RENUNGAN MINGGUAN – 16 Julai 2023

KOPOMOGIZAN 16/7/2023

TADAU MINGGU KOOPOD OM HIMO ID TIMPU’ TOOMOD TOUN A

II KRISTUS, II PAPAPASASAD HINSOU TONOMON

Pambasaan Ko-iso – Di Profeta Isaiah 55:10-11

Mazmur – Ko-64:10-14. R.LK 8:8

Pambasaan Ko-duvo – Di Sangti Paul doid dii tuhun ngaavi’ do Rome 8:18-23

Injin – Sinuat di Matthew 13:1-23

Tabi pibabasan, Tobpinai ngaavi id Kristus id pambasaan Abal Tavasi dibaino kokomoi ii Kristus ii papasasad hinsou tonomon. II nopo hinsou nga Boos do Kinoingan ii ongou tokou do potitikid minggu id panambazangan toiko ko boos do Kinoingan ii basaon tokou tikid tadau. Ii Jesus no ii kumoinsan nogi ii pinapabal di abal tavasi di Tuhan om ingkaa nogi ii tutumanud di Jesus om zotokou nogi ii pinougad di Jesus do moi papasasad di hinsou kumaa do savi-avi tuhun do kotoimo nogi daa zioho do kopomolitaan do surga.

Onu daa ii aanu tokou doid boohivan maza di boos di Jesus id Abal Tavasi diti. Ii Jesus popoiho dotokou kokomoi kapaabalan Disido sondii. Ii nopo hinsou kikomozon do Abal tavasi toiko boos di Kinoingan om ii nopo komozon do tana nga ii zotokou ii monoimo do boos di Kinoingan. Ii nopo hinsou ii naatu id diisan lahan om tanah kivatu om ugi ii kikolotian do ii boos di Kinoingan au nokopomuonsi toiko au nokopomomiuva. Ii nopo boohivan kokomoi di hinsou naatu id tana toohuub om minomiuva tasapou miaga di noboos di Jesus doid Abal Tavasi “pinapahabus do tuva’ ngaavi’ dii, vookon inggatus kogumu’, vookon inggonom ngoopod, vookon intohu ngoopod” miampai di boos Jesus diti patahang dotokou do sundung potuu kiva kobohingkaangan om au kopomiuva ii boos di Kinoingan nga au ii insan boos diti au kopomiuva nung sumontob ginavo tokou do poposuni di boos Kinoingan doid ginavo tokou om kopopokito tokou do tuva koginavaan di boos Disido.

Monoimo di Jesus miaga nogi do monoimo tokou Abal tavasi om okon ko ouhan ii do poponsi di boos Kinoingan doid ginavo dotokou sasabap no dati do kobohingkangan om ogumu koimbazatan do pomogunan om tomoimo tokou aatu id ponginaman om au di tokou kaanu popokito do kovosian kumaa do suvai, nga onu ii mangan di Jesus nga kada tokou tingkod monoimo di Abal Tavasi mantad dii Jesus. Au ii Jesus insan tumingkod do papasasad hinsou tonomon kumaa dotokou. Om ogumu kovosian om balakat ii otoimo dotokou mantad di Jesus num monoimo om mokinongou tokou Disido miaga ko koginavaan, kounsikaan, kotonongon ginavo om ogumu po suvai ii kovosian ii patakon do Kinoingan kumaa ii tuhun ii ohuduk id di Disido.

Tobpinai kou ngaavi kanou no tumihombus mogigizon id koginavaan tu ii Jesus no kaanu poponsi do koginavaan dau doid dotokou. Kanou no mokianu di Jesus do au daa opuputu do kopomuonsi no daa hinsou di nakasasad di Jesus doid dotokou. Mokianu tokou balakat pointihombus om iduon tokou ii ginavo tokou di okodou miaga do vatu om kiugi mai tokou pogozoo hinsou di pinasasad dii Jesus kumaa dotokou miampai ginavo poinponu koginavaan. Mantad kuasa di Spiritu Tobitua do Kinoingan id taatanga dotokou do manaak balakat om monuduk dotokou moi do kaanu tokou nodaa popotihombus monoimo hinsou tonomon ii pasasadon dii Jesus.  

Amen.