RENUNGAN MINGGUAN – 27 Ogos 2023
MINGGU KO-21 TIMPU TOOMOD TOUN A – 27 Ogos, 2023
Pambasaan ngaavi do minggu diti popointahang do i Kinoingan no o ontodonon do kuasa ngaavi. I Kinoingan no ii minanaak do kuasa doid di buu’an ngaavi ii pinihi Dau miampai di Pope do monompuan do tuhun ngaavi id Eklizia do popobuu do koposizon do tanak ngaavi Dau.
Id pambasaan koiso, mantad di Profeta Isaiah, popiho dotokou do poingkuo i Kinoingan do abaazatan do upisol ii au ouhi om mongkudaadau. Pinahapas Dau i Shebna buu’an tosumbung mantad kalaja dau sabaagi upisol do moligai do laja, miampai minaganu mahik di kuasa ii noihaan do au kapadan montok disido, om pataako no doid di Eliakim ii tanak kusai di Hilkiah ii ohuduk om ouhi.
Id Hozou Kapaazaan, noonou tokou do minonongkotohuod ii David doid di Kinoingan tu pinopoinsavat disido mantad di tongosiibo om minanaak disido do kuasa do momolinta sabaagi do laja do tuhun ngaavi do Israel.
Id Abal Tavasi di baino, miaga ko opusou ginavo di Jesus kokomoi do isai Isido tokito do tuhun. Mogisuvai-suvai sisimba dioho songian do uoton izioho do isai kozo ii Jesus doid dioho. Iho nodii sabap do minongiho ii Jesus miampai minuot di mokiki’ia ngaavi Dau do duvo ponguot do simbaon dioho. Koiso: “Isai ii Tanak do Tuhun ka do tuhun ngaavi’ do moboos?” om ti’out koduvo: “Nga’ iziozu, isai Zou ka diozu iziozu?” Id sisimba di ponguot koiso,
suminimba ii mokiki’ia ngaavi miaga di binoos do tuhun ngaavi ii minokinongou do kaajalan di Jesus, om ii nohingasan do toluo om ii nokokito do koimazaan ngaavi do Isido nopo nga: Ii John ii
Momomodsu’, Elijah, i Jeremiah toi’ songuhun dii profeta ngaavi’.”
Om nokoiho tokou do au nasantaban ii Jesus do sisimba diti. Iho nodii sabap do minuot Isido di mokiki’ia ngaavi do isai Isido doid dioho: “Isai Zou ka diozu iziozu?” Mimang i Jesus do sisimba mantad ginavo dioho sondii om okon ko mantad toongou dioho. I Peter miampai kotumbazaan dau doid di Jesus suminimba mantad inahom do ginavo dau: “Iziau no ii Kristus,’ ka disido ‘ii Tanak di Kinoingan poimpasi,” ka.
I Sangti Paul id pambasaan koduvo, nga minoboos mantad inahom do kabaahan dau, toihaan, om kopombisalaan di kotunud,
papatahang do i Kinoingan no ii nontodonon do saviavi kuasa id tana om surga.
Saviavi iti nadadi do susuzan gisom do baino om ii ponguot di
Jesus doid di mokiki’ia ngaavi dau nga kakaal i’ do pouoton gisom baino. Zotokou nga uoton nogi do iti om iti ponguot, “Isai ii Jesus doid dotokou/dogo?” Iti no ii ponguot doid tosoosonguhun dotokou ii mositi do simbaon dotokou soo-sondii. Ii sisimba dotokou popoitahang do isai kozo i Jesus id koposizon dotokou.
Dadi isai i Jesus doid diau? Ii Peter nopo nga tuhun toomod, mogiginsada, aiso sinikulan nga nasantaban ii Jesus di sisimba dau. Kuo ka dotokou ii nokosikul, koiho monuat om mambasa, miaga i’ naku di sisimba di Peter i sisimba dotokou?
L JUIT
