RENUNGAN MINGGUAN – 27 November 2022
TADAU MINGGU’ KOISO’ DO KAPAGANDADAN TOUN A
Isaiah 2: 1-5 Rome 13: 11-14 Mathew 24: 37-44
Baino’ sumuang tokou no’ di Minggu Koiso do Kapagandadan toi Advent. Ii koponimpuunan do Eklizia’ do Ponounan Kavavagu’ Toun A’ mogovit id koposodiaan do koikatan di Kristus Jesus id tadau Krismas om id timpu touvi no.
Ahapon tokou do momusoou om momiumon dii navazaan ngaavi’ dotokou om ii kovosian ngaavi’ ii nokointahang maza’ do kinosusuvon di Kristus Jesus id pomogunan. Ii kinoikatan di Jesus’ dii hobi 2000 toun no’ om noundoso kozo, napatai om tuminungag mantad poimpatai’ minanaak dotokou di Spiritu Tobitua. Minogivang montok tinau tuhun’ dii lahan doid kopomosizan selajul’ mooi do kosudong nodaa tokou’ do manansanganu dii pomolintaan poinsurga.
Id timpu diti’ kanou no mosik om mingkakat do potounda tomoimo do umuhan kumaa id kobituahan, mamazada di au’ ngaavi’ kosudong om mimang dii susumadan id ginavo dotokou do abaakas’ poinguhan montok do koikatan di Tuhan.
Abal Tavasi’ mongunsub vagu dotokou o Kinoingan, “Podtudau no’ do pointounda’ kou nodii daa” montok dii timpu-timpu do au’ nu pobpiumanan’ mikot mai’ i tanak do tuhun. ‘Miaga dii ontok timpu tadau di Noah’ poguhu i’ dii hizud’ tagazo’ minangaangakan o tuhun ngaavi’, minogiiginum, minanansavo, minokisavo, gisom dii tadau do suminuang i Noah dii kapal-vaig tagazo, om aiso no do nuununu do nasangka’ dioho’ do gisom i’ do nokoikot ii Hizud om imuavo’ no izioho’ saviavi’.
Iti no’ i timpu do mogandad om do humansan. I timpu montok dotokou do mokinongou vagu’ dii dandi’ kapahapasan do Kinoingan om kopibabasan. I timpu nogi’ montok dotokou do monoimo di kopotontuan mahik dii koginavaan aiso-kataadan do Kinoingan montok toiso-iso dotokou. I timpu dotokou do osuangan miampai do kahansanan kavavagu, siniou kavavagu om timpu montok dotokou nogi’ do kopiuman om kotoimo’ do ii nopo totuvong doid timpu diti, ii po toi mantad douso, toluo, sinampit, kosusaan, komungkangan toi kaahaan, nga’ okukup i mai’ om oovit mongidu maza di ninavau do kotuhidan, I boos-nadadi-tonsi
Timpu kapagandadan nogi’ i timpu montok dotokou do sumuni id dii pagandadan tagazo toi great expectation. Miaga di Isaiah doid pambasaan koiso’ ingkuo i pinogoohungungan toi tokiikito disido kokomoi do koikatan do Messiah, om katahangan kokomoi do songuhun mikot om tonggungan toi misi Disido; om maza kososian di apostol ngaavi’ notuhuk ii pinogoohungungan toi pinokiikito om ii dandi ngaavi.
Ingkuo dati o kapagandadan montok dotokou’ do koikatan di Tuhan. Ondomon dotokou’ i kuasa do Boos’ songian pasagaon dotokou ii’ do sumuang id ginavo ngaavi’ dotokou. Miaga boos di Sangti Paul nodaa ii igitan dotokou’ poinsodia momohoogo do kalamazan diti’ ii kaandaman dii koimaan tagazo do koginavaan om kopoinsiibaan’ id-nombo ii koginavaan aiso kopupuson do Kinoingan’ do kumalaja i’ montok dotokou’ ii vinangun ngaavi’.
