RENUNGAN MINGGUAN – 26 Februari 2023
TADAU-MINGGU’ KOISO’ DO KOPONOGITAN TOUN A
Genesis 2: 7-9, 3: 1-7 Rome 5: 12-19 Mathew 4: 1-11
Id Minggu Koiso do Timpu Koponogitan toi Timpu Lent no tokou’ do muzu tumoina do id pamanaan toi ponompogunan dotokou montok koposodia’an do Kalamazan do Paska. Om pointihombus tokou no’ do mogkodos om mogkuasa mantad po di Tadau Kotohu do Tavu’ id nombo’ ii Abal Tavasi pinopoiho dotokou, ‘Tongob no’ om kotumbazaai no dii Abal Tavasi.’
Tadau Minggu diti nogi do lamazon ii Kopomihian toi koposuatan do ngaan ngaavi’ montok di Katekumen ngaavi’ ii posuangon nodii monoimo do Sakramentum ngaavi’ Ponimpuunan Kristian do id sodop Kapagandadan do Paska.
Koponogitan toi Lent no’ i timpu do grasia montok oinsanan Kristian. Om posodiaon do Eklizia o timpu poimbida diti, mimang do mogovit dotokou ngaavi’ do id navazaan sumoomo’ miampai Kinoingan i guminavo kozo do tuhun ngaavi’ vinangun Disido. Om nokointahang o kapanaakaan sondii do Kinoingan maza di Jesus Kristus. Id diti no’ do maganu tokou do kosivatan diti’ sumuang doid pisaamaan miampai Kinoingan maza do mogkodos, mogkuasa om kapanakadazan toi monohuod. Poingampazat tokou ngaavi’ do mongimvagu mahik’ momohidang dotokou sondii miampai koimaan om kalaja tavasi ngaavi’ diho’ do naamot humansan do kahantazan mantad do pogimbaazatan ngaavi’ do pomogunan.
Tadau baino nogi’ tumihombus tokou diti pamanaan Koponogitan om Kapagkadasan dotokou do sohinaid apat-ngoopod’ tadau om sodop id kotogisan miampai di Jesus’ i Adam Koduvo, ii minagaha’ do koimbazatan om douso maza’ do kobingimazaan Disido do nakapamahantoi mahik do pomogunan doid Kinoingan.
Pambasaan koiso mogovit dotokou’ id kopiumanan toi kasaavan di kopomidousoan sondii dotokou miampai mongondom toi reflect do susuzan’ kinootuan do mohoing koiso dotokou’ i au’ minokinongou di boos do Kinoingan miampai minangakan di tuva pogoduan. Ii no taka di vuhanut tagazo’ i nokuasa do logon do minogimbaazat di Adam om Eva do kuminisus mantad katapatan om mantad Kinoingan. Nopiumanan dioho ii kinahasaan dioho’ dadi ponoduk no izioho do loun ngaavi’ fig di tinoodo dioho sondii do bidak.
Iti no’ ii komozon di Sangti Paul doid pambasaan koduvo do ‘Suminuang do pomogunan o douso maza’ do songuhun tuhun om maza’ do douso o kapatazon, om ingkaa no’ do tuminongkop o kapatazon do id oinsanan tinau’ do tuhun tu’ potitikid tuhun do nokopomidouso.’ Nga’ ii grasia doun Kinoingan nopo nga’ hobi i’ do pointantu mikot mantad kobingimazaan do songuhun tuhun, i Jesus Kristus do ogumu mai’ o adadi do ii kotunud.
Om mantad diti no’ do natampasi tokou maza di Kristus Jesus’ ii nokointahang id kinapatazon Disido doid salip minanaak do koponobusan. Ondomon dotokou do’ minimozo kozo i Jesus gisom id salip, natampasi tokou om nadadi dii do sambaagi ngaavi’ di balakat do koponomposizan.
Om Abal Tavasi popoiho dotokou dii kopogimbaazatan ngaavi’ do navazaan di Jesus id kotogisan. Nga’ hobi iti popoiho om popokito dotokou do i Jesus i’ Adam Kavavagu, pinapataak di kotumbazaan om kahansanan Disido mahik id Kinoingan.
Noongou dotokou i drama pihavanan d Jesus miampai di logon’ do namot Isido do suminambayang om minogkodos do sohinaid apat-ngoopod’ tadau om sodop’. Di kopongo Isido om hinouson di kozo do minikot i logon do mogimbaazat Disido. Nga’ maza do buuanan di Spiritu Tobitua do nahantoi di Jesus do huminavan’ ii tohu unsub’ pogimbaazatan do magahung nodaa Disido Tongkizadai no di logon Isido om imbuhai no o tasab ngaavi’ om tamangai no Isido.
Mantad do pogimbaazatan diti, posoovon tokou’ do zotokou nga’ kaanu nogi daa do kahantazan do’ humavan do pogimbaazatan ngaavi’ ii mintahang sumoibau’ do magantob dotokou doid timpu kapagkadasn diti.
Tobpinai kou ngaavi’ Timpu Kapagkadasan diti nogi’ i timpu mahik toi kumisus id Kinoingan miampai maganu kaahanan toi kosimbanon om kopongokunan dotokou di Kinoingan totopot id nombo do Isido no’ i poingkuasa do koposizon dotokou. Kanou no’ songovian maganu do kahantazan id diti misteri do Paska’ ii hobi okito om opiumanan daa’ doid kopooposizon dotokou sondii om id di koposizon ngaavi’ di sontob posoihi ngaavi’ dotokou. Amen.
Pinosodia di:
Clement Jinidu
Paroki Penampang
