RENUNGAN MINGGUAN – 29 Oktober 2023

KOPOMOOGIZANU @ TADAU MINGGU KOTOHU NGOOPOD ID TIMPU’ TOOMOD TOUN A  – 29HB OKTOBER 2023
II PONUU’ DO KOGINAVAAN

Pambasaan Koiso:  Kinohobusan 22:  20-26
Pambasaan Koduvo:  Thessalonika 1: 5-10
Gospel:  Matthew 22: 34-40

Ontok Tadau Minggu Kotohu Ngoopod id Timpu’ toomod  Toun diti, ii boos do Kinoingan miampai tuhu  “Ii ponuu do Kinoingan” popoiho dotokou do ingkuo do guminavo do Kinoingan om nogi guminavo di sungkad-tukad dotokou.

Noboos id Gospel ingkuo do guminavo do Kinoingan  “‘Mositi’ guminavo ko di Tuhan Kinoingan nu miampai aavi’ ginavo nu, miampai aavi’ koduuduvo nu, om miampai aavi’ pomusaavan nu.

Ingkuo guminavo do sungkad tukad toi tuhun suvai?  “mositi’ guminavo ko di sungkad-tukad nu sabaagi do iziau sondii’.”

Noboos nogi id Gospel do  “Doid diti duvo ponuu’ ngaavi’ no do poinsavit ii saviavi’ Undang-undang, om ii Profeta ngaavi’ ponogi’.’  Komozon nopo diti nga’ maza diti ponuu do koginavaan do oimaan dotokou ii ponuu ngaavi’ do Kinoingan hobi nokozo di Opod Ponuu.

Asanang I bogia moboos kokomoi do koginavaan nga’ songian do popokito do koginavaan kopiuman tokou do osusa do tumanud do ponuu diti. Asanang do do abaazatan do suvai tuhun ko guminavo dioho.  Otopot toi?.

Nung moboos o songuhun “Guminavo zou do Kinoingan”, nga’ abaazatan I’ di sungkad tukad dau, komozon do momoduung (pembohong) isido.  Tuhun di au’ guminavo do sungkad-tukad dau ii okito disido, tantu no do au I kaanu guminavo do Kinoingan ii au okito.

Id suat dii Sangti Paul kumaa tuhn do Rome 5:8 noboos “Pinopokito o Kinoingan do koginavaan Disido doid dotokou, sabab minatai iKristus montok dotokou, di kakaal po tokou do momimidouso”.  Koimazaan toomod o koginavaan do Kinoingan. Yohanes 3:16  “Do noikot ginazo koginavaan do Kinoingan do pomogunan, gisom I ma do pinataak Disido ii Tanak Tontoisaan Dau, mooi do isai nopo ii otumbazaan id Disido, kaanu mai do koposizon selajul”.

Ingkaa nokozo o Kinoingan pinopokito do koginavaan doid pomogunan / tuhun.  Binabalazan Disido koginavaan diti miampai do koposizon di Tanak Tontoisoon Disido, ii Jesus, ii noundoso om pinogivis doiho id salib gisom napatai montok dogo, montok diozu om montok dotokou songovian.  Koimazaan tomod o koginavaan.  Olotian di do oluo I pomazo do songian do guminavo tu apagon o gatang ii balazan do songuhun songian do guminavo – kopiuman do osinduahan.

Okonko asanang guminavo do songuhun toi id dovokon dotokou.  Id Pambasaan Koiso @ Buuk do Kinohobusan noboos do ingkuo do guminavo dovokon dotokou “Minoboos i Tuhan doid di Moses, ‘Poihoo’ ii tanak ngaavi’ di Israel diti, “Mositi’ do kada’ diozu poimamango’ ii songkosuvazan toi’ undosoo’ o ginavo disido, tu’ minogiigizon kou sabaagi do songkosuvazan ngaavi’ id tana’ do Egypt. Mositi’ do au’ kou osiou doid dii tondu’ napatazan sansavo, toi’ doid dii tanak napatazan mohoing; nung osiou kou doid dioho’, ingkuukuo po nga’ humaad i’ izioho’ doid Dogo’, om kotumbazaai no do oongou Ku mai’ ii haad dioho’; sumingkahab i’ o kohohodong Ku om patazon Ku mai’ iziozu dii ilang, ii sinavaan ngaavi’ diozu sondii’ adadi i’ do tondu’ napatazan sansavo, ii tanak ngaavi’ diozu sondii’ adadi do tanak ngaavi’ napatazan mohoing.“Nung popoohos kou do usin doid toombo noopo dii tuhun Ku ngaavi’, doid toombo noopo tuhun tasampit ii poingamung diozu, mositi’ do kada’ diozu pomoino’ ii toindamaan pokikibunga’ do usin doid disido: mositi’ do kada’ kou pokianu do bunga’ mantad disido. (Along) Kivaa toi ‘along’ doiti ti? 

