RENUNGAN MINGGUAN – 17 Mac 2024
RENUNGAN HARI MINGGU KE-LIMA PRAPASKAH TAHUN B
1st Reading : Jeremiah 31 : 31 – 34
2nd Reading : Hebrew 5 : 7 – 9
Gospel : John 12 : 20 – 33
Kopivosian tobpinaai kou ngaavi’, nokosuang tokou no do minggu ko-himo do koponogitan om tuhu’ nopo do pambasaan ngaavi’ di baino’ nga’ ” Ii Kopohiangan Di Tuhan”. Om id pambasaan ngaavi’ dibaino’ popoiho’ dotokou do sundung potuu’ momimidouso’ tokou nga’ sabap no di koginavaan di Kinoingan do tomposizon tokou Disido’.
Miaga no kozo id pambasaan koiso’, asaasau no i Profeta Jeremiah monuu’ do tuhun ngaavi’ do Israel do tumongob sabap di hasa’ ngaavi’ dioho’ nga’ au’ dioho kininongou i boos disido. Pinoposoou vagu’ i Profeta Jeremiah di tuhun ngaavi’ do Israel do nung au’ nopo izioho’ tumongob om mokihiong di hasa’ ngaavi’ dioho’ nga’ kivaa’ mai’ o pongukuman om songodon mai’ izioho’ do bansa’ suvai. Sundung potuu’ do impiipio’ i Kinoingan do minanampasi’ dioho’ mantad do koundasaan nga’ tomoimo’ nopo izioho’ do minoninduo do ginavo’ do Kinoingan miampai mimang ngaavi’ do kalaatan. Sabap no diho’ do pinohogos di Tuhan izioho’ do okuasa’ do tuhun ngaavi’ do Babel. Nga’ sundung do ingkaa’, au’ nogi izioho’ dinuanan di Tuhan. Tomoimo’ i Tuhan do minintong di koozuvo’ do pamaamasi’ dioho’ miampai do pinapaatod do Profeta id taatanga’ dioho ii popointahang di kuasa’ di Tuhan om popoboos kokomoi do koompunan. Miaga’ nogi di Profeta Jeremiah ii pinihi’ sabaagi’ do ii popohombus di boos di Tuhan kumaa’ di bansa’ do Israel. Sabap no di koundasaan dioho’ dii do minonoodo’ dii i Kinoingan do pibatasan kavavagu’ do miampai dioho’. Minamatos i Kinoingan kumaa’ doid dioho’ do monginvagu’ dioho’. Miampai do koginavaan, ompunon, timungon om oviton do Kinoingan izioho’ mahik kumaa’ doid tana’ dioho’. Om id timpu’ do koponogitan diti’, zotokou nga’ apatut daa’ do mimozo’ om tumanud di ponuu’ ngaavi’ di Tuhan. Id timpu’ no diti’ do maganu’ tokou do timpu’ do monongkibabas do Kinoingan, mokiampun di hasa’ ngaavi’ dotokou miampai mooi pangakun di douso’ ngaavi’ dotokou mooi do kopiuman tokou dii kozo’ di kuasa’ do koompunan om di koginavaan di Kinoingan.
Di ontok do au’ natanud di bansa’ do Israel i ponuu’, minaganu’ i Kinoingan do lahan suvai do popohomi’ do ginavo’ dioho’ om di kovoovozoo’ dioho’ miampai do minoboos do, ” Id suang inahom ginavo’ dioho’ do potonomon Ku i’ ii undang-undang Ku, posuaton ii do id ginavo’ ngaavi’ dioho”,ka. Komozon nopo diti nga’ potonomon di Tuhan ii Boos Dau doid ginavo’ di tuhun ngaavi’ Dau mooi do mimozo’ di kozo’ ii tuhun ngaavi’ doid di ponuu’ Disido. Ii Boos ngaavi’ dii, totoopot kozo do kosuni’ om kagamut doid ginavo’ dioho’ do mooi do tomoimo’ izioho’ koondom di ponuu’ di Kinoingan. Kopomuonsi’ i Boos dii doid pamaamasi’ dioho’. Id boos diti’, kopongia’ dotokou iti kokomoi do kaahanan di pamaamasi’ dotokou saasabap no di katangaban dotokou om di kopohiangan di Tuhan kumaa’ doid tanak ngaavi’ Dau. Tomoimo’ i Kinoingan do momohizo’ do tuhun Dau Israel sabap oupus kozo i Kinoingan di bansa’ Dau. Au’ Isido mimang do kotihombus izioho’ do oundoso’. Miaga’ nogi di songuhun tama’ di tavasi’ do sundung potuu’ do nakalavong om obinhavan i tanak dau, nga’ tomoimo’ isido’ mongia’ kokomoi di nunu’ i tavasi’ om tomoimo’ humansan isido do koguhi’ om tumongob daa’ ii tanak dau. Sabap au’ mimang ii mohoing dii do kokito’ di tanak dau do kotihombus do oundoso’ sabap no di koulaalaho’ dau di talaat. Hobi’ podii vagu’ ginazo’ di koginavaan do Kinoingan doid tuhun ngaavi’ Dau. Ingkaa’ no do mimang kozo i Kinoingan do kaahanan di tuhun ngaavi’ Dau om monoimo’ di pibatasan kavavagu’ ii pinataak di Tuhan doid dioho’.
