RENUNGAN MINGGUAN – 22 Oktober 2023
1st Reading : Isaiah 45 : 1.4-6
2nd Reading : Thessalonians 1 : 1-5
Gospel : Matthew 22 : 15-21
MINGGU KO – 29 ID TIMPU TOOMOD DO TOUN A.
Kopivosian kumaa’ doid tobpinaai kou ngaavi’. Minggu nopo di baino’ nga’ minggu’ ko – 29 id timpu toomod do toun A, om tuhu’ nopo do pambasaan ngaavi’ di baino’ nga’, ” II TUHAN DO SUSUZAN DO TOTOPOT”.
Id pambasaan do Abal Tavasi’ dibaino’, moboos kokomoi do iisai daa’ ii apatut do sambaon dotokou om popoiho’ nogi dotokou do Kinoingan o sanganu dotokou. Saasabap nodi diho’ do apatut poguhion dotokou ii nunu i doun Kinoingan. Kinoingan nopo nga’ obitua’ om mantad nodii diho’ do zotokou nga’ mositi’ daa do obitua’ om dumadi’ do sabaagi’ do ii kohubukan poimpasi’ doid Kinoingan. Minikot ii Jesus doid soibau do tana’ do minogovit do koginavaan do Kinoingan kumaa’ doid songovian tuhun. Ii undang-undang do Kinoingan monuu’ do tuhun ngaavi’ do mogigiiginavo’ doid tiso om tiso’ . Nung kaanu tokou nopo do mimang do miaga diho’ nga’ zotokou no ii kohubukan poimpasi’ kumaa’ doid Kinoingan.
Noboos id pambasaan do Abal Tavasi’ diti do sumuupu’ nopo do mongunguasa’ toi di laja nga’ sumuupu’ di Tuhan miampai do aavi’ o ginavo’. Balazan i sukai kumaa’ di laja’ sabap ii no i apatut do maan, om pataakon no doid Kinoingan ii nunu’ ii noutang tokou doid Disido. Nunu’ o komozon do, ” Ii noutang dotokou doid Disido?”. Komozon nopo diti nga’ mositi sumuupu’ om tumaak tokou doid Disido miampai monompuan do ouhi’ doid Disido. Kinaman tokou muot dotokou sondii, nabalazan tokou naku’ i sukai dotokou miampai do ouhi’. Nokoponokodung tokou naku’ di tootobpinaai dotokou do ontok osusa’ om di ontok momoguno’ daa izioho’ do sakadai dotokou?. Nakapanaak tokou naku do kobontugan kumaa’ doid di Kinoingan? Nakapamaamasi’ tokou naku’ sabaagi’ do tuhun kristian miampai do koginavaan do sumuupu’ do paganakan om do tinimungan dotokou? Nakapanaak tokou naku do Kinoingan di nunu’ i noutang dotokou doid Disido?
Mambalai do sukai okonko’ mambalai noopo do sukai doid upis pambalazan do sukai. Komozon nopo diti sukai id pambasaan do Abal Tavasi’ diti nga’ manaak do kobontugan om kapaazaan doid Kinoingan miampai monokodung dovokon dotokou. Komozon nopo diti nga’ pobohikon dotokou doid Kinoingan ii kalaja ngaavi’ tangavasi’ tumanud do kaandak do Kinoingan doid dotokou sabaagi’ do tanak do Kinoingan.
Komozon nopo do ii tuhun ngaavi’ do Pharisee id pambasaan do Abal Tavasi’ diti nga’ ii no i logon ngaavi’. Tomoimo’ izioho’ diti do mogium kosivatan do papaahau dotokou do mantad di lahan totopot. Miaga’ no kozo di Jesus tu’ kininaman Isido di Pharisee om di Herodes do minuot do kavasa’ naku mambalai sukai kumaa’ doid di Ceasar. Nga’ nokoiho’ i Jesus di taka’ ngaavi’ dioho’ diti do monungkasip Disido. Zotokou nga’ aantakan nogi do okinaman do logon ngaavi’ om aahung tokou mai’ di ponginaman om kahavan tokou do ponuu’ do Kinoingan om oukum tokou do pataamon doid tapui do naraka. Nga’ nung avakas o kotumbazaan dotokou om apantod do humavan di ponginaman ngaavi’ nga’ pointantu’ no do poinsavaton tokou do Kinoingan om au’ tokou i’ oguuguzu’ po di ponginaman ngaavi’ do logon doid dotokou.
Id pambasaan Abal Tavasi’ diti’ popoondom do toiso’ iso’ dotokou do apatut tokou do tomoimo’ manaak do timpu doid Disido miampai do tumindapou id misa minggu, manaak Disido do kapaazaan om mimang di tonggungan dotokou sabaagi’ do tuhun do kristian. Id nunu’ noopo o maan dotokou, pataako’ tokou no ii doid Kinoingan. Mosik potoi do doungosuvab, monongkotohuod tokou do Kinoingan sabap noonuan tokou vagu’ do tadau kavavagu om di balakat tosima’ Dau doid dotokou. Miampai do mimang miaga’ diho’ di touhan kozo, nokoimang tokou no di nunu ii noutang dotokou doid Disido.
Om kosudong no kozo’ do minggu’ nogi di baino’ do koontok do ” Minggu do kapaabalan do sompomogunan”. Unsubon om hoovon tokou do Kinoingan do papaabal di Abal Tavasi’. Mositi’ no do paabalon tokou ii ponuu’ do Kinoingan sundung potuu’ do ogumu ii kaantob toi’ ponginaman nga’ tomoimo’ do ouhan tokou ngaavi’ ii nung humansan tokou no doid Disido. Id ” Minggu do Kapaabalan do sompomogunan” diti, paganu tokou no do timpu’ popointutun Disido do Isido no ii apatut do sambaon om aiso’ nodii do suvai.
Id pambasaan koiso, popoiho’ dotokou do poingaangahib o ginazo’ kuasa’ do Kinoingan do mantad di laja’ ngaavi’ id pomogunan. Ginuno’ Disido i Laja Cyrus do pinapahapas di tuhun ngaavi’ do johudi mantad do Babylon. Poinhoohobi’ o ginazo’ kuasa’ do Kinoingan. Iho no sabap do ii kosimbaan do hozou kapaazaan humozou tokou do, ” Onuai do kobontugan om kuasa’ i Tuhan”.ka. Iho’ no sabap do id stanza koiso om koduvo’ do hozou kapaazaan, popoiho’ i tuhun ngaavi’ do Israel kokomoi di kobontugan do Kinoingan kumaa’ doid saviavi’ bansa’ mooi do saviavi’ bansa’ papaazou di Kinoingan do Israel. Iho’ no o sabap do nookuo’ id stanza kotohu om kaapat id hozou kosimbaan do moboos do,” Saviavi’ bansa’ id tana’ nohoou do papaazou om sumamba’ di Kinoingan do Israel”. Ka.
Kanou nodi id sambayang dotokou di baino’ do mokiinsian do Kinoingan do kaanu’ tokou nodaa do papababai do timpu do mambalai do sukai ii noutang dotokou doid Disido do mimang ngaavi’ di kalaja’ ngaavi’ di doun panambazangan, manakadai do tootobpinaai om di tinimungan dotokou, mamaamasi’ miampai do id kotuhidan do kabalai po daa’ tokou tokuudi’ di sukai di noutang dotokou doid Disido, ii kinapatazon Dau id salip ii au’ miho’ do gatangon.
Albert M.
Paroki Penampang.
