RENUNGAN MINGGUAN – 25 Disember 2022

REFLECTIONS:
Minggu Koduvo Ngoopod om Apat  Minggu Toomod Toun  C
Kinohobusan(Exodus) 32:7-11, 13-14;   1 Timothy 1:12-17;   Luke 15:1-32

Kavasa do lotion dotokou o pambasaan ngaavi’ minggu baino do: Miampai o Kinoingan dii sontob monongkuavo id di totuvong, momidouso kahavan do sompituhun, momohoou dioho do tumongob om manaak dioho do kopohiongan; Miampai Isido di sontob muzud miampai di zaazadaan id tinimungan tuhun mogiigizon om dii sontob mamalamai kinahantazan dioho id soibau do tangalaat.

Naamot diti, tuhun ngaavi’ toomod, miaga dotokou nga’ atagak nogi id migisuvai-suvai lahan. Aahung id tinumon, tubat kaavuk(drugs), aiso’ kotoonongan,  katangkangaan id kalaja, momogompi piombohutan om ogumu po suusuvai’ – atagak tokou id taatanga tinimungan tuhun mogiigizon, id suang paganakan dotokou potuu.

Id nombo dii o Kinoingan?

Id tukadan do tanak tobuvak(Prodigal son), ii tapa ponoko-ganti do Kinoingan, huminabus mantad hamin om minindad do koguhian di tanak tahangas, om songian nokopiamung ii tanak miampai di paganakan, huminabus vagu do minamung miampai di tanak totuo ohodong  minoboos do, “saviavi’ ii kivaa dogo’ nga’ diau no”. Oo; Miampai o Kinoingan di sontob monongkuavo id totuvong om id kikahadangan, id dahabus Isido mogium di tanak kusai om tondu ngaavi’ tangahangas toi tongokodou ginavo’.

Ii Saul,  ‘noponu miampai kosumbungan’ minonguntazag do Kristian. Ginusa do Kinoingan isido om nonuan do kobinsianan, minamadadi disido do St. Paul, ii pinopotongkop do kotumbazaan Kristian id di tinimpuunon Panambazangan. Oo; kakaal momogusa o Kinoingan di sontob mongunguntazag Kristian, momoguno om mamadaa do suvai’, do manaak dioho do kobinsianan om kopohiongan.

Pinihi di Jesus songuhun gugumompi kambing biri biri om tondu sabaagi Kinoingan id tukadan do ‘kambing biri biri natagak’ om ‘usin piok natagak’. Ponointahang do Kinoingan o koginavaan poinhoohobi’ Dau’ doid di sontob id tisan ngaavi’ do tinimungan tuhun – zaazadaan, ongosonguhunan, poimamangon miampai boos, ‘poinhoohobi ko om kihoogo doid Dogo’, ka.

Ii tuhun ngaavi’ Israel natampasi tuminimpuun suminamba siningazanak tananak sapi id puun Nuhu Sinai. Suminindab kohohodong do Kinoingan nga’ minokinsian ii Moses om noonuan do kobinsianan, noonuan do timpu tumongob om mahik doid Disido. Doiho o Kinoingan miampai dioho ii mamabak potuu do piombohutan miampai Disido ii kaanu tumongob om gumuhi doid Disido.

Minakan ii Jesus miampai di moninimung sukai om momimidouso, di tuhun pinoidu ngaavi’ do tinimungan tuhun, pinopokito koginavaan om koponginsingonuan do Kinoingan kumaa doid dioho maza Disido.

Okito dii dotokou do atagak tokou okon noopo ko id koubasanan nga’ kobituahan, miaga kozo di kapal vaig aiso’ savu’ toiko songuhun huhumazag aiso’ kompas. Atagak tokou sabap komungkangan dotokou sondii, dati do aiso’ koponontudukan, aiso’ monongkoiho om momoduli.  Pinopokito ii Jesus do kopodulianan Dau’ doid di ‘kambing biri biri natagak’ – moninimung sukai, momimidouso om suusuvai’ po, ii zinadaan do gugumompi. Ii Jesus no ii Gugumompi kambing biri biri totopot ii au mindad di kambing biri biri natagak do gumuhi, Isido sondii o mogium dioho’.

‘Hobi po kounsiisikoo’ do id surga do montok koguhian songuhun momimidouso ii tumongob’. Kinoingan nopo dotokou nga’ Kinoingan ii mamalamai, ontok do atampasi ii tongodou ginavo, tangahangas, umunsikou ontok mimang tokou di kotunud om tangavasi om ii kokito kounsikaan id koponohuodan om kobinsianan.

Pinosodia di:
Stephen Tuyang,  Paroki St. Michael Penampang.