RENUNGAN MINGGUAN – 8 Januari 2023

II KINOINTAHANGAN DI TUHAN  A,B,C.
II KINOINTAHANGAN DI KRISTUS DOID POMOGUN
Isaiah 60:1-6;   Ephesus 3:2-3, 5-6;    Matthew 2:1-12

Mamalamai tokou do Epiphany toi ‘Kinointahangan di Tuhan doid pomogunan tadau minggu baino, ii titiu toi ninavau totopot mamabang do tuhun ngaavi di mogisuvai-suvai tinau, kotumbazan om ningkokoton, om do oponu tokou daa miampai titiu diti om kababang doid saviavi’ tuhun ii kakaal po id totuvong. Popokito dotokou iti do kahansanan om koinvaguvan id koposizon, monontuduk dotokou di lahan kavavagu tu’ kinoikatan nopo di Kristus nga’ abal tavasi do koponomposizan do tinau tuhun – minonobus do douso ngaavi’ dotokou.

Noongou dotokou id Abal Tavasi, pii-pio tuhun tangabaa mantad mogisuvai-suvai nontodonon, ii Caspar mantad India, ii Melchior mantad Persia om ii Balthazar mantad Arabia, nokoikot id Jerusalem mantad kohisaon. Vagu, noongou dotokou do kohodi nopo i Jesus do id Bethlehem id Judaea dii ontok i laja’ Herod o momolinta, om songian do mosunudan di tohu laja kokomoi kinohodion di Kristus om mikot izioho mooi samba, nountingau isido, nokosimpuhak o kohohodong dau, sabap kopongundoonok do ko-lajaan dau. Dati do ogumu nogi tuhun suvai’ pointanud di laja ngaavi’ ontok timpu dii.

Miampai gaab ginavo talaat, sinuu di Herod ii tuhun tangabaa do monoizuk kokomoi di tanak kosusu om do gumuhi vagu doid disido, nga’ maza do kuasa do Kinoingan do nosunudan izioho id nipi do kada guhi doid di Herod, om guhi no izioho doid pomogunan dioho sondii minaza do vazaan suvai’.

Dati muot zou dii dogo sondii: Pointounda om mobpiumon zou naku do koikatan di Kristus id koposizon ku?; Kivaa naku kaahanan do ginavo, pomusaavan, koimaan toi ula ku?; Kaanu zou naku tumongob montok douso ngaavi’ ku?. Dati, miaga tokou di tuhun Johudi ngaavi’, ii au’ kaanu monoimo om momoduli om au’ noimazaan di katapatan do kinointahangan di Kristus, miaga ko kaantakan toomod ii.

Montok kopomolotian toibau ku, poposoou dotokou o pambasaan ngaavi’ tadau baino do id koposizon dotokou, tomoimo daa pointounda om mongukab do ginavo montok di Tuhan Jesus, ii Mananampasi, mikot doid Disido miampai kounsikaan om pibabasan; hobi no do guminavo do Tuhan Kinoingan om sungkad-tukad.

Tohu laja tabaa diti no i poomitanan toi model do kaahanan do kotumbazaan totopot, sabap notumbazaan izioho di kovasian do Kinoingan om au’ minomusoou di doun pomogunan. Montok dotokou, tantu no kapanaak do kopomusaavan om kopongia’an ii navazaan di tohu laja tabaa. Mokianu tokou dii do katamaan do koivad nodaa mantad koimbaazatan ngaavi’ ii managak toi monokop do tombituon dotokou ngaavi’. Tombituon diti ngaavi’ no ii popotunud om mamabang do tindahanon dotokou do maso po tokou monompogunan doiti id tana.

Kinointahangan di Jesus no ii tahap tumanud diho tombituon ngaavi’ dotokou, ii lahan om ninavau totopot i minikot doid pomogunan.

Ingkaa no kozo ii pinogoohungungan di profeta Isaiah, “Ingkakat no, imang no babang oi Jerusalem, tu’ nokoikot no ii titiu nu, id savat nu no, do mimbuhai ii kobontugan di Tuhan. Mikot doid ninavau nu’ ii tinau’ ngaavi’ om laja ngaavi’ nga’ mikot doid binabang nu, ii maso no humisau’. Hoovon tokou di songuhun minintahang, ii Kristus sondii’ sabaagi do ninavau om po-pointahang dii koginavaan Dau’.

Pinointahang di St. Paul kokomoi koponomposizan. Id katapatan do titiu diti, id nombo i Kristus do mamabang dotokou okonko’ popopidan toi monompipi. Komozon do nakabaagi nodii o tuhun kapil ngaavi’ dii tungkus di isoo-i’, do somboogizan ngaavi’ izioho di iso’ i o tinan, om do ii-om-ii’ ii dandi do nakandandi doid dioho, id di Kristus Jesus, maza dii Abal Tavasi. Humansan tokou di poogi doid Tuhan Kinoingan maza do kotumbazaan togiot dotokou.

Dati, au’ tokou kaanu manaak do amas, kamazan om inggu nga’ kaanu tokou daa manaak do timpu mikot doid Kinoingan maza koponompuanan montok Panambazangan om songovian, hobi no doid di kakaal kuasaon do totuvong, sumambayang miampai dioho.

Zotokou’, ii Kristian ngaavi’ nga’ id tindahanon dotokou kumaa doid pomolintaan do Kinoingan, ‘Munsikou om tumoboi miampai momohoogo diti tutungkap kotumbazaan totopot. Koiho tokou mantad nombo tokou om nombo pakaazan dotokou om koiho tokou do kivaa i tampat, ii togingo om sohiihinaid do dimpoton. Sumambayang tokou di poogi do, “Oi Ama mokinsian zikoi Diau, potunudo no miampai di ninavau Nu, sokodungo zikoi do mintutun di Kristus id Ekaristi om monoimo Disido miampai koginavaan, tu’ Isido no i Tuhan tomoimo om sogiigisom”,  Amen.

Pinosodia di:
Mascentius James Majaing
Paroki St. Michael Penampang.