Pinotuun do Kinoingan’ i tanak tonsoisoon Disido’ duminadi do tuhun, i songuhun’ miaga dotokou’ mooi do adadi tokou do tanak ngaavi’ gogompizon Disido, sambaagi id di koposizon tobitua Disido.. om iti no’ ii igitan dotokou’ kaandaman tounan’ do potitikid Tadau Tagazo do Krismas’ ii tomposizon om izonon dotokou do naamot magandad di koikatan koinduvo di Tuhan manaak dii koponontuan touvi no. Amen
Pinosodia di;
Clement Jinidu
Paroki Sangti Michael Penampang
TADAU MINGGU’ KOISO DO KAPAGANDADAN TOUN A
II TADAU DI TUHAN
Ii Tuhan pinopoiho dotokou do modtudau, tu’ tadau koikatan Disido osomok no. Minggu diti sumuang tokou nodii do Liturgi kavavagu, timpu do Advent minggu’ koiso do Kapagandadan. Poposodia om sumodia tokou sondii do koikatan di Tuhan, ii songuhun tanak topodo nosusu.
Onunu o posodiaon dotokou om ingkuo tokou do sumodia?
Kumoiso, tamangan dotokou daa iti pikouvangan, pionitan miampai di Tuhan, mooi do’ iaon tokou lahan-lahan ngaavi Disido di totuhid. Dumadi Isido do mombibisala di totuhid kumaa doid dotokou. Mantad nodii diti do kanou minsomok kopizo id Disido. Zotokou mositi kivaa ginavo do koosi di’ Tuhan. Mazmur 25:12, 14. Isai’ nopo i oosizan di Tuhan, nga humuduk kumaa Disido, sunudan Disido id’ lahan ii pihi dau. Yesaya 2: 5 minoboos: “Kanou mamanau id ninavau di Tuhan”. Miaga di Noah tu minokinongou di pinonuan di Kinoingan, otumbazaan i Noah di Kinoingan, au isido huminavan di’ pinonuan di Kinoingan. Natampasi i Noah miampai di paganakan ngaavi dau mantad Hizud tagazo.
Koduvo, tamangan dotokou iti pionitan piginavaan id paganakan. Balajal tokou mantad di Sangti Joseph i songuhun mohoing kusai om nogi savo di Mary. Totootopot do pinopiiso di Mary om di Jesus. Mogigizon tokou nodaa id iso paganakan ii, id kikounsikaan, noponu do koginavaan, aiso pigogutan, aiso pihadangan kumaa id savo om sansavo, tanak om nogi mohoing.
Kotohu, tamangai iti kogiginovoo dotokou. Guminavo kumaa id paganakan, koobpinoizan om humuduk do ponuu ngaavi’ di Tuhan. Pointantu no do oponu tokou ngaavi’ di balakat Disido om i Spiritu Tobitua kumalaja miampai dotokou toinsasanan.
Nokoiho tokou ngaavi do insan tadau koikot i Tuhan Jesus do kumoinduvo. Aiso songuhun dotokou do koiho songian o timpu koikatan Disido, nga’ i Tama noh. Aiso nogi do tanda-tanda do koikatan di Tuhan Jesus, nga poinsodia tokou nodaa tomoimo.
Oi Tuhan Kinoingan id diti kotimpuunan do Timpu Kapagandadan om diti toun, monimpuun zikoi nodaa, miampai do sakadai nu, di Ponompogunan Kapagandadan za kumaa’ doid Krismas miampai do pointamong om oingat doid koikatan dii Mamamasi za do id Krismas om do id dii kohimpupuson do timpu.
Onuan tokou nodaa do katabazan, kavakasan mooi do poinsodia tokou tomoimo id koponoimaan do koikatan di Tuhan dotokou Jesus Kristus. Amen.
Nuhud om sinuat di : Tobpinai George J Maison
