HIVANG PANGAKANAN OM PONGINUMAN PAROKI ST. MICHAEL PENAMPANG
Rational
I nopo inipizon do saviavi tuhun nga kihamin di opiodo. Nga au oizo pomusaavan do tuhun do okuukuo hamin di kaanangan dau. Sundung potuu do ingkaa, nga mositi nopo do kivaa lopuan. Onini toi ko agazo, lopuan no o hongkod do hamin. Id lopuan no do kahabus o akanon – taakanon i kapanaak do vinakas do tinan, pomusaavan om sunduvan montok tambahut om paganakan. Kivaa nogi moboos do nung aiso lopuan, hamin dii posimbaavog do aiso suang om koompuvong, tu aiso intutukon.
Pinomusaavan do papavaa diti Cafetaria Paroki nopo nga mantad no diti pomuandamando lopuan nopo nga hongkod do hamin. Cafetaria Paroki diti dodizon do hongkod undoongon di ongotumbazaan ngaavi do miikau miaga iso paganakan tagazo, momoloso pinoto do mogisuvai-suvai nansakan om do naamot mogisoosolita toomod gisom i do kokomoi koponguugan do kotumbazaan. Adadi nogi iti do tampat monoimo tombuhui, kosoomo tambahut kavavagu toi ko tampat do undoongon naamot do momoloso do kupi opongo o Misa Tadau Minggu.
Cafetaria Paroki di poingukab om osindak tantu no do kagazat do ongotumbazaan ngaavi mikot id paroki dotokou om ongkuban di sinindak-sinuau do paroki tokou. Sabap diti no do i Puu Komiti Kapanaadaan Cafetaria nasaga do papavaa diti Cafetaria di kagazat om adadi do iso kounsikaan montok do ongotumbazaan ngaavi id Sangti Michael Penampang.
Pavaahan
Sabaagi do Cafetaria Paroki, “paroki” no o sanganu diti om okon ko montok iso zon noopo. Nga saasabap no do Panambazangan St. Michael nopo nga tina do panambazangan ngaavi id siibo do Paroki Penampang, kosudong no kozo do pavaahon o Cafetaria Paroki diti id doos do Panambazangan tagazo. Mantad diho do nopiangazan di do Puu Komiti Kapanaadaan Cafetaria do papavaa diti id dabping do Hintuun Paroki id Zon do Penampang(Google Map Koordinat: 5.9083141, 116.1103435).
Balanja
Kotoodo nopo diti nga hobi-kuang RM120,000. Balanja diti poingamung no o kopotoundaan do pavaahan, bakaang ponoodo, gaji pakakalaja, letrik om paip. Nga saasabap no do au atantu kozuuzuvo do ekonomi do baino tu sabap no diti toluo modohiu Covid-19, kivaa dii dati pisuvazan do touvi mantad di balanja natantu haid. Koinsavat dati ngaavi hoogo. Nga au po dagai nopibaasan o balanja di au oihaan nga mositi nopo do poomungon haid.
Kounsinan Ponoodo
Boogizan diti kivavaa do osusa om kobohingkang. Miaga di noboos ku haid, do baabaino koduumak tokou diti au kotontuan do ekonomi. Vookon dati di ongotumbazaan momusoou do au po kosokodung do popotihombus do onu noopo projik id timpu diti. Nga nung kalati diti boos Sina do CRISIS, koohon dati pomusaavan dau. Iti nopo boos CRISIS id Sina nga, “wēijī”. Kivaa 2 suku boos diti om miampai 2 komozon, wēi (kohigaganan) and jī (kosivatan). Dadi, CRISIS nopo dii nga KOHIGAGANAN nga nogi iso KOSIVATAN.
Di piipio vuhan nakatahib aiso do Misa Tadau-minggu dotokou. Do baino kogumuan di ongotumbazaan ngaavi do monokodung do paroki maza monohuod online (online donation) om tantu no do olotian tokou, do okon ko miaga ginumu otimung do ontok Misa Tadau-minggu. Okon ko au izioho monohuod nga(miaga di noihaan ku) kogumuan dioho do au noubas diti lahan popoundahiu usin maza do online. Nga montok kopotihombusan do projik diti do baino, manaak iti paroki dotokou do impoon montok di ongotumbazaan ngaavi do papapanau di tonggungan dioho do manakadai do Panambazangan.
