RENUNGAN MINGGUAN – 24th SUNDAY IN ORDINARY TIME YR B
POMOOGIZAN MINGGU KO-24 TIMPU TOOMOD TOUN B
Tema do Minggu diti monuu do papapantod do piombohutan tokou do Kinoingan miampai papasasi do kotumbazaan tokou. Maza do lahan diti kaanu tokou do hobi minsomok di Kristus om kapavakas do pinggisaman tokou do tumanud Disido.
Id Abal-tavasi, noongou tokou do minangakun i Peter do i Jesus no ii Mononobus. Ii sisimba di Sangti Peter pinopointahang do piombohutan totopot kozo disido miampai di Jesus. Om zotokou apatut do nokotutun no dii kozo di Jesus om mangkun do totootopot do Isido no ii Mononobus dotokou. Sabaagi do tuhun ii otumbazaan Disido pokionuon tokou do manaan do salip tokou, komozon do mamazada di koposizon haid ii au avasi. Om mantad diho mositi do pointounda tokou do tumoguvang om tumaan do koundasaan ngaavi, hobi no kozo do koimbazatan om kopoimamangan do pomogunan.
Nosusui id pambasaan koiso, pinopoiho dotokou i profeta Isaiah kokomoi do koundasaan do songuhun suupu. Ii pinogohuungungan disido kokomoi di Tuhan Jesus, ii ouhi kozo do tuminoguvang do koundasaan om kopoimamangan do monuhuk do kaandak di Tama.
Popoiho dotokou iti do ii nopo koundasaan ngaavi ii otoguvang tokou id koposizon do baino nga somboogizan di pamanaan dotokou tumanud do Kinoingan. Nga poingkuo tokou tumanud do Kinoingan?
Minoboos i profeta Isaiah do mositi mokinongou do Kinoingan om okon ko humavan, tu ka disido, ‘Nukab di Tuhan o tohingo ku,’ ka. Nukab di Tuhan o sonsong do tohingo tokou di ontok podsuo tokou, ‘Ephphatha’, ka, nosusui di minggu nakatahib. Monuu dotokou do mositi oining tokou do mokinongou do ohou om ponuuan do Kinoingan mooi do kapango o kotumbazaan tokou. Nga poingkuo tokou dii do manampasi do Kotumbazaan tokou?
Id pambasaan koduvo ponopoiho i Sangti James do, ‘kotumbazaan au mipahud do kalaja nopo nga napatai’, ka. Komozon do ii koimaan om boos ngaavi dotokou kopokito do i Tuhan Jesus no ii Mononobus dotokou, ii pamaamasi tokou totootopot okito do tanak tokou do Kinoingan, obinginavo, obinsianan om obintuhung doid di aiso sondion. Nung oizon tokou ngaavi iti, tantu no do tingadanan tokou, tu ka di Jesus, ‘Nung atagakan kou do koposizon sabap no Dogo, om sabap di Abal-tavasi, nga kapanampasi ii,’ ka. Komozon kotoimo tokou do tingadan do koposizon selajul id surga tongingo. Amen.
Ljuit
