RENUNGAN MINGGUAN – 8 May 2022

MINGGU KAAPAT PASKA TOUN  C

Koimaan ngavi’ di Apostle ngaavi’ 13:14, 43-52; Kopointahangan 7:9, 14-17;  John 10:27-30

Okito dotokou minggu baino do Kapagahapan di Jesus, Gugumompi Kambing Biri biri Tavasi’ do tumanud Disido’ sundung potuu do apaad, akasal o tindahanon dotokou, mokinongou doid di ohou Disido, popotongkop di ninavau Disido’ doid suvai’ om momuu’an do saviavi’ kumaa doid iso panpon.

“Kotutun Zou dioho’ om tumanud Dogo izioho”. Nohoou tokou do kumalaja doid Panambazangan, hobi no doid koponompuanan dotokou. Minggisom tokou di poogi do papapanau kalaja diti ii pinaatag doid dotokou miampai noponu koginavaan.

Ii Jesus Gugumompi Kambing biri biri Tavasi om zotokou ii kambing biri biri ngaavi’ tamangan om gompizon Dau’.  Otopot do tomoimo tokou kotoguvang do kobohingan om opiatu-atu doid ponginaman ngaavi’; Pokionuon tokou ngaavi di Jesus mokinongou do ohou Dau’ om sumimba do kapamahaavan Dau’ do au’ tokou nodii kaansau’. Tuminaak ii Kristus sabaagi upa do songuhun ‘Gugumompi Kambing biri biri’. Kotutun Isido do toiso-iso dotokou maza do ngaan om manaak Isido do koposizon selajul. Au’ i’ papakavasa Isido dotokou do atagak sabap poinsanganu tokou Disido’ – tanak kambing biri biri ngaavi’ Dau’.

Tumanud di Kristus nopo nga’ mokinongou do ohou Dau’ om sumimba kapamahaavan Dau’. Havanon tokou do Pambasaan koiso do dumadi do gugumompi kambing biri biri – mogovit di ninavau koponomposizan di Kristus doid di kuasaon do kotuvangan om otopot koduumak tokou ngaavi’ do ponginaman ngaavi’ nga’ insan tadau ka do Buuk Kointahangan, ‘Iti no ii tuhun ngaavi’ ii nokohimpantai dii kopogundasaan tagazo, om sabap no do nokopuak vagu’ o kuihib ngaavi’ dioho’ do pinupuan dioho’ doid zaa dii Tanak-kambing-biri biri – kumaa doid hokos ngaavi’ do vaig poimpasi’.

Miaga id timpu di Paul om Barnabas doid kopongia’an dioho id Antioch id Pisidia, pinoimamang om pakahasaon do tuhun Johudi ngaavi’ izioho miampai boos do kapapahad. Au’ izioho kaanu monoimo do nunu ii paabalon di Paul om Barnabas. Miaga tokou dati di tuhun ngaavi’ Johudi, kikotumbazaan nga’ asabi do aatu toi’ mogidu mantad katapatan do Abal Tavasi, au’ tokou obinsambayang, aahung do kotumbazaan suvai’, au’ abalani do dumadi buu’an toi’ mononompuan do Eklizia. Zotokou nga’ kapil ngaavi’ haid nga’ do baino nakaabal no ii Abal Tavasi di Tuhan Kinoingan maza kinopodsuan, id kokuasaan di Spiritu Tobitua, abalani om kikatabazan do popotihombus di kalaja do dumadi gugumompi ngaavi’ miampai koposizon do noimvaguvan.

Ii Jesus, Tanak do Kinoingan, Gugumompi Tavsi, pinapataak do koposizon Dau’ sondii montok dotokou. Kanou no id sambayang mogisoosokodung, mokinsian, mokinongou di ohou Dau’, mimozo dii ponuu ngaavi’ Dau’, monongkotohuod om guminavo kozo om nogi do tumihombus papaazou om mambantug do ngaan do Tuhan Kinoingan.

Mantad dii:
Mascentius James.