Komozon diti, Kinoingan mongunsub dotokou do mimang di koimaan di tangavasi nopo doid dovokon dotokou.  Iti no o kointahangan do guminavo tokou dioho.  Kopopounsikou do Kinoingan do koimaan diti om tantu no do balakatan Disido o koposizon dotokou tumanud di tinohuod Disido.  Iisai dotokou ii mimang abalakatan do Kinoingan? Mangai no ii koimaan tangavasi doid dovokon dotokou. 

Kadi kosimbaan id Hozou Kapaazaan “Guminavo zou Diau, oi Tuhan, I vinakas ku”. Nung au tokou guminavo dovokon dotokou @ sungkad tukad dotokou momuduung tokou ontok do moboos miaga diti.

Noboos di Sangti Paul doid suat koiso disido doid tuhun ngaavi’ di Thessalonika id Pambasaan Koduvo “Tuminanud kou dii koozuuzuvo’ do pamaamasi ii pinogiigizanan za dii ontok miampai zikoi haid diozu, ii montok kopongiaꞌan doid diozu, omnobuuꞌan kou do dumadi do ii momit ngaavi’ dagai, om di Tuhan; om miampai no ii diikaandasan di Spiritu Tobitua do kuminaa’ kou doid dii abal-tavasi’, sundung i’ ma do doiho’ ii Kagagaan tagazo dopoinhiput diozu. Itinoii nakapamadadi diozu dii poomitanan tagazo kumaa’ doid saviavi’ ii otumbazaan id Macedonia om Achaia tu’ mantad no diozu do tuminimpuun do tumongkop ii boos di Tuhan–om okon noopo ko’ id pototongkop do Macedonia om Achaia, tu’ nokotongkop doid noonombo nopo ii abal dii kotumbazaan diozu id di Kinoingan.”

Komozon, sabaagi tuhun Katolik mositi papaabal tokou di Abal Tavasi maza di koposizon dotokou ii nokuasa do koginavaa maza: koimaan, koboobooso om koulaalaho dotokou. Koposizon diti iso kasampatan dumadi do balakat om mambalakat do suvai tuhun maza di koposizon ii poinghongkod id koginavaan.

Miaga di hozou “Hidup ini adalah kesempatan. Hidup ini untuk melayani Tuhan. Jangan sia-siakan, hidup yang Tuhan beri. Hidup ini harus jadi berkat” (O Tuhan, pakailah hidupku, selagi aku masih kuat.  Bila saatnya nanti, ku tak berdaya lagi, hidup ini sudah jadi berkat).

Nga’ ingkuo nodii guminavo dovokon dotokou nung alaat izioho doid dotokou?  Nokoponinduo izioho do ginavo dotokou om nosinduahan tokou. 

Vookon dotokou kopiuman do ohodong, abaazatan, au osontob ginavo, nakakaus ginavo (kaampai no kumaa do Kinoingan), titipomohusi di koimaan Talaat di naantakan doid dotokou om ogumu po ii suvai.  Katanud tokou adadi do alaat. Songian do oopi iti doid ginavo dotokou, oponu o ginavo dotokou do kopoitan om au tokou kaanu do mangampun om papaampun di tuhun di nokoponinduo do ginavo dotokou.  Otopot koni?

Sahagi do do opion tokou o kopoitan ginavo diti, tantu nodo au tokou kaanu do guminavo dovokon dotokou.  Nung noponu do kohohodong o ginavo dotokou, au tokou i’ kosoomo di Jesus sundung I ma monoimo tokou dii Tinan om Zaa Disido id kosombutan.  Au kavahiu ii koposizon dotokou.  Ii om ii. Ingkuo di abalakatan o koposizon.  Au di adadi o balakat o koposizon dotokou kumaa dovokon dotokou.

Dadi, id timpu diti no, do baino diti do poguhui do monoimo tokou dii Jesus id kosombutan, pagabaso no o kopongompunan kumaa doid savi-avi tuhun dii nokoponinduo dotokou:  sinavaan, savo, tanak, tobpinai, koluang pakalaja, mentua (kusai / tondu), magahong, gosion om saviavi tuhun ii nokoponinduo dotokou. Tongob no.  Ompuno no ngaavi izioho.  (Lepaskan pengampunan saat ini.).  Toimoo nodii ii pongompunan do Kinoingan. 

22.   Ii Kinoingan ii noponu do koginavaan om kobinsianan ouhi do papaampun dotokou.  Kotumbazaai no.  Songian monoimo tokou di Zaa om Tinan di Jesus id kosombutan do tiinu, kosoomo tokou Disido do Pointuhun kozo ii momonu dotokou do pibabasan om kounsikaan id dii Spiritu Tobitua. Tantu no, do kaanu tokou nodii guminavo do tiso om tiso om guminavo do Kinoingan miampai aavi’ ginavo nu, miampai aavi’ koduuduvo nu, om miampai aavi’ pomusaavan nu. 

Pinosodia dii:
Athanasius J. Ebol
Puu Katekis Paroki St. Michael Penampng.