RENUNGAN MINGGUAN – 23 Julai 2023

POMOOGIZAN MINGGU KO-OPOD OM ONOM ID TIMPU TOOMOD TOUN A – 23/07/23

Kabaahan (Wisdom 12:13. 16-19

Psalm 85: 5-6. 9-10. 15-16 S. v.5

Rome 8:26-27

Mathew 13: 24-43

Tobpinai ngaavi’ id di Kristus, pambasaan ngaavi’ do tadau baino’ popoiho dotokou, do “Soobon i do Kinoingan o douso ngaavi’ dotokou miampai di tapui do koginavaan Disido.”. Nung intangan dotokou iho tema do Minggu diti, “I Kinoingan I Sakadai Dotokou.” Aiso no do Kinoingan suvai ko’ ii songuhun ii momohizo dotokou doid koginavaan om kopohiangan. Ozoon dotokou’ ii kabaahan Disido sabaagi do mananalasai totuhid.

Id koposizon dotokou’ somoonu akasou om atagakan do katabazan om kohomi dii mai’ o ginavo songian koduumak do mokisuvai-suvai o ahal’ ii aantakan om okito doid posoihi dotokou hobi no’ kokomoi do komuniti, kinoizonon om kotumbazaan. Mogikavo-kavo o piuvahan om ponguotan ngaavi’. Nokuo tu’ tomoimo doiho o kalaatan? Nokuo tu’ kohogos ii’ do mimang lalad om kopongumbak po vagu ?

Abal Tavasi tadau baino’ popoiho dotokou i Jesus di kopongia’an Disido do maza boovihan ngaavi’. Miaga dii toligu toi paai’ ii sumuni miampai di sakot tazou-azou toi sakot talaat doid anau’ mogovit om papalati dotokou dii kalaja ngaavi’ toodoon do Kinoingan montok di tangavasi om di tuhun ngaavi’ momidouso toi tuhun ngaavi’ di au’ monoimo do boos do Kinoingan.

Tumanud boos di Sangti Augustine, iti nopo anau nga’ pomogunan toi panambazangan. Doiti no i koposizon do tuhun tavasi’ om obitua ngaavi’ om ii tuhun ngaavi’ talaat toi momidouso nga’ doiti nogi do mamaamasi’. Ii no do pomogunan toi panambazangan no i tampat do okito o toiso- iso’ do kaanu kosivatan do sumuni, tumongob om sumimban mooi adadi do avasi toi obitua,

Iti nopo katabazan do Kinoingan nga’ aiso vohit dau. Om boos di Jesus, “Pohogoson izioho do ngoduvo do sumuni gisom do mongomot, songian oikot i timpu’ moboos zou mai doid di mongomgomot ngaavi’; poguhuonon monimung ii sakot tazou-azou om kagasan no ii do id vinangkasan ngaavi’ do maan tutudai, dadi’ timungon ii toligu toi paai doid tangkob Ku.

Tobpinai kou ngaavi’ pomolotian do boovihan diti’ ouhan om otuhid, ii kapanaak nogi dotokou do piipio paantazan kokomoi do koposizon’ ii oduumakan dotokou do tadau-tadau. “ Ada kaagab manalasai toi’ papaatu do kotontuan’ runungkan baik baik, om kopiuman do komungkangan sondii’ om suusuvai po’ i kaanu papakaus om poposiibo do tiso om tiso. Monongkotohuod tokou do Tuhan Kinoingan do minanaak dotokou do mananakadai, I Spiritu Tobitua.

Pinapahansan nogi dotokou i Sangti Paul, do mikot i’ i Spiritu do manakadai dotokou do id komungkangan ngaavi’ dotokou om do miampai dotokou’ do okon nopo ko’ momoguzu dotokou do sumambayang nga’ manampung nogi montok dotokou ngaavi’. Kanou no kumalaja tomoimo miampai di Spiritu Tobitua.

Kinoingan dotokou no’ i poimponu o katabazan om tomoimo manaak do kosivatan’ momoguno potihombus dii kobiinsianan om kopohiangan Disido. Tu’ pinougad Disido doid dotokou i Spiritu Tobitua dii tanak Dau’ do manakadai om mokiinsian montok dotokou do id komungkangan ngaavi’ dotokou. Tomoimo tokou nodaa mokinongou om kotoina di ohou Disido.

Amen (CJ)