanou no ombitanai tokou ii Jesus ii songuhun panon ii kotoboi do monompuuan om au insan humininsad mantad mokinongou dotoku. Ii Jesus minanaak koposizon Disido kumaa dotokou mantad no diho do kanou no dodizo tokou no ii Jesus sabaagi kounsuban doid koponompuanan dotokou.
Kanou no podpiumanai poingkuo tokou papaabal di Abal tavasi di Jesus kumaa di tuhun ii tompuanon dotokou om tutumanud tavasi tokou nangku di Jesus.
AMEN…
Disediakan Oleh :
George Abel
Paroki St. Augustine, Kinarut
