RENUNGAN MINGGUAN – 28 April 2024

TADAU-MINGGU KOHIMO DO PASKA TOUN B
“I KRISTUS II GUVAS -ANGGUR TOTOPOT”
28.04.2024

Kopivosian kumaa diozu tobpinai ngaavi id Kristus.

Tadau baino sumuang tokou id minggu kohimo paska, om id nuhuvan do “I Kristus II guvas-anggur totopot”.

Id pambasaan koiso, okito tokou poingkuo ii Saul ii touvi no pinuganan do ii Paulus, do nokoundahiu kopoposizon dau songian do nokotutun di Kinoingan id tanga lahan. Sundung potu do ogumu tuhun om ii mokikia ngaavi di Jesus do ongosizan disido, nga mantad do nunu ii naantakan di Saul gisom no do nokotutun di Jesus om miampai do kopoinamaan di Barnabas di Saul om monokodung do mooi do otoimo di tuhun ngaavi ii Saul di touvi no. Mantad no dii kikounsuban tagazo di ii Saul do mongia kokomoi di Jesus, sundung potu do ogumu ii kaantob dau do id kopongian disido. Koposizon ii navazaan di Saul manaak tokou do pombitanan do kaanu daa tokou monoimo om manaak kosivatan kumaa dii tuhun do momimidouso ngaavi do gumuhi om mokiampun kumaa Kinoingan.

Id pambasaan koduvo mantad di Suat koiso di Sangti John. Minoboos do koginavaan nopo dotokou nga okonko boos ngaavi noopo toi boos no toomod nga ii totopot om opulokis mongunsub tokou do au oosizan om migit tokou ponuu ngaavi do Kinoingan om otumbazaan tokou di Tanak Disido ii Jesus Kristus. Id pambasaan diti pinoposotoh nogi kokomoi ii tuhun ngaavi ii otumbazaan di Jesus nopo nga au da aahung id douso, om popokito nodaa koimaan ii kiva do koginavaan. Iti no sabap do apatut nodaa tokou papataak saviavi koimaan dotokou tumanud koponontudukan do mantad di Spiritu Tobitua om kobinsianan di Kinoingan okon ko tumanud ginavo dotokou sondii.

Id abal tavasi nanu mantad di Sangti John, minanaak ii Jesus do tukadan kokomoi do guvas-anggur moi popokito poingkuo pamamasi dotokou miampai di Jesus, sabap ii Jesus no guvas-anggur totopot om zotokou nopo nga laan do guvas-anggur. Num pamamasi dotokou tumanud ponuuan om koimaan di Jesus tantu no do momiuva tokou. Sabaagi tuhun ii id koposizon do tikid tadau, kaanu tokou momuondom do pambasaan dibaino ii monontuduk dotokou do apatut no kozo do tumatap tokou do miiso miampai di Kristus id koposizon tokou tikid tadau. Num humansan tokou miampai aavi ginavo kumaa di Jesus tomoimo do kopomiuva tokou do asapou tuva do koginavaan, kounsikaan, katabazan, otohuod, kavasian, obinsianan om kotonongon do ginavo.

Om num kopoposizon dotokou ii au poinhansan di Kristus, tantu no do adadi tokou dati di laan ii oputu mantad di guvas-anggur, id nombo au tokou kaanu momiuva om touvi nopo dii nga adadi tokou laan di maan timungo om tutudan. Mantad no dii do kanou no tumihombus do popogiot kotumbazaan tokou kumaa di Jesus maza sambayang, boos tobitua om au kotongkizad monoimo sakramen kosombutan mooi do kotihombus tokou do momiuva om dumadi do balakat kumaa dovokon.

AMEN