RENUNGAN MINGGUAN – 28 Ogos 2022
TADAU MINGGU’ KODUVO’ NGOOPOD OM DUVO
ID TIMPU TOOMOD DO TOUN C
28/08/2022
Ecclesiasticus 3:17-20.28-29 ; Hebrew 12: 18-19.22-24; Luke 14 : 7-14
Minggu nopo di baino nga’ tadau minggu koopod om duvo id timpu toomod do toun C om tuhu nopo do pambasaan do baino nga’ “ I Jesus, ii popipi-tunud di pidondian kavavagu”
Id pambasaan ngaavi’ dibaino popoiho dotokou hobi kokomoi do kohudukan. Kohudukan nopo nga’ poinhoohobi mantad do kotumbazaan, kahansanan om koginavaan sabap mositi kivaa po do kohudukan om vagu nogi do koimbuhai o kotumbazaan, kahansanan om koginavaan. Nung aiso nopo do kohudukan, poingkuo tokou nodii do otumbazaan om guminavo do Kinoingan? Kohudukan no i tagazo no kozo om kosumbungan no i douso tagazo. Naatu id douso do kosumbungan zo Adam di Eva saasabap no do kosumbungan dioho. Kosumbungan no i puun do douso’ ngaavi’. Koiho i logon do aatu nopo zo Adam di Eva id douso do kosumbungan nga’ koimbuhai no i douso do suvai.
Id pambasaan di Abal Tavasi dibaino, popoiho dotokou kokomoi do kohudukan om kosumbungan. Id pambasaan diti, I Jesus nopo nga’ i sabaagi do songuhun tahap id iso’ pangaangakan. Ontok diho, kivaa nogi do tuhun ngaav’ do Farisi om i tuhun tangabaa id adat do naahap. Nga’ i tuhun ngaavi’ do Farisi om i tuhun ngaavi’ do kigaagaa’, minomuondom do kigaagaa’ izioho om minomihi di tampat di koiso no kozo di meja di pinotounda’. Minomuondom izioho do poinhoohobi o vinasi’ dioho mantad di moninimung do sukai om di momimidouso ngaavi’. Minomusoou izioho do ii nopo koponomposizan nga’ mikot mantad di kotonudan dioho di kootulan ngaavi’ om mantad di kalaja ngaavi dioho di tangavasi’. Nga’ koponomposizan nopo nga’ okonko mikot mantad dotokou. Koponomposizan nopo nga’ mikot mantad koginavaan, graasia,kosianan om balakat do Kinoingan ii nokointahang doid dotokou maza’ di Jesus Kristus. Iho no o sabap do minoboos i Sangti Paul do atampasi tokou okonko mantad do kalaja dotokou di tangavasi nga’ mantad di kotumbazaan dotokou.
Id pambasaan nogi diti, popoiho dotokou do “ Iisai nopo i mongkigaagazo nga’ kohuduk mai, om iisai nopo i humuduk nga poinsavaton mai’ do Kinoingan. Komozon iisai nopo i papaapagazo dau sondii nga’ poinsiboon mai om iisai nopo i ohuduk, ii mangakun di hasa’ ngaavi dau om momoguno do Kinoingan nga’ poinsavaton mai do kinoingan. Miaga di tuhun do Farisi di tosumbung ii minomuondom do avaavasi om obitua’ izioho nga’ au’ natampasi sabap akakat o kogiiginovoo om koulaalaho’. Nga’ ii moninimung do sukai, sundung potuu do momimidouso nga’ natampasi tu ohuduk izioho. Om id pambasaan do Abal Tavasi nogi diti, pinopoiho i Jesus do nung kivaa nopo pangaangakan diozu nga’ ahapon no i tangasampit, ii nongokimpo’,ii nangatadoi, ii nongobohou mooi do ontok nopo do au’ izioho kohusi dotokou nga’ kivaa i’do kopomohusian dotokou do touvi tadau mantad do Kinoingan. Nga’ nunu ii aantakan do baino nga’ kopihavan diti ponuuan di Jesus.Id pambasaan diti, poposoou dotokou do ingkuo tokou kumaa doid dovokon, somoonu mai’ do au’ tokou popoopoguno doid dioho diti toi’ momuondom tokou do okuukuang izioho diti do mantad dotokou, toi momuondom tokou nogi mai’ do poinhoohobi zotokou do dau doid dumbangan do Kinoingan saasabap no di kalaja dotokou ngaavi di tangavasi’. Nga’ id pomolintaan nopo do Kinoingan nga’ aiso i’ do piahatan toi’ pisuvazan kumaa doid tiso om tiso.
Id pambasaan koiso’ popoiho nogi kokomoi do kohudukan om do minggaagazo’. Id boogizan koiso popoiho kokomoi do kohudukan om id boogizan koduvo popoiho kokomoi do minggaagazo’. Popoiho dotokou iti do ii nopo i mimang di kalaja dau do tavaavasi’ om ohinuud nga’ ginovoon do hobi’ po do mantad di mananaak tosima’. Ii nopo tagazo no kozo nga’ hobi tokou do ohuduk nga’ hobi i Kinoingan do aanangan om mambalakat dotokou.
