RENUNGAN MINGGUAN – 21 November 2021

RENUNGAN HUJUNG MINGGU
Tadau minggu’ touvi no id timpu’ toomod, Toun B.
Nuhuvan: I Kristus Ii Laja.

Kotootohu Liturgi Pambasaan minggu diti kokomoi do ii Jesus Kristus ii Laja, laja tabantug.
Mamalamai tokou di Kristus ii Laja’ somvinoun (semesta alam), Laja do laja ngaavi ii mikot miampai Kobontugan om Sinindak.

Songian nopo oikot o timpu do kapatazon dotokou om bisalaon ngaavi tokou ontok timpu dino, au mongimuot ii Tuhan Kinoingan do onu o ningkokoton, kinavas pangkat id pakalajaan tokou, opoih,apulokis tokou po toi koh gobulan tokou, toi au avasi oh nangaangazan id koposizon doid vinoun.

Ti’uot do Laja tokou diti nopo nga…Onunu oh nimaan, noimaan om ingkuo tokou do kumaa doid dovokon. Tu’ ka di Tuhan Jesus, “Sosongian kou noopo do nokoimang diti doid songuhun diti tobpinai ku tongosisian, nga nokoimang kou diti doid dogo, ka.” (Matius 25:40).

Ii laja dotokou diti miaga do Songuhun mintatamong gugumompi tazam (gembala/ shepherd).Tuminaak dau sondii kumaa doid toinsasanan dotokou, hohobi po kumaa di tangasampit, ii mosikin, osonguhunan, ii sumakit om doiho no ii Tuhan Jesus do monginsasamod, manaak koinsasamadan. Tu izioho noh ngaavi oh sanganu om kapadan kosuang id kopomolintaan di Ama disido. Tamangan tokou ngaavi Disido  miampai noponu’ do koginavaan, hohobi’ poh dii tongosisian, tangasampit om sontob di sumakit. Sontob di nakaansau hoovon dau mahik gumuhi id lahan ii nokosodia, om’ onuan do kounsikaan. Ii sontob mokinongou om tumanud ponuu ngaavi’ dau au tohikudan. Manaak ii Tuhan Jesus do koginavaan dau om papagabas dotokou mantad koundasaan miampai popohiong do douso ngaavi dotokou. Aiso do kolugian do tumanud di Tuhan Jesus. Toinsasanan intangan ngaavi tokou Disido miampai koginavaan di poinhohobi.

Muot tokou dotokou sondii hohobi poh do id kovion do Minggu’ touvi no id timpu’ toomod, toun B diti. Do’ onu ii nohimpantai nadampot dotokou montok id kopomuanan di Eklizia di Tuhan Jesus. Ingkuo tokou do Kumaa doid dovokon, sungkad tukad dotokou, kumaa di tongomosikin, tongosisian om ii sumakit ngaavi, nopoduli ii tokou nangku izioho.

Pinopotuu lomou, miniad ii Tuhan Jesus montok do kakadazan, kota do Jerusalem. Sasabab no do au mokinongou angahangas ngaavi izioho, tovikudan dioho ii Tuhan Jesus om agagazo poh ii kaandakan dioho montok di doung pomogunan. Zotokou nga miaga nogi dati do tuhun ngaavi do Israel id Jerusalem diti.

Zotokou tu tuhun toomod nga ii nopodsu, nokoitoimo di Tinan om Zaa di Kristus, kokito  om koiho ii Tuhan, ii Laja dotokou do onunu kopizo kaandak dotokou id pomogunan diti. Id suang, toi daasom do ginavo dotokou, koiho Isido, tu Isido no ii sanganu dotokou om monguasa do konunu nopo id vinoun diti.

Ii Tuhan Jesus, adadi no daa do Laja dotokou sohihinaid, poinsuni id ginavo dotokou om tomoimo tokou no daa ohuduk tumanud di ponuu ngaavi dau tangavasi do naamot dotokou mamaamasi id pomogunan diti.  Amen.

Sinuat di: Tobpinai George J. Maison