MINGGU KO-OPOD OM TOHU ID TIMPU TOOMOD TOUN C
Tadau nopo di baino nga minggu ko-opod om tohu do minggu toomod toun C. Minggu baino suuon tokou do tumaak poimponu maza do koponompuuanan kumaa di Kristus. Mositi do zadaan tokou ii kololoizan do doun pomogunan ii kapagantob do tokou do monompuan di Tuhan.
Pambasaan koiso pinopoiho do tokou do poingkuo i Elisha do suminimba do pamahaavan di Tuhan. Zinadaan dau i nuununu i kivaa dau. Kinoot dau i duvo tontohuan sapi dau om pataako no di tuhun ngaavi. Tungubai no dau di tungub touvi no (farewell) ii mohoing dau om tanud no di Elijah. Savi-avi i nimaan di Elisha diti nga kapanaak do tokou do poombitanan. Pinatai disido i sapi dau om minamazada do savi-avi tu kapagantob dati disido do monompuan poimponu kumaa do Kinoingan do timpu mikot. Naaha disido i pogimbaazatan do pomogunan. Iti no i tanda do kapataakan poimponu (total commitment) disido do Kinoingan. Ingkuo zotokou dau. Di ontok podsuo tokou duminandi tokou do tumanud di Jesus au poduli sundung do osusa zadaan tokou i doun pomoguan.
Pambasaan koduvo pinopoiho do tokou i St. Paul kokomoi do kahapasan (freedom). Kahapasan nopo diti nga manaak do tokou do kosivatan do mamazada di koimaan ngaavi i kapagantob dati do tokou do monompuan poimponu di Kristus. Okonko gunoon tokou iti montok papalaat do vokon nga guminavo do vokon. Ahapon do tokou i Spiritu Tobitua do popotunud do tokou di lahan pamanaan do tokou.
Pambasaan do Gospel pinopoiho do guno do tumanud poimponu kumaa di Tuhan. Pinopoiho i Kristus di tohu tuhun i ohizab daa do tumanud di Kristus nga kivaa ngaavi do kopogong dioho. Minanaak i Jesus do boovihan do nokoigit nopo do ladu i hongon nga aiso nodii do tosonguuhun do mogkovihi do kapadan montok di kopomolintaan di Kinoingan. Komozon nopo di Kristus diti nga tumanud poimponu. Nung mogkovihi tokou nga kapanaak dati do kohigaganan doid pamanaan do tokou. Miaga di Elisha mositi do kooton tokou i kapagantob ngaavi do tokou do monompuan di Kristus miaga do kapapahad, kosumbungan, kododoot, papalaat do vokon om ogumu poi suvai.
Kanou no tumatap tumanud di Kristus miampai aavi ginavo. Amen.
Andrew Sipajan