RENUNGAN MINGGUAN – 24 Oktober 2021
MINGGU KO-30 TIMPU TOOMOD, TOUN B
Tobpinai kou ngaavi, kotohu-tohu pambasaan di baino mongomoi ngaavi do Koimazaan. Kivaa diti ponguot, nookuo tu mositi do sumambayang tokou do mokiinsian di Tuhan, do poingiho i Tuhan do kokuangan ngaavi dotokou.
Id Abal Tavasi di baino, nokoongou tokou do guminizak ii Bartimeus do mokiinsian di Jesus? Oihaan dotokou do nokoiho i Tuhan Jesus do mokitonduhi i Bartimeus di pogigintong dau, nga nokuo tu muot po vagu ii Jesus do, “Nunu o pokionuon nu Dogo’ do maan montok diau?”, ka.
Nokoiho ii Jesus di Bartimeus, om au i’ taagal do poihoon Isido do mokitonduhi i Bartimeus do kokito vagu o mato dau, nga nookuo tu minuot i Jesus do onu pokionuon dau.
Tobpinai kou ngaavi, mositi do poihoon di Bartimeus i Jesus sabap otumbazaan isido do kikuasa i Jesus do popotonduhi do kokito mahik ii mato dau. Iho no sabap do gizak nogi di isido do hobi pinuod do momohou di Jesus,“Oi Mongingia’, pokitoo’ zou vagu’,” ka. Om hiningasan di Tuhan isido.
Zotokou nga mositi do miaga nogi daa di Bartimeus, au tumongkod do mokiinsian. Kada tokou omit di tuhun ii minomohodong di Bartimeus, ii mononuu disido do kumodoit; izioho no i totootopot nobohou, nobohou o ginavo, sabap au izioho kokito di kobohingkaangan di tuhun tosusa, au minonuhung di Bartimeus ii mizak gizak do mokihingos. Kivaa nogi dati dotokou ii nobohou o ginavo, au kokito do kobohingkaangan dovokon. Kivaa kosusaan do sungkad-tukad nga au monongkoiho. Komit-omit tokou daa di Bartimeus, sundung potuu do nobohou o mato nga au nobohou i kotumbazaan om kahansanan disido doid di Jesus.
Ogumu pangajalan di Bartimeus doid dotokou id Abal-tavasi’ di baino. Ogiot kotumbazaan disido, koiho isido di kokuangan dau om koiho nogi isido di kuasa di Tuhan Jesus. Otumbazaan isido do kaanu i Jesus do popotonduhi di pogigintong dau om mogovit disido id kanavaon. Om sabap no dii kotumbazaan dau do nokokito mahik isido. Kanou no momit di Bartimeus, ii au timiningkod do mokianu kosianan di Tuhan.
Tobpinai kou ngaavi, tadau diti, muot nogi dotokou i Jesus, “Nunu o pokionuon nu Dogo’ do maan montok diau?” ka. Kanou no mikot doid Jesus ii tomoimo poingandad dotokou, mokihingos di toluo do ginavo dotokou hoohobi no kozo di bohou do ginavo dotokou, do kokito tokou daa di kokuangan dovokon.
Lewis Juit
