RENUNGAN MINGGUAN – 26hb September 2021
POMOOGIZAN MINGGU KO-26 MINGGU TOOMOD
Pambasaan ngaavi’ Minggu diti popoiho om magangat dotokou mintutun di Spiritu Tobitua do kumalaja id potitikid tinaau’ om kotumbazaan ii popointahang dii Spiritu id pogiigizon ngaavi’ dioho.
Id Abal Tavasi noongou tokou i Jesus minoboos dii mokiki’ia ngaavi’ Dau’, “Kada diozu potoodo isido: aiso i’ songuhun ii kumalaja do kosunduvan id ngaan Ku do moboos dati vagu do alaat kokomoi Dogo’. Isai noopo ii au’ humavan dotokou nga’ montok dotokou. Kumininam daa i John om mokiki’ia ngaavi’ Disido popotood do songuhun papahabus do logon ngaavi’ doid ngaan di Kristus, tu’ okonko poingamung do tinimungan dioho o tuhun dii. Pinoposoto sokii’kio i Jesus do guno’ kosingonuan, koukaban ginavo om pomuginavaan tavasi doid piombohutan do sungkad-tukad om vokon ngaavi’ dotokou.
Om id pambasaan koiso noongou tokou i Joshua monuu di Moses popotood di Eldad om Medad do mogoohungung id dii husap, tu’ noihaan di Joshua izioho’ do au’ nokotindapou ontok minanaak i Moses do kopougadan kumaa dii tinimungan 70 tongotuutuo pihi’ do Kinoingan do monokodung daa disido. Pinoposoou i Moses di Joshua om zotokou nogi’ do ada’ do apapahadan tu’ kalaja nopo do mogoohungung om kapaabalan nga’ okonko’ kalaja do piipio tuhun no, nga’ ii pamahaavan montok toinsanan tu’ ingkaa no i pokionuon di Tuhan tokou’ do mimang. Lahan nopo do Kinoingan do momohoou om manaak do kopougadan nga’ aiso gontob om potihombus i’ ii no doid tikid kohimpupuson do Misa Tobitua popohombus i Fr. dotokou do boos kopougadan’, ‘Ugad no’ om paabalo no ii Abal Tavasi di Tuhan.
Kaanu tokou momusoou om mamalati do boos ngaavi’ di Jesus om di Moses’ duuduvo kopokito do pomuginavaan om koimaan tavasi om papavaa do tonggungan dii tutumanud ngaavi’ id-suang om id-dahabus. Om maza do kinopodsuan dotokou’ nadadi tokou do tanak ngaavi’ do Kinoingan maagi’ dii kalaja do profeta ngaavi’ moboos id ngaan do Kinoingan papababang dii ninavau di Kristus doid tiso om tiso’ gisom doid pompod do tana miampai inuhi ginavo, pomusaavan om kohudukan id koponompuanan om kopongia’an di Kristus Jesus pibubuuan di Spiritu Tobitua do koginavaan, kosianan om pibabasan. Amen
Pinohombus di;
Kat. Clement Jinidu
