RENUNGAN MINGGUAN – 26 November 2023

I KRISTUS, I LAJA

Iti Minggu Ko-34 timpu toomod nopo nga tanda do kopupuson do litugi toun A. Pambasaan ngaavi do minggu diti nopo nga mongomoi do pombisalaan touvi no do ontok koikatan di Kristus id kobontugan Dau. Om minggu diti mamalamai tokou do kalamazan do ‘I Kristus, I Laja’, ii pinotimpuun di Pope Pius XI di toun 1925 do mogovit di Kristus sabaagi momolinta do koposizon do tuhun ngaavi ii naahung do pamaamasi di doun pomogunan. Kalamazan diti popointahang nogi do ii nopo Kolajaan di Kristus nga montok saviavi tinau tuhun.

Id Abal Tavasi di baino, mononsunud dotokou kokomoi do pombisalaan do duvo kavo tuhun i mokinongou do boos do Kinoingan, om i tuhun au mokinongou do Boos do Kinoingan. Ii  Kristus sabaagi do momolinta om Laja do Somvinoun mombisala tumanud do  kopooposizon do tuhun, ouhi toi ko au doid di ponuu ngaavi Disido. Ontok timpu diho, pitongkizadon nodii Disido, do ii nopo tuhun mokinongou do boos do Kinoingan nga id avananan Dau, oonuan do koposizon selajul. Om ii nopo tuhun au mokinongou do boos do Kinoingan nga id agibangan Dau, pokoozon doid tapui di au miho opisok.

Iti no o kopoingatan di Jesus doid dotokou om aantakan o pombisalaan diti do ontok kopupusan do timpu/kopupuson do koposizon dotokou.

Pinosoto kozo di Jesus iti do songian nopo do mimang tokou di tavasi, komozon do noimaan tokou ngaavi ii montok Disido.

Sabap paagahon di Jesus o Dau sondii do miaga di tuhun ngaavi di ongokuangan, ii zinadaan, ii houson om tutuuvan, songkosuvazan di au otutunan, tuhun sumakit om tuhun di songintolungku.

Montok di tuhun ngaavi tangavasi kogiiginovoo, popointahang izioho do guminavo izioho di Kinoingan. Nga i nopo tuhun ngaavi ii au monongkoiho om au popoduli do tuhun ngaavi ii kivaa kobohingkaangan, nga popointahang do au izioho poduli do Kinoingan.

Om ingkaa no iti do ontok kopupuson do timpu do bisalaon tokou maza di koimaan ngaavi dotokou.

Id Pambasaan Koduvo tadau diti minoboos ii St. Paul do ii nopo kinotungagan di Jesus nga pinopotonduhi do koposizon do tuhun ngaavi ii natagak, om saviavi id di Kristus oovit doid kopomolintaan do Kinoingan ii Tama Disido. Om saviavi pomolintaan om kuasa id pomogunan diti nga ohiong/aiso nodii do polinta. Ii nopo pomolintaan do noohu nga ii di Kinoingan Tama.  Ii-iso nodii o Laja om Isido nopo

nga I Jesus Kristus. Om ii nopo layat do pomolintaan diho, nga ii tuhun ngaavi ii mamaamasi tumanud do boos do Kinoingan.

Om nung soovon kozo, id kopupuson do toun liturgy diti, iti no timpu dotokou do mintong mahik di koposizon dotokou, miaga kozo di tuhun mongingindapu, tu id kopupuson do toun nopo nga timpu dioho do mintong mahik di pongindopouan dioho, do kivaa kinobuu’o toi ko aiso.  Om montok dotokou, iti nogi ii timpu kosudong do mintong mahik di koposizon dotokou, do onu no nimaan dotokou. Nakapanakadai tokou i’ nangku dovokon miaga di binoos di Tuhan Jesus id Abal Tavasi do tadau diti. Om nung kivaa notohiban dotokou, iti no timpu tokou do popomogot do koposizon dotokou do mimang di sontob ponuu do Kinoingan, hoohobi no kozo di kalaja ngaavi do kobituahan(spiritual works of mercy).

Om ii nopo lahan do gunoon ngaavi diti nga mositi do ii nopo koposizon dotokou nga poinghongkod id di Jesus, tu Isido no ii mintatamong om mombibisala di ouhi, miaga di noboos id Pambasaan Koiso.“Izou nodii soosondii’ o mintamong dii panon Ku ngaavi’ om piintong-intong Ku saviavi’ ii…miaga do songuhun gugumompi kambing biri-biri’ do poingintong nopo dii saviavi’ panon dau,” ka.

Kanou no mikot om mokiinsian di Tuhan Jesus do monuhung dotokou do kotutun tokou no daa Disido id vokon dotokou.

Ljuit