RENUNGAN MINGGUAN – 28 May 2023
“ II TADAU DO PENTECOST”
1st Reading : Acts 2 : 1-11
2nd Reading : Cor 12 : 3-7. 12-13
Gospel : John 20 : 19-23
Kopivosian tobpinaai kou ngaavi’. Tadau nopo di baino nga’ mamalamai tokou minggu do Pentecost ii tadau ko-50 mantad di kinotungagan di Jesus. Iti no i tadau do kapamalamazan tokou do kinasandatan di Tusod Usod Tobitua di Tuhan kumaa doid di apostol ngaavi’ om ii kinouhitan do kinohodion di kotumbazaan dotokou.
Ii Abal Tavasi’ di baino ii naanu mantad di Sangti John popoiho’ dotokou do kotungag nopo i Jesus, minimbuhai Isido doid di mokiki’ia’ ngaavi’ Disido om poboos no doid dioho’, ” Pibabasan miampai diozu” ka. Pibabasan nopo komozon Disido do doiti diti nga’ ii tatabi’ toi tutungkap dii poinhoohobi o komozon. Pinataak Disido iti di kopongo’ i kinotungagan Disido. Iti nopo pibabasan ii pinoungkap Disido diti nga’ au’ aanu do pomogunan do manaak. Komozon nopo do pibabasan do doiti diti nga’ ii koponomposizan di Tuhan doid saviavi’ tinau do tuhun. Om ii nopo toponsol kozo nga’ di ontok do tadau do kinotungagan Disido, minoboos i Tuhan doid di mokiki’ia’ ngaavi’ Disido do, ” Miaga di Ama’ tu’ pinopougad Dogo’, ingkaa Zou nogi tu’ popougad diozu”,ka om puabaaii no Disido izioho’ om poboos no do,” Toimoo’ no i Spiritu Tobitua, diisai noopo i douso’ ngaavi’ do pohiongon diozu’, ongohiong ngaavi’ ii, om diisai noopo o douso’ do timpoonon diozu nga’ otimpoon ii”.ka. Komozon suvai nopo diti boos Disido diti nga’ minoboos ii Jesus do,” Toimoo’ no ii Spiritu Tobitua’, ugad no om paabalo’ no i Abal Tavasi di Tuhan kumaa’ doid pototongkop do pomogunan, sontob ii otumbazaan om i opodsu’ nga’ ongohiong ngaavi’ o douso’, iisai nopo i au’ otumbazaan om au’ opodsu’ nga’ au’ ohiong o douso”.ka. Zotokou i sabaagi do tuhun Kristian nokotoimo’ nogi di Spiritu Tobitua’ di ontok nopodsu’ tokou om pougadon tokou nogi di Tuhan do papaabal di Abal Tavasi Dau kumaa doid tuhun ngaavi’.
Om ii pambasaan koiso mantad do koimaan di Apostol ngaavi’, popoiho’ dotokou do ontok di Tadau do Pentecost, noponu do Spiritu Tobitua i mokiki’ia’ ngaavi’ om tuminimpuun do moboos id ” Boos ngaavi’ do suvai” om noongou di tuhun ngaavi’ mantad di mogisuusuvai o bansa’ do moboos izioho di boos dioho sondii, komozon nakaabal i Abal Tavasi kumaa’ doid saviavi’ bansa do pototongkop do pomogunan. Oponsol kozo do ihoon dotokou do nunu kozo lati’ om tuddu’ do minonuat i Sangti Lukas diti buuk do koimaan ngaavi’ di apostol ngaavi’ do minoboos do,” Moboos izioho’ id mogisuusuvai o boos ”ka. Iti nopo nga’ kokomoi di tuddu’ do panambazangan dotokou do mogunsub dotokou do papaabal di Abal Tavasi’ kumaa’ doid saviavi’ bansa’. Nga’ uoton nogi dotokou sondii do nakatama’ toi nakaabal tokou i naku i Abal Tavasi kumaa’ doid dovokon dotokou?.No’ia’ tokou naku i tanak toi’ ii tootobpinaai dotokou kokomoi diti Abal Tavasi diti? Totootopot i’ naku do nobuu’an tokou di Spiritu Tobitua’?. Nadadi’ tokou naku’ do sabaagi’ do tanak do Kinoingan di kaanangan kozo’?.
Ii pambasaan ko-duvo mantad suat koiso di Sangti Paul doid tuhun ngaavi’ do Korin nga’ pinopoiho’ nogi dotokou do popisompuu i Spiritu Tobitua doid dotokou kumaa’ do iso tinan. Id pambasaan diti popoiho do nongopodsu’ tokou saviavi’ id iso Spiritu Tobitua’ om nokopiiso’ tokou id iso tinan di Kristus: tuhun do johudi, tuhun ngaavi’ do Greek, tudipon om ii tuhun ngaavi’ mamasok nga’ aiso nodi do piahatan. Popoiho’ nogi id pambasaan diti do ogumu kavo’ do taak id tinimungan, nga’ mantad ii do isoo i Spiritu om montok ii do kavasian do tinimungan. Nga’ bion tokou id posoihi’ dotokou, id paganakan om id tinimungan potoi, ii koimaan do mongkudaadau, mongkigaagazo’ id tinimungan, au popoduli dovokon nga’ kakaal aantakan doid taatanga’ dotokou.
Om id hozou do kosimbaan, popoiho’ nogi dotokou do monginvagu i Spiritu Tobitua do okon noopo ko’ monginvagu’ do kotuutuhuno’ nga’ do monginvagu ii do saviavi’ vinangun.: ”Poikoto i Spiritu Nu, Oi Tuhan, om invoguvan no ii soibau do tana”.ka.
Tadau baino, mamalamai tokou di minggu do Pentecost, ii kinouhitan do kinohodion do kotumbazaan dotokou, mamalamai tokou di kinapatazon om kinotungagan di Tuhan, ii kinoinsavatan Disido doid Surga om di kinasandatan di Spiritu Tobitua om do mangakan tokou di tinan om monginum di zaa’ Disido, manaak dotokou Isido di Spiritu Tobitua om poompunon Disido i douso’ dotokou om do popisompuu dotokou id iso tinan om monuu dotokou humabus do papaabal di Abal Tavasi’ kumaa’ doid saviavi’ tinau’ do mooi do otumbazaan nodii o tuhun ngaavi’ om ongopodsu’ om ongohiong o douso’ do mooi do saviavi’ tuhun nga’ oinvoguvan om atampasi’.
Amen.
Albert Mining
Paroki Penampang.