Nakaatag dagai o lahan pogiuman usin, miaga do:
- Online Bazaar
- Tikit kinasip Paroki
Ogumu dati di ongotumbazaan koungkahat mato id lahan pogiuman usin miaga diti. Di piipio vuhan nakatahib, minanaak zou do kopointahangan kokomoi do lahan kavavagu pomiukutan usin, pinopointutun zou diti pungaanan do Sistem Salung Suat Paroki (Parish Envelope System). Iti nopo nga ponovohi daa di lahan koubasanan haid miaga diho duvo id savat. Nga au songkuo avasi kinoponoimaan. Gisom do baino id-siibo do 3% no nokosimba. Polisao ku nopo di touvi no nga 30 paganakan no i nokolijistol id Upis do Paroki do nakadandi do monohuod. Kokiikitanai nopo nodii nga miaga ko kakaal do aanangan o tuhun ngaavi di lahan pomiukutan kousinan ha-haid.
1. Online Bazaar
Ounsikou ginavo ku do popoiho kokomoi diti Tinimungan Koonduan Katolik(CWL) do Paroki Penampang i totootopot kozo do manakadai poimponu diti atag papavaa do Cafetaria mantad po di timpuun’i. Poguhu i’ do nokotimpuun iti projik, nokoponimung no iti Tinimungan Koonduan do usin kiginumu RM52,868.00. Minangazu izioho do Online Bazaar di koinsan nogi di ontok vuhan Julai, 2020 id timpu do tagahon tuhun ngaavi do mimpanau. Sundung potuu do okon ko saviavi Zon nakaampazat nga nokoukut nogi izioho do RM9,640. Ii nopo Online Bazaar di Kumoinduvo nga avasi kozo kinapaapanaai. Nampazat iti do saviavi zon, om nokoukut do kiginumu RM43,228.00. Tinimungan Koonduan Zon Penampang sondii nokoukut do RM20,000. Tinimungan Koonduan miaga do zon Sugud, Minintod om Kinarut nga avasi nogi nangaangazan. Manu zou do monongkotohuod do saviavi Tinimungan Koonduan di pininggisaman dioho id kalaja diti. Tantu no, do humansan zou do hobi podaa tinohuod di piipio Kampung Komuniti suvai nung tumanud no dii luputan di Datin Tracie Gom doid dogo, nga montok diti koonduan dotokou ounsikou toomod ginavo ku doid dioho. Koimazaan kozo izioho.
2. Tikit Kinasip Paroki
Itia lahan koduvo pomiukutan usin nopo nga tantu no do saviavi nokoiho diti. Naatul do monoodo 8,000 tikit do montok padaamaan diti. Mantad diho do saviavi Poniikoon do Tinimungan Tuhun Katolik id kampung pokionuon do popotikid tikit diti kumaa doid paganakan ngaavi id Kampung dioho. Nopiangazan dagai do manaak 20% mantad di dagang do tikit kumaa saviavi Tinimungan Katolik id kampung. Miampai kahansanan do ounsub di daa o buu’an ngaavi do papadagang do hobi ginumu tikit. Hoogo nopo do iso tikit nga RM20.00 om ogumu vava kalaai do ontokon. Vava kumoiso nopo nga kulita di apagau nodii do okito – Volkswagen Beetle guuguhu, pigoogompi haid di Rev. Fr. David Sham. Popoiho i’ zikoi do toiso-iso kampung do mogongoi di tikit ngaavi mantad id Upis Mison songian do kotounda. Pijaajangka do kosodia dati id minggu koiso do vuhan Ko-9 diti. Koponimpuutan nopo nga ontok ko-29tv Disember 2021. Koontok kozo do Kalamazan do Krismas Paganakan. Dadi, kapanaak vagu iti do hobi tinaandak do kalamazan diti.
