RENUNGAN MINGGUAN – PENTECOST SUNDAY

RENUNGAN HUJUNG MINGGU 19.05.2024

KALAMAZAN-TAGAZO TADAU MINGGU’ PENTECOST TOUN B
II TADAU KANASANDATAN DI SPIRITU TOBITUA

Minggu diti mamalamai tokou dii tadau tagazo do kinasandatan di Spiritu Tobitua do ontok pinonu’ di Kristus i Eklizia miampai dii kuasa’ di spiritu Dau’ om pinougad ii doid dii pomogunan do mogovit Dau’, kaandasan om kopohiangan doid saviavi’ tinau-tuhun.

Id pambasaan di abal tavasi, popoiho dotokou do nongokotoimo do Spiritu Tobitua ii mokiki’ia ngaavi, saviavi’ izioho’ do noponu’ di Spiritu Tobitua. I Mananavai.

Ontok timpu Pentecost, kinotimpuunon do panambazangan dotokou, tadau tagazo ii lamazon do tuhun Kristian, opod tadau mantad kinoinsavatan di Tuhan Jesus om tadau Kohimo ngoopod doid kopongozan tadau paskah. Mantad ponoogi diti, unsubon oh potitikid Panambazangan om Chapel papapanau do sambayang Triduum koposodiaan do koikatan tadau Pentecost!

Zotokou i tuhun dii ongotumbazaan adadi’ do sasi di Tuhan Jesus. Tu’ zotokou nopo nga ii Tuhan Kinoingan oh sanganu. Iso’ mantad di sakramen id’ kotumbazaan dotokou sabaagi tuhun Kristian Katolik, songian do nopodsu tokou, nasanganu tokou Disido, nokotoimo tokou di Spiritu Tobitua id panambazangan om monongkotohuod tu kivaa di Spiritu Tobitua ii kouvang mahud-pahud miampai id koposizon dotokou. Songian do kotoimo ngaavi oh tuhun di’ Mananavai, kopiiso oh tinau ngaavi nung kivaa kotumbazaan om kahansanan id dii Kristus.

Id pambasaan Koduvo (Gal 5:16-25), popoiho om mononsunud dotokou kokomoi koimaan ngaavi di doung pomogunan, ii kaandak ngaavi do tonsi, pononontob-ginavo-sondii’. Mianu-anu, magabantat om au-koipop do tivou-tonsi; kasambaan-doid-masou om koimaan-kotuvangan; pigogutan ngaavi’, aiso-piunungan ngaavi’. Nabaagi-do-sandaadau, kapapahad, koovukan, kalamazan-id-kozomutan om kununu ngaavi’. Toinsanan diti ii kahavan do’ ponuu di Tuhan dotokou.

Mantad nodii diti, zotokou i nokotoimo di Spiritu tobitua kaanu daa momiuva di tuva tavasi id’ koposizon diti, id’ pogigizon potitikid tadau. Kivaa daa do koginavaan, kaandasan, pibabasan, katabazan, tinohuod, kovosian om koipapan-sondii’.

Id pambasaan Koiso, ontok tadau Pentecost, ii apostol ngaavi miampai noponu’ di Spiritu Tobitua, minoboos id mogisuvai-suvai boos tu’ nonuan di Spiritu tobitua izioho’ do titaak do boos. Tuhun ngaavi’ mantad kakadazan do Jerusalem, nongoimazaan om natangahan izioho. Nonuan ngaavi ii apostol do katamaan, kabaahan, opulokis om au oosizan do papaabal di abal tavasi kokomoi di Tuhan Jesus ii minonobus do douso ngaavi do pomogunan.

Muot tokou id dotokou sondii, nung kivaa nangku vava titaak mantad di Kinoingan notoimo dotokou’ sabaagi songuhun Kristian ii ogiot doid kotumbazaan id’ dii Kristus. Om pointantu do kivaa. Okito iti mantad koimaan ngaavi dotokou di tangavasi kumaa doid dovokon, obinsianan, obintuhung dii nongosusaan, tongomosikin, avakas ginavo humavan songian kotoguvang do koimbaazatan doung pomogunan, au oosizan papaabal di abal tavasi di Tuhan. Iti no ngaavi ii pokionuaon dotokou. Nung toiso-iso tuhun katolik kalati om koiho do poingizon ii Spiritu Tobitua id koposizon dau, kozuuzuvo do pomogunan vinoun diti hobi poh dati’ vinasi. Aiso pisangadan, pigogutan, mogipaapantang, mamantang do vokon om ogumu poh ii suvai.

Id kounsikaan om noponu do koginavaan, iti’ nodaa oh pokionuon om dodizon do iso’ tonggungan dotokou sabaagi tutumanud dii ongotumbazaan, mogovit kumaa doid pibabasan, pisaan doid tiso’ om tiso maza’ dii ngaan di Tuhan dotokou Jesus Kristus.

Id Tadau Pentecost diti o’uangan, atambaan nodaa vinakas sunduvan om osompuu tokou miampai paganakan, sungkad tukad om tinimungan id komuniti ngaavi dotokou. Kounsikaan tadau kalamazan Pentecost!. Abalakatan tokou nodaa ngaavi di Tuhan Kinoingan. AMEN.

Nuhud om sinuat di: Tobpinai George J Maison