RENUNGAN MINGGUAN – 21 Ogos 2022
MINGGU KO-DUVO NGOOPOD OM ISO MINGGU TOOMOD TOUN C
Isaiah 66:18-21; Hebrew 12:5-7, 11-13; Luke 13:22-30
Ii nuhuvan do pambasaan minggu baino, “Monimung i Tuhan do tuhun ngaavi’ doid Dau’ sondii”. Nung minggisom kozo tokou, om mimang do baino, sumuang di vavazaan tokikip do ponginaman ngaavi’ sabaagi pinghudaan do Kinoingan, kaanu tokou i’ sumuang di tizonon selajul, ii pinosodia do Kinoingan, okon noopo ko’ montok vookon nongopihi nga’ montok saviavi’.
Pinogoohungungan di Isaiah doid di minogidu doid Babylon mahik doid Jerusalem, tuhun ngaavi’ mikot doid Jerusalem, monoimo om papaazou do Kinoingan do Israel – tanda do Panambazangan songovian id nombo o Kinoingan mizon poingamung saviavi’ tuhun id tana id kotuhuno di Kristus, tanak poinkinoingan Dau’.
Kavasa do lotion dotokou id nombo do ogumu po au’ kotutun do Kinoingan om au’ monompuan Disido. Kotoboi o Kinoingan do mindad montok di sumimba do mogovit do abal koponomposizan diti doid saviavi’, “Angatan i’ dioho’ ii saviavi’ tobpinai diozu…mantad saviavi’ tinau…poingovit do pohubukon ngaavi’ doid di Tuhan”. Noonuan tokou do Kinoingan do lahan ngaavi’ poingkuo dumuapus do pomogunan noponu do koukatan om ponginaman ngaavi’, om nung tumihombus tokou do au’ mokinongou, tohikudan dati do Kinoingan o pokionuon ngaavi’ dotokou.
Popointahang nogi St. Paul ii talun-alun apaagau do apanau om ii vavazaan apaagau do pihion. Ii nopo koundasaan do avazaan do Kristian nga’ somboogizan do pinghudaan dotokou, pinataak do Kinoingan id koginavaan. Hudaon tokou maza do sinduo om kadaa-an ngaavi’, papavakas dotokou mamanau doid lahan tokikip om totuhid do maganu di tampat pamakanan di tongotuhid.
Id Abal Tavasi, ‘Pio’ i’ atampasi?’ Pinoimagon di Jesus do mimang o Kinoingan do saviavi’ umunsikou doid koposizon selajul. Om pinosoto Disido do ouhi’ om oingat tokou daa po-oo-ompus do koposizon, kumalaja om mimozo do ponuu’ ngaavi’ do Kinoingan; Ka di Jesus, ‘Aiso’ i’ koponomposizan id habus do Panambazangan’. Pason nopo do Abal Tavasi nga’ aiso’ i’ poniininion do Kinoingan mantad momiumon do koginavaan om kahapasan pataakon Disido’ – tonggungan i’ dotokou songovian do mogovit, papaabal, papabaagi di Abal Tavasi koginavaan do Kinoingan doid pototongkop pomogunan; do natampasi tokou i ngaavi’ mantad kagos do douso maza kopodsuan.
Suu-on tokou di Jesus do muot dotokou sondii – poinsodia tokou naku momihi di vavazaan do koginavaan-aiso’-sabap, guminavo do suvai miaga di Jesus do guminavo dotokou. Vagu, koponomposizan nopo nga’ tumimpuun miampai kotumbazaan, nga’ poingkuo tokou mamaamasi id kotumbazaan, miaga okito id koposizon di Abraham, Isaac, Jacob om profeta ngaavi’. Mositi nopo do pakavasaon dotokou o Kinoingan do kumalaja id koposizon dotokou maza do grasia Dau’, ii okito id koimaan dotokou; ii grasia kogiot soosongian noopo tokou id Oikaristia Tobitua, monongkibabas miampai Kinoingan om momusoou-mahik doid Boos Disido. Sumimba tokou dii do natampasi tokou mantad kagos do douso maza do kinapatazon om kinotungagan di Kristus, maza kinoizonon di Spiritu do Kinoingan, kikahansanan dii do atampasi insan tadau.
Nokosodia no do Kinoingan montok koposizon selajul, id nombo ii kohungguzan, inuzan do opupusan, manaak lahan do kaanangan, koginavaan om kounsikaan; ‘Mikot Zou do monimung dii tinau’ ngaavi’ do potitikid boos”(Isaiah). Nga’ isai’ dii kaanu sumuang? Aiso’ i’ kaanu moboos do, ’Oi Tuan, okuudi nopo naku ii atamapasi’(Gospel). Zotokou sondii o sumimba; Otopot, aiso’ i’ poniininion do Kinoingan – ‘Mikot i’ o tuhun ngaavi’ mantad kohisaon om kotonobon, mantad koibutan om kabaatan, oitom om opuak, puavang om mosikin’. Nga’ ka di Jesus, ‘okikip o vavazaan kumaa doid koposizon selajul’. Komozon, isai’ noopo ii minggisom mundoso montok katapatan, kotuhidan om koginavaan nga’ kosuang i’ doid dii;
Sabap no do okikip ii vavazaan doid koposizon selajul, kopopotigog i’ do vookon, ‘Vookon ii nokotouvi, kopoguhu i’ om vookon ii nokopoguhu, kotouvi’ i’, ka. – ii nongopihi kotouvi’, osoguluanan dioho’ ii mantad apat pisuk do tana, ka. Isai noopo momusoou do onuan kohobizanan toi’ kasagaan sabap poinsomok di Jesus, tomoimo monongkibaagi do Oikaristia, mikot sambayang tikid minggu, poingampazat nunu noopo abaabazan do Panambazangan – kohunggui dati, tu’ guhu po ii tongokuangan, tangasampit, okuang toihaan, kaampai no ii momimidouso ngaavi’ do kosuang.
Iho nodii poogi do intangan dotokou ii kopoingatan di Jesus om do kuminam kozo tokou sumuang di vavazaan tokikip, tumimpuun baabaino tu’ otutuban tokou dati di vavazaan. Iinopo tupi-laja do kobontugan nga’ montok saviavi’ ii manaan do salip gisom kopupuson. Kapagahapan nopo diti nga’ poingukab montok saviavi’ id potitikid timpu.
James Jimmy Totu
Paroki Penampang.
