RENUNGAN MINGGUAN – 25 June 2023
TADAU MINGGU’ KOOPOD OM DUVO ID TIMPU’ TOOMOD ,TOUN A.
“ II TUHAN ID DABPING DOTOKOU”
1ST Reading : Jeremiah 20 : 10-13
2nd Reading : Rome 5 : 12-15
Gospel : Mathew 10 : 26-33
Kopivosian kumaa doid tobpinaai kou ngaavi’. Minggu nopo di baino’ nga’ tadau minggu’ koopod om duvo id timpu toomod do toun A om tuhu’ nopo do pambasaan ngaavi’ di baino nga’ “ Ii Tuhan Id Dabping Dotokou”. Om id pambasaan koiso, hozou kosimbaan, pambasaan koduvo om id Abal Tavasi popoiho’ dotokou kokomoi do 3 ahal. Monuu tokou iti do papaabal di Abal Tavasi, papaabal di Abal Tavasi sundung potuu’ id timpu’ do koundasaan toi’ko’ id kadaa’an om miampai dotokou ii Tuhan ontok do papaabal tokou di Abal Tavasi’.
Id pambasaan koiso’ nopo nga’ kokomoi di Jeremiah, ii songuhun profeta i nopihi’ di Tuhan mantad po id pagaganakan di ina’ disido. Sundung potuu’ do profeta isido’ nga’ kivaa’ nogi’ do koosizan om koluahan do ginavo’ disido saasabap no di kinootuan disido. Sinaasangi’ om dinuanan isido di kinoluangan ngaavi’ dau. Nohiivan di Jeremiah do nokoboos i Tuhan doid disido do kotoguvang mai’ isido do kahavanan mantad di bansa’ ngaavi’ do po’o’ompus timpu do poin-profeta isido’, nga’ nakadandi’ nogi’ i Tuhan do au’ i’ isido’ osonguhunan tu’ i Tuhan sondii ii pinopougad disido’.
Zotokou nga’ miaga’ nogi’ di Jeremiah do aantakan mai’ do mogombuingot tokou mai’ ontok do kivaa’ koluahan do ginavo’, ontok do kivaa’ do kobohingkaangan toi’ko’ ontok kivaa’ kozo do kosusaan do ginavo’ dotokou. Nung obuli’ nga’ mogidu’ tokou do mantad do koozuvo’ ngaavi’ do miaga diho’. Nga’ kinaman tokou do momit di Jeremiah id kotob boos ko 11-13, “Sundung potuu id katangaban om koluahan do ginavo’, nga’ tomoimo’ isido do ouhi’ doid di Tuhan om au’ tuminongkizad mantad di Tuhan”ka. Tobpinaaii kou ngaavi’, id pamaamasi’ tokou do tikid tadau, okonko’ tomoimo nopo do koduumak tokou di kaantakan di tavasi’ om i kopopounsikou do ginavo’ dotokou, nga’ ondomon tokou no do au’ tokou i osonguhunan. Tomoimo miampai dotokou i Tuhan.
Id pambasaan koduvo’, popoiho’ do guminavo’ kozo’ dotokou i Kinoingan, nga’ ontok nopo do kopomidouso’ i Adam, hobi’ podii vagu o koginavaan Dau doid dotokou miampai do pinaatod Dau i tanak Dau i Jesus Kristus, ii Adam koduvo do manampasi’ dotokou. Iisai nopo i otumbazaan doid Disido om opodsu id ngaan di Jesus nga’ kaanu mai’ do koposizon selajul.
Id hozou ngaavi’ kosimbaan, kopisudong om kopiangkung diho pambasaan koiso. Popoiho’ iti kokomoi di tuhun di aiso’ hasa’ nukum saasabap no di kogompitan dau doid di Kinoingan. Id stanza koduvo’ suminambayang i tuhun aiso’ hasa’ dii doid di Tuhan om ingkaa’ no i sisimba’ id hozou kosimbaan dii do “Id koginavaan Nu tagazo’, Simbao’ zou, Oi Kinoingan” ka. Ii stanza kotohu popoiho’ do minokinongou i Kinoingan di sambayang disido miampai sisimba’ do “ Minokinongou i Tuhan sontob di ongokuangan om au’ i’ minamazada’ di suupu’ Dau’ ii nangabalantazan” ka.
Id Abal Tavasi, popoiho’ dotokou do agazo’ hoogo’ dotokou id mato do Kinoingan. Id Abal Tavasi’, popoiho’ do pinopoingat no haid i Tuhan kumaa’ doid di mokiki’ia’ ngaavi’ Dau di nunu’ ngaavi’ i kobohingkaangan i otoguvang dioho’ do ontok popotihombus di kopongia’an Disido. Pinopoingat Isido do kotoguvang mai’ izioho’ di kaantakan ngaavi’ ii koponusa’ do kopooposizon dioho’ id nomboo’ do koduumak mai’ izioho’ do kababaazat, au’ toimoon do tuhun, pihavanan om kopoimamangan. Nga’ dinondian di Jesus izioho’ do miampai Isido dioho’ gisom do kohimpupuson do timpu’ om onuan mai’ Disido izioho’ do mananakadai ii popounsikou dioho’.
Ii nopo kopounsub kozo’ id pambasaan ngaavi’ di baino’ nga’ ming-uhitonon i Jesus do moboos do koduumak mai’ i mokiki’ia’ ngaavi’ do kopoimamangan nga’ om impiipio’ nogi Isido do moboos do “ Kada’ koosizai” ka. Minoboos nogi Isido do “Ii nopo mokiki’ia’ nga’ au i’ kaahib di mongingia’ dau”ka. Ii komozon do mositi’ momit ii mokiki’ia’ di mongingia’. Au’ apatut izioho’ do oosizan di tuhun di kaanu do mamatai do id tinan noopo nga’ okonko’ id koduduvo’. Ii nopo i apatut do koonokan nga’ “ISIDO” ii kikuasa’ do mamatai do tinan om nogi’ koduuduvo’.
Apatut do pohombuson di mokiki’ia’ ngaavi’ ii nunu’ i pino’ia’ di Jesus doid dioho’ do miampai ouhi’ om pointopot doid nomboo noopo sundung potuu’ do kotoimo’ do tundoonok toi’ kopoimamangan. Om montok diho, mositi’ do otumbazaan izioho’ di Tuhan do ii nopo koposizon dioho’ nga’ id hongon di Tuhan sabap ii nopo koposizon dioho’ nga’ kihoogo’ kozo id mato do Kinoingan gisom do ii po toiso’-iso’ di tobuk dioho’ nga’ nountob di Tuhan. Nung ii po songinan tanak tombohog pilit nga’ maan umohigai do Kinoingan do kada’ do aatu’ ontok tumuhud, hobi’ podii vagu’ do tuhun. Sabaagi’ tutumanud di Jesus, au’ tokou kavasa’ do mogohim Disido’ sabap nung mogohim tokou nopo do kotutun tokou Disido, i Jesus nga’ mogohim nogi’ dotokou id dumbangan do Kinoingan. Ingkaa’ nogi’ do nung katama’ tokou nopo do mangakun Disido’, Isido nga’ mangakun nogi dotokou id dumbangan do Kinoingan.
Tadau baino’, id sambayang tokou diti, kanou sumambayang kumaa’ di Spirtu Tobitua’ do kaanu’ tokou no daa’ papaabal di Abal Tavasi’ sundung potuu’ do koduumak tokou do kobohingkaangan ngaavi’ tu’ nokoboos i Tuhan do tomoimo’ id dabping dotokou i Tuhan do manakadai dotokou.
Amen.
Albert Mining
Paroki Penampang
