RENUNGAN MINGGUAN – HARI NATAL, 25 DISEMBER 2024

POMOOGIZAN  KALAMAZAN – TAGAZO  II KINOHODION DI TUHAN

 [ TADAU KRISMAS ]

25 December 2024

“ II BOOS NADADI DO TONSI “

Pambasaan Ko 1     : Isaiah 52: 7-10

Pambasaan Ko 2     : Hebrew 1: 1-6

Abal Tavasi                : John: 1 : 1-18         

Tobpinai Ngaavi Id Kristus,

Miaga di noihaan dotokou do Tadau baino mamalamai tokou diti  Kalamazan – Tagazo  II Kinohodion Di Tuhan  – Tadau Krismas ii popondom dotokou do kinoikatan di Jesus Kristus do doiti id pomogunan di kumouinsan nogi.Kalamazan nogi diti popondom dotokou di kinoponuhukan di Tuhan di dandi Dau do mikot do doiti id  pomogunan do popokito di koginavaan dau kumaa doid tuhun ngaavi miaga di noboos doid Tema kalamazan tokou di baino do “ Ii Boos Nadadi Do Tonsi “ Lamazon tokou iti  kalamazan Tagazo diti  id koponoimaan dotokou di koikatan di songuhun ii mogovit do kahansanan do kavavagu kumaa doid tuhun ngaavi miaga di noboos maza di Abal tavasi di baino ih sinuatan di John . Maza do Abal tavasi diti pinopoiho dotokou do Kahansanan diti no ih kaanu do mamabang di lahan totuvong ih vazaan dotokou do dumimpot kumaa doid koposizon kavavagu. Maza do binabang diti no do kaanu  tokou dodumadi do tuhun kavavagu miampai  popohon om popotunud di kalalahano do pamamasi dotokou. Maza no do kaahanan do pamamasi dotokou do kaanu tokou nodi do gumuhi  miampai  minsomok di Tuhan Kinoingan

Koikatan di Jesus Kristus do doiti id pomogunan ii minogovit di Abal Tavasi di Tuhan Kinoingan kokomoi do koponomposizan maza di koponobusan do Kinoingan do douso ngavi do tuhun miaga di noboos di Profeta Isaiah maza doid pambasaan ko iso do pinpaabal di Abal Tavasi  kokomoi do koikatan di Tuhan do mooi panampasi ngaavi di tuhun Dau I mamaso po do poindadi do tudipon do doiho pomogunan do Babylon .Kinapaabalan do koponomposizan diti minanaak do kahansanan kavavagu  kuminaa doid I tuhun do Israel  do ontok dino.Maza do pambasaan koiso diti kaanu tokou do susunud do Kinoingan nopo nga obinginavo, obinsianan om obintohuod.Sundung potuu do sasaau tokou do kalavong mantad di ponuaan ngaavi do Kinoingan nga tomoimo do osianan oh Kinoingan miampai do mangampun ngavi di sontob douso dotokou.

Tobpinai kou ngaavi,

Koginavaan di Tuhan kumaa do tuhun ngavi au miho do atagak tu sasabab no diho do pinaatod Dau ih tanak tontoisoon Dau do doiti id pomogunan do mooi panampasi ngaavi do tuhun.iho no do maza id Pambasaan Ko Duvo ih naanu mantad Suat doid tuhun ngavi do Hebrew pinopoiho ii Kinoingan  do ii Jesus nopo nga  ii Tanak ii pinihi Dau ii binabang  tosindak do Kobontugan di Kinoingan om ii poingomit kozo do koduduvo Dau om ih kaanu do manampasi diti vinoun miampai do kuasa tavakas Dau om nogi kaanu do momunso dii kozomutan do douso.Popoiho dotokou iti do ih Jesus Kristus no ih kaanu ih lahan do koposizon om maza di Jesus Kristus no do kosuang tokou doid kopomolintaan do Kinoingan

Tobpinai kou ngaavi..

Id kapanaandakan tokou do Kalamazan Tadau Krismas diti do kaanu nogi daa tokou poposuni do piginavaan kumaa do id sungkad tukad om hohobi nokozo kumaa doid paganakan dotokou sondi. Do mamaso tokou do manaandak do kalamazan diti ondomon tokou nogi ih tobpinai toi ko kinouvangan tokou ih tangasampit mooi do izioho nga kaanu nogi do momiumon diti kalamazan maza do kopodulianan dotokou.Kaanu nodaa oh kalamazan Krismas diti do popogiot do kotumbazaan om koginavaan tokou kumaa doid Tuhan kinoingan

Kotobian Tadau Tagazo Do Krismas…..

Kat. Justin Theodore Tambud