MINGGU KO-34 ‘II TUHAN DOTOKOU JESUS KRISTUS LAJA DO SOMVINOUN’
Tobpinai kou ngaavi, iti no minggu touvi no do timpu toomod toun C, ii minggu ko-34. Om minggu tiiso nopo nodii nga tumimpuun o Minggu Koiso do Kapagandadan toi ko Minggu Koiso do Adven. Tadau diti mamalamai o Eklizia do, ‘Ii Tuhan dotokou, Jesus Kristus, Laja do Somvinoun.’ Om totootopot no do i Kristus no ii Laja do saviavi laja om Tuhan do saviavi tuhan.
Noongou tokou id abal tavasi do poingkuo ii buu’an ngaavi do Johudi om ii susumangod ngaavi id dumbangan dii salip do mintong di Jesus om minanaasangi/minagaagasab Disido. Om totootopot nopo kozo daa nga Laja dioho Isido. Nga ponokodou dioho o ginavo do mada monoimo di pinamahaavan do Kinoingan doid dioho do maagi do koposizon selajul id surga.
Tobpinai kou ngaavi, vookon tuhun do baino momusoou do saviavi konunu ngaavi nga opupusan id pomogunan diti, komozon dioho do aiso koposizon opongo po id pomogunan diti. Iti no o iso kahasaan tagazo, tu ii nopo pomolintaan di Kristus nga opongo po koposizon id pomogunan diti. Om ii nopo pomolintaan Disido nga sohiihinaid aiso kopupuson.
Nokoiho tokou ngaavi do onu nopo i nimaan di Jesus nga osodu pisuvazan mantad di lahan pomolintaan do pomogunan diti. Pinopokito i Jesus do kohudukan, kobinsianan om koginavaan. Songkuo po panaasangi om kopoimamangan di Johudi om susumangod ngaavi doid Disido, nga kaanu po vagu isido do popohiong dioho: ‘Oi Ama, pohiongo no izioho, tu au izioho nokoiho do nunu o maan dioho,’ ka. Om noongou tokou nogi id Abal-tavasi di baino, do ii po songuhun kihasa poingini miampai Disido ii minoboos do, ‘ondomon zou no do songian koikot Ko do id pomolintaan Nu,’ ka nga dinondian di Jesus do: ‘Totootopot no, dondian Ku iziau, tadau baino miampai ko i’ Dogo’ do id paradise,’ ka.
Iti no kokitanan do songkuo ginazo koginavaan, kobinsianan om kopohiongan do Kinoingan doid dotokou? Ii Kristus, Laja do Somvinoun no ii poombitanan do laja-laja ngaavi, mononoodo do undangan-undang, om buu’an ngaavi id pomogunan diti. Isido no songuhun Laja ii mongobpinai dotokou. Isido no ii napatai om nokotungag vagu. Om montok Disido, aiso upisol do uoton do mokianu kasagaan do sumoomo Disido, aiso protocol, tuutulus do mikot doid Disido do soosongian noopo, do au mongila timpu om tadau.
Tobpinai kou ngaavi, kivaa po naku suvai pihi dotokou? Kanou no mikot doid Tuhan Jesus ii tomoimo poingandad dotokou om dodizo tokou no Isido do laja id koposizon dotokou. Kanou no mamaamasi tumanud di ponuu om kaandak di Tuhan, mooi do kapadan tokou di izonon nokotounda montok dotokou, ii surga togingo.
Aazou om abantug no selajul i Kinoingan. Kat. Lewis Juit