September 7, 2025

TEMA: I KRISTUS, II MINAMAZADA’ DO SAVIAVI’ TU’ SABAP NO DOTOKOU

Pambasaan do tadau di baino nopo nga popoiho do tokou do nung tumanud tokou di Jesus nga mositi no do kivaa do ‘commitment’ toi kohubukan togiot om poimponu o kotumbazaan. Sanggup do mamazada do oonu nopo miaga di Jesus i minamazada do nuununu om huminubuk Dau sondii sabap no do tokou.

Okonko asanang o ponuu diti. Kogumuan do tokou do au kasanggup do mamazada di kotos ngaavi do pomogunan tu opiumanan dioho do kapanaak do kounalan tavasi doid pogiigizon dioho. Iti no i kapagantob do tokou do minsomok kozo di Jesus.

I Pambasaan koiso poposoou do tokou kokomoi do tuddu om hizab do Kinoingan montok do tuhun. Nokoimbuhai o hizab diti maza do kinapatazon Dau montok do tokou om nokointahang kumaa do tuhun maza di sunduvan do kabaahan.

I Pambasaan koduvo popoiho do tokou di ‘commitment’ di Paul miampai huminubuk dau sondii (sacrifice) miampai pinopoguhi di Onesimus kumaa di Philemon sundung tuu do i Onesimus nopo diti nga songuhun koupusan di Paul. Minanaak i Paul do poombitanan kumaa do tokou do tomoimo tokou nodaa do poinsodia do humubuk sondii montok do vokon om hobi podii do Kinoingan.

Pambasaan nopo do Gospel nga poposoou do tokou i Jesus do sunduvan do tumaak sondii mooi do adadi tokou dii do tutumanud totopot di Jesus. Ka di Jesus, “Nung kivaa o isai noopo ii mikot doid dogo do au i abaazatan di tama dau, di tina dau, di sinavaan, di tanak ngaavi, di tobpinai kusai ngaavi, di tobpinai tondu ngaavi, oo om nogi di koposizon dau sondii nga au adadi ii do mokiki-ia ku. Onu o komozon di Jesus do abaazatan. Iti nopo nga popoiho do tokou mimbalajal do manaak do kohubukan sondii om poinsodia do sumimba di kapamahaavan do tokou. Okonko komozon do abaazatan do paganakan do tokou. Nokoiho tokou do poingkuo i Jesus do gumininavo do paganakan Dau. Dadi zo tokou nga mositi nogi do guminavo do paganakan tokou. Nga komozon nopo di Jesus diho nga nung tumanud tokou di Jesus mositi zadaan tokou i doun pomogunan sundung tuu do osusa. Mositi do kivaa do sacrifice tokou. Iti no i komozon do manaan do salip tokou. Nga nung aino i salip doid pogiigizon do tokou komozon aino i Jesus miampai do tokou. Somoonu do avagat nga tumihombus tokou mamanau okonko sangadau no, sombuhan no tapi gisom do adampot tokou i ikoton tokou. Doiho i Jesus do mogkouvang do tokou. Kanou no zadaai i doun pomogunan om mamanau tumanud di Jesus.

Amen.

Andrew Sipajan.