RENUNGAN MINGGUAN – 13 March 2022
RENUNGAN MINGGU KEDUA PRAPASKA TOUN C
“Jika iman itu tidak disertai perbuatan, maka iman itu pada hakikatnya adalah mati”. ( Yak. 2 : 17 )
Nung mangakun tokou do otumbazaan tokou do kivaa Kinoingan, nga aiso i do koimaan tokou montok do kotumbazaan tokou, aiso do lati. Kotumbazaan nopo di pointopot nga mositi mitanud do koimaan. Mooi do okito doid koposizon tokou i kotumbazaan tokou pointopot om ogiot poinhongkod kozo doid koulalaho pogigizon tokou, mositi no do mingisom do popoundahiu tokou sondii.
Kosudong kozo doid timpu do kopogkadasan diti, do mokipahud di spiritu do Kinoingan do mongumbasi kozo diti kopoposizon di nazamutan do douso. I Kinoingan tokou tomoimo poinsodia do mangampun do songkuo noopo o kinahsaan tokou. Tu i Kinoingan tokou nopo nga nopo do kobinsianan om koginavaan.
I Abraham i sinuu do Kinoingan do pakaazan doid tana i nopihi Dau. Minimozo i Abraham sundung potuu do au i isido nokoiho do id noombo om okukuo o tampat. Nga sabap no do ginazo do kotumbazaan disido doid Kinoingan do minimozo isido. Notumbazaan isido, om pinahud do Kinoingan isido doid pamanaan dau kuminaa doid tampat di pinadandi do Kinoingan. Minonoodo o Kinoingan do pidondian miampai di Abraham. Tinuhuk ngaavi di Abraham iho. Om maza do kinopodsuan tokou, duminandi tokou doid Kinoingan do otumbazaan tokou do Kinoingan. Minangakun tokou do zadaan tokou o logon om kalaja ngaavi dau. Iti no I piondom-ondom tokou doid timpu diti kopogkadasan do monginvagu diho dandi tokou, om nung nahandai tokou doid koposizon tokou, maai tokou i pokiampunai do Kinoingan miampai do tumongob kozo kinomungkangan tokou om mooi pangakun.
Id Abal Tavasi id nombo do pinopokito i Jesus do kobontugan Dau doid dii tohu mokikiia dau. Suminihiu I Jesus do noikot pinuak di pomooson Disido.Nokoimbuhai I Moses om I Elijah om noongou dioho ohou do: Iti no I Tanak do koginavaan Ku. Nokokito izioho do kobontugan do Kinoingan doid di Kristus Jesus. Kinosasian dioho do kosunduvan di Jesus, nokogiot vagu o kotumbazaan dioho. Tobpinai kou ngaavi, pinga-ingat tokou do songian kounsoop toluai o kotumbazaan tokou tu doiho nodii mai i kotuvangan do magahung tokou.
Ingaton tokou no kozo do obohou do kololoizan om kogingahan do pomogunan, iti no mai o popohidau om popohuom do kotumbazaan tokou. Soovon tokou do kotumbazaan no papatalang mato tokou do kokito dii oonu i au okito do mato toomod , okito miampai mato do kotumbazaan. Notuhuk di Jesus i misi Dau do koponomposian do tuhun ngaavi. Natakad Disido i Nuhu do Calvary. Noivang o vavazaan do surga om nokotonduhi Dau i sunsuson kumaa id surga, nokopiiso vagu o tuhun om Kinoingan.
Id timpu do kopogkadasan kanou no sumambayang om mogkuasa om monohuod miampai mokisokodung di Spiritu Tobitua do kaanu di daa tokou humavan do kapapahad id ginavo, kosompipian, kohohodong om koohon doid noponu do koginavaan, kobisianan om kohudukan.
Kat. Linus Tokuzip
13 March 2022
