RENUNGAN MINGGUAN – 23 Oktober 2022
MINGGU KO-3O MINGGU TOOMOD TOUN C
Di minggu nakatahib sinuu tokou di Jesus do sumambayang do au oputu-putu. Sumambayang tokou miampai au komungkang o ginavo. Minggu baino poihoon tokou di Jesus do guno om poingkuo do sumambayang.
Pambasaan koiso nopo nga popoiho do tokou do i Tuhan no ii mombibisala totuhid. Mokinongou om simbaon i Disido o sambayang mantad savi-avi. Sambayang do tuhun puavang toi mosikin. Aiso do poninion Disido nga hohobi no mantad sambayang di nosinduahan, i tasampit om tuhun ngaavi di tohuduk.
Pambasaan do Gospel nopo di baino nga iso boovihan di Jesus kokomoi do tuhun di mongkigaagazo dau sondii om poponini toi mogohimut do vokon. Duvo tuhun minooi sambayang doid Panambazangan. Songuhun tuhun do Pharisee om songuhun i moninimung do sukai. Itia nopo tuhun Pharisee nga oubas do popoopokito do vokon. Itia nopo moninimung sukai nga tuhun di kahaahadangan do tuhun tu moninipu. Sambayang nopo di tuhun Pharisee nga tuminimpuun miampai minonongkotohuod do Kinoingan tu okonko miaga
isido do tuhun suvai i odoot (greedy), au mimozo (dishonest), au magampahu miaga di moninimung sukai i poindoos disido. Izou nopo ka disido nga tomoimo do ouhi (faithful), mogkuasa do induvo sominggu. Ii nopo moninimung sukai nga suminambayang miampai minokiinsian do Kinoingan. Izou nopo ka disido nga tuhun do momimidouso. Kosianai po dogo. Minoboos i Jesus do sambayang nopo di moninimung sukai nga notoimo om i douso dau naampun tu pointunud i lahan dau do minokiinsian. Sambayang nopo di Pharisee nga au notoimo tu osumbung om mongkigaagazo isido sondii.
Nung oviton tokou iti doid kopooposizon do tokou nga kapanaak do pomuandaman. Kogumuan do tokou do miaga di tuhun Pharisee.
Mongkigaagazo sondii, onu i nimangan ngaavi dau om poponini do vokon. Mimang tokou do ointutunan do vokon. Apatut do osianan miampai monuhung tokou di omungkang doid kotumbazaan. Miaga potoi do oviton tokou izioho doid sambayang do tokou.
I St. Paul minoboos do, “Nokoponongkiimang zou no dii piimangan tavasi gisom doid kinopupuson; natangkus kuno ii ponongkusan gisom doid kinopogovian; natanud kuno i kotumbazaan; ii nopo mikot do baino nga ii po siga laja do kotuhidan ii pataakon di Tuhan.
Tobpinai kou ngaavi, kopogovit nodaa o boos di Sangti Paul diti do mimozo om tumanud di ponuu do Kinoingan. Kanou no humaad kumaa di Kinoingan do, “Oi Tuhan kosianai no dogo i momimidouso.” AMEN.
Andrew Sipajan
