RENUNGAN MINGGUAN – 28 November 2021
Timpu do Kapagandadan (Advent) nokoikot no vagu. Miaga tikid toun unsubon tokou ngaavi do modtudau miampai sambayang montok koponoimaan do Krismas om nogi koikatan di Tuhan Jesus do kumoinduvo sabagi do Raja do Poimbantug.
Poingiho tokou nogi do toun diti nopo nga toun pinoobi montok di Sangti Joseph. Iti no pogi poguhu ii do opupusan Misa toi sambayang Liturgi Boos, sumambayang tokou sambayang sinupu di Pope Francis kumaa di St. Joseph. Otumbazaan zou do ogumu nogi tobpinai i mogovit sambayang diti doid paganakan sondii. Oniibo o sambayang diti nga maza do onu i pinosuat kanou tokou do momiumon do aahom kozo kopomolotian om kahansanan di Pope Francis kumaa di Gugumompi di Mononobus guno dotokou timpu diti.
Koimpupuson no do Toun di St. Joseph ontok 8.12.2021. Iho no do kanou po sumivat mokituhung di Sangti Joseph, i songuhun sangti tabantug kozo do poingkuo do modtudau magandad, sumambayang om tomoimo poinsodia doid timpu do Advent diti. Kivaa pipio piniot do ginavo (virtues) di Sangti Joseph ii kosudong pomuandaman tokou do tahom-ahom. Koovit dotokou ngaavi iti do manampasi kozo diti timpu do Advent mongoi oukab nodii daa kozo ii daasom ginavo tokou do monoimo do kohodion di Jesus ontok Krismas diti dumonto.
Piniot ginavo ngaavi di St. Joseph nopo nga:
- Kinodoit (Silence);
- Sambayang;
- Siniou (Courage);
- Momogonop om Mongumohig (Provide and Protect); om
- sabaagi sunsuzon kumaa di Hahangai Tobitua Mary om Tuhan Jesus.
Maza do sambayang di Tobitua Joseph, oukab no daa ginavo ngaavi dotokou do monoimo di balakat tosima mantad Kinoingan ontok timpu Kapagandadan diti om ontok tadau Krismas!
Eligius Samuel