Id boogizan koduvo diti pambasaan, popoiho dotokou do ii nopo toluo’ di tuhun minggaagazo nga’ aiso do usap tu nakagamut i kalaatan doid disido. Komozon, au’ mai’ atampasi i tuhun di minggaagazo tu’ osusa i kalaatan do kohinsad mantad dioho tu nohikupan do kosumbungan i ginavo dioho. Om kokomoi diti minggaagazo diti, iti nga’ aantakan nogi doid dotokou, id pamaamasi tokou do tikid tadau id paganakan om nogi id tinimungan dotokou. Okito dotokou do ontok nopo do kivaa’ di tootobpinai dotokou toi kiikinoluangan dotokou di minggaagazo om doiho no mai i koulaalaho dau do au’ mokinongou di boos ngaavi’ di tobpinaai toi di kinoluangan dau do suvai, momundom nopo do isido no i pointunud. Om tuhun nopo mai’ di minggaagazo’ nga’ osusa do papaampun tu’ doiho i kosumbungan id ginavo dau gisom no do kivaa mai’ do monongkiboos podii do tobpinaai nga’ osusa. Id tinimungan nga’ aantakan nogi do kivaa do minggaagazo diti, okuang o kohudukan. Ii ahal ngaavi’ di miho uhanon do tavaavasi’ nga adadi do oukot tu vookon dotokou diti nakagasan do douso do kosumbungan om mongkigaagazo’. Nga’ do touvi nopo dii mai’ nga’ kopogovit ii do koikuman sondii saasabap no di kosumbungan. Om iti somoonu do aantakan ngaavi id pamaamasi dotokou do tikid tadau.
Id hozou kosimbaan nga’ minaganu do tuhu pambasaan mantad di pambasaan koiso om di Abal Tavasi’. I hozou kosimbaan nga isoo-i do popoiho’ kokomoi do kohudukan om minanaak do kahansanan om koumohigan kumaa di tongomosikin id nomboo do humozou tokou do “ Id kavasian Nu, Oi Kinoingan, pinotounda’ Nu o izonon montok di mosikin” ka. Komozon nopo i mosikin do doiti diti nga’ okonko mosikin noopo id konunu’ ngaavi’, okon nogi komozon do i momimidouso, nga’ ii tongohuduk i totootopot poinhansan doid Kinoingan do aiso piduvaan ginavo. Id hozou kosimbaan nogi minoboos do “ Pinotuntug Nu o asam tasapou Oi Kinoingan, om ontok do hinouson i tuhun Nu ngaavi’, noonuan Nu izioho do koposizon kavavagu. Noovit Nu izioho kuminaa id tana’ di nadandi’ id nomboo do ii nopo tuhun di mininggaagazo nga’ notimpoon id kotogisan”. Songkuo nodii vinasi’, ouhi’ om aadang o Kinoingan kumaa doid dotokou tu koiho Isido do mintong do iisai i totootopot do ohuduk om iisaai i minggaagazo’
Nga’ id pambasaan koduvo’, au’ minongomoi do kohudukan, popoiho dotokou ii kokomoi di pidondian haid om di pidondian kavavagu. Id pidondian haid nopo nga’ pinataak do Kinoingan miampai di tanda-tanda di kikoosizan, i kopoingatan di koundoonok maza’ do tapui om kohubukan. Minimbuhai i Kinoingan id kokiikitanai do osusa’ do agampot om poinhosok i Kobituahan Dau. Nga’ id pidondian kavavagu, noonuan tokou do Kinoingan di avaavaasi’ po, ii ouhan-uhan do mamagampot. Id pidondian kavavagu diti, hinoou tokou umampot do umunsikou, sumoomo’ di nibuvan tasab. Om i Jesus Krisus i tanak tontoisoon nadadi’ sabaagi’ do i popisamo’ di pidondian kavavagu miampai dotokou, pinopotuntug di zaa’ Dau sabaagi’ do ponobus di douso’ ngaavi’ dotokou. I kinapatazon di Jesus Kristus doid salip nadadi ii sabaagi do i koponobusan do douso dotokou do insan no. Nadadi’ nogi i kinapatazon di Kristus sabaagi do i kopiunungan dotokou miampai do Kinoingan.
Id pangaan koduvo id Abal Tavasi, popoiho dotokou do i Jesus Kristus i buu’an poinbida’ id sambayang piihangan dotokou diti do baino om zotokou no tahap id piihangan do pamakanan diti. Ahapon tokou di Kristus, ii tongomosikin, ii nongokimpo, ii nongobohou om ii tongosusa id piihangan diti. Onuan tokou Disido di tinan Dau do takanon om di zaa’ Dau do tinumon. Onuan tokou mai Disido do Spiritu Tobitua om poinsavaton tokou mai’ Disido om potungagon om poinsoduon tokou Disido mantad komosikinan do kosunduvan om poinsoduon tokou nogi mantad do kosumbungan ginavo’. Amen
Albert Mining
Paroki Penampang