Id pambasaan di Abal Tavasi’, popoiho’ i Tuhan kokomoi do koozuvo’ do kapatazon Dau. Noboos nogi id pambasaan diti do,” Nung monompuan Dogo o tuhun, mositi’ tumanud isido Dogo’, id nomboo Zou noopo, i suupu’ Ku nga’ doiho’ nogi. Nung kiva isai ii monompuan Dogo’, pantangon i’ di Ama’ Ku isido”,ka. Ontok nopo do kiangkab tokou do tumanud di Tuhan, mositi’ no kozo’ daa’ do pointounda’ tokou. Pointounda’ sabaagi’ tanak do Kinoingan ii tomoimo’ do mimang di koponompuanan do id noonombo’ nopo do poingkuukuo’ potuu’ koozuvo’, momit di Kristus sabaagi’ do ii Mongingia’ om i Tuhan dotokou. Tomoimo’ Isido manaak do koginavaan om kosianan kumaa’ doid saviavi’ miampai au’ monutul do tinau’. Iti no ii pokionuon di Tuhan do zotokou nga’ kaanu’ nogi daa’ do manaak do kosianan kumaa’ do vokon dotokou. Koponompuanan totopot nopo nga’ ii koponompuanan ii aiso’ gontob. Komozon nopo diti nga’ ii pinggisaman dotokou do monompuan montok do kounalan do Kinoingan om mimang ngaavi’ di kopopounsikou Disido.
Au’ tokou kavasa’ do maganu’ haang soosondii’ sabap nobohi’ no di Tuhan iti koposizon dotokou maza’ kinapatazon Dau doid salip mooi do ii koposizon dotokou nopo diti nga’ okonko’ moomontok no dotokou nga’ montok nogi di Tuhan. Nung kiangkab nopo do momit miaga’ di Kristus nga’ pointounda’ do mamazada’ di saviavi’ kavo’ do kopomidousaan, ii kaandak do tonsi’, kaandak do mato’, kosumbungan om saviavi’ kalaatan ngaavi’ ii poingkagos dotokou om ahanan ii di kaandak di Tuhan.
Om id pambasaan koduvo’ popoiho’ dotokou kokomoi di kohudukan om di kobimazaan di Tuhan doid di Ama’ Dau. Sundung potuu’ do Tuhan Isido nga’ huminuduk Isido di ponuu’ di Ama’ Dau mooi do monuhuk di palan do koponomposizan kumaa’ do tuhun ngaavi’. Suminambayang kozo’ Isido miampai kataakan poimponu doid di Ama’ Dau ii totootopot nopo daa’ nga’ kaanu’ papahapas Disido mantad di koundasaan. Nga’ palan nopo do Kinoingan, saasabap no di koginavaan Dau doid tuhun ngaavi’ Dau do mositi’ potobuson Dau o songuhun ii Tanak tontoisoon Dau mooi do atampasi’ o tuhun ngaavi’ mantad douso’ om kaanu’ dii do kahantazan selajul mantad do kuasa’ do kopomidousaan om kotuvangan. Miaga’ dotokou tuhun toomod, koduumak tokou nogi do ponginaman ii mimang do avagat kozo’ dati’ montok dotokou do tumoguvang hoohobi’ no kozo id koozuvo’ do koposizon ii au’ atantu’ om ii maso’ id koumbakan. Somoonu sumambayang tokou om opiumanan dotokou do miaga’ kozo do au’ momohizo’ i Kinoingan di sambayang dotokou. Nga’ koiho’ o Kinoingan do monuhuk di sambayang dotokou tumanud di lahan di kaandakan Dau, miaga kozo’ di sambayang di Jesus do kaandak daa’ di Tuhan Jesus do potohibon daa’ do Kinoingan ii koundasaan doid Disido’ nga’ kivaa’ palan do Kinoingan ii nakatantu’ Disido.
Kanou nodii id timpu’ do koponogitan diti, kuminam momit di kohudukan di Jesus do tumanud di ponuu’ ngaavi’ Disido’, sumambayang om monongkibabas do Kinoingan om mokiinsian do kosianan do Kinoingan do kaanu’ tokou no daa’ do kopohiangan di douso’ tokou ngaavi’ om kabaagi’ tokou no daa’ di grasia do koponomposizan Disido maza’ di kapatazon Dau id salip.
Amen.
Albert Mining
Paroki Penampang