Timpu Natantu
Totootopot nopo nga kigaab zikoi no do popotimpuun diti Projik Cafetaria Paroki do vuhan diti. Oondom motuu diozu, do pibooboos iti mantad po di toun (2020). Nga saasabap no diti Kootulan Panagahan Mimpanau (SOP) kokomoi diti toluo modohiu om ponogi vagu au kogonop usin ponoodo do nokohuntan dii iti.
Id kahansanan do kotimpuun daa iti do vuhan Ko-10 toun diti (2021). Sokio do avasi kozuuzuvo, kaanu tokou mamalamai do pogukaban diti do vuhan Ko-3 toun 2022. Poingkuukuo po nga, ouhud po do Puu Komiti Pomuhominan o kopoihaan poingonop om pohobuson i’ dagai iti id Hivang Kopoihaan Paroki(Parish Website) songian do asalasai.
Pongunsuban id sunduvan
Sabaagi tuhun Kristian ngaavi mositi do soovon tokou tomoimo do i Kinoingan monuu dotokou do manaak sabap kopokito iti do Isido no i Tuhan totopot id koposizon dotokou. “Saviavi ii avasi, saviavi ii poingonop nga mantad savat, mikot minsiibo mantad di Tama do saviavi tanavau, i au kosimban miaga do tinggohungung di miohon-ohon.”(James 1:17). Saviavi ii dotokou om onu noopo ii kivaa id dotokou nga mantad ngaavi do Kinoingan. Nga, songian do manaak tokou, manaak tokou noopo do tokuudi doid Disido do mantad di ginumu pinataak Disido doid dotokou.
Manaak nopo nga kopokitanan do monongkotohuod om mangazou tokou di Kinoingan. Mikot ii do mantad kasambaan do ginavo i poposoou dotokou do onu i kivaa id dotokou om pataakon dotokou nga i Tuhan o sanganu. Songian manaak tokou do Kinoingan, kotoimo tokou nogi do tohuod mantad di Tuhan. “Panaak no, om kivaa i’ do titaak ngaavi montok diozu: i poingonop, noinsok, nouzog, om maahabai po, do pohobuson mai doid dompungan diozu; tu i nopo pagagadang do gunoon diozu nga i nogi mai o pagagadang do gunoon montok diozu.” (Lk 6:38)
Kanou pomusaavai o pongunsuban diti om kinamai popionit miampai diti Projik Cafetaria. RM20.00 adadi do onu nopo montok diau. Vookon momusoou do okuudi. Ii suvai, hobi no dioho i aiso undovoon poisuusuvai dati pomusaavan. Nga nung piomungon i tohuod dotokou, au mongila do isai tokou, kapanaak tokou do pisuvazan. Okon ko saviavi tokou kaanu mimang do ahal tangagazo nga kaanu tokou mimang di ahal tongoniini miampai noponu koginavaan.
‘Pakaazan doid Paroki di koimazaan.”
Izou ii totopot,
Fr. Wilfred Atin
Faado Paroki Penampang
25 Ogos 2021
SUMMARY OF ST. MICHAEL’S PARISH PENAMPANG CWL ON-LINE BAZAAR SALES
CONSTRUCTION WORK SCHEDULE
Raffles Paroki St. Michael Penampang
montok kapanaadaan Hivang Pangakanan om Ponginuman
TICKETS PRINTED: 8110 tickets
UPDATES ON TICKETS SOLD BY ZONES/MISSION OFFICE.
ZONE PENAMPANG:
ZONE KOLOPIS:
ZONE MININTOD:
ZONE SUKANG MABPAI: 25 tickets
ZONE LIMBANAK:
ZONE MAANG:
ZONE SUGUD:
ZONE KINARUT:
ZONE LABAK:
ZONE TERIAN:
ZONE BUAYAN:
MISSION OFFICE: 260 tickets
Total Tickets SOLD as 17 Sept 2021: 285 tickets
