RENUNGAN MINGGUAN – 11TH SUNDAY IN ORDINARY TIME YR B

RENUNGAN MINGGUAN
MINGGU KO-OPOD OM ISO ID TIMPU TOOMOD DO TOUN B

Kopivosian tobpinai kou ngaavi’.  Minggu nopo dibaino’ nga’ minggu ko-opod om iso id timpu toomod do toun B om tuhu’ nopo do pambasaan ngaavi’ di baino’ nga’, ” Ii kazu Cedar Do Lebanon”. Id pambasaan ngaavi’ diti popoiho’ dotokou do ii nopo kotumbazaan dotokou doid di Kristus nga’ apatut do gompizon om posunizon  tokou miampai do koimaan om okonko’ otumbazaan noopo.

Tobpinai kou ngaavi’, saviavi’ ii poimpasi’ nga’ apatut do sumuni’ om gumazo’. Poingkuo’ ii do sumuni’ om gumazo’ om au’ tokou i nokoiho’. Id pambasaan do Abal Tavasi’, popoiho’ i Tuhan do duvo poomitan kokomoi do kopomolintaan di Tuhan. Koiso’ nopo nga’ miaga ii di songuhun  tuhun ii pinopotanom do iso hinsou. Odop no isido om kosuvabai no om kokito no dau do nokosuni no ii hinsou. Guminazo i kazu om luminanggou. Poingkuo’ ii do naantakan, au’ i nokoiho’ i tuhun dii do poingkuo’. Koduvo’ nopo nga’ ii nopo kopomolintaan do Kinoingan nga’ miaga’ di iso hinsou sasawi’ ii iso kavo’ hinsou di tonini’ no kozo’ nga’ ontok nopo do pinasasad ii, suminuni’ ii om nadadi’ do hobi agazo’ mantad di tanom do suvai. Guminazo’ ii om minomulaan tagazo’ om nadadi’ ii do sosokoon do tombohog ngaavi’ id tavan. Poingkuo ii do suminuni om au’ tokou ngaavi’ nokoiho’ nga’ ii Kinoingan ii tomoimo’ do momogompi’ dii, tinamangan Disido mooi do ohidas om au’ akasou do toluo’ ngaavi’, gisom no do nokosumi’ ii do ohuub om guminazo’. Tobpinaai kou ngaavi’, mamaamasi’ id kotumbazaan do Kinoingan nga’ ingkaa’ nogi’. Gumazo’ om kavakas o kotumbazaan dotokou doid di Kristus nung gompizon om tainaon kozo tokou ii kosunizo’ di kotumbazaan dotokou. Au’ i’ sumuni’ o kotumbazaan dotokou doid di Kristus nung moboos tokou noopo do,”Mamaamasi’ zou miampai kikotumbaan doid di Kristus”, ka om oobu i’ doid sambayang, oobu do mampazat id misa minggu om oobu do mimang ngaavi’ di tangavasi’. Iti nopo kotumbazaan nga’ miaga nogi’ di tanom ii mositi’ do toinaon, intangan kozo om maan bajaho’ mooi do sumuni ii do ohidas om momiuva’ do asapou. Ingkaa nogi’ o kotumbazaan, mositi’ do opoi tokou monoina’ dii miampai do sambayang, opoi do mambasa’ ngaavi’ do suat do Abal Tavasi, opoi do tumindapou do misa minggu do tomoimo tokou dii koongou di Boos ngaavi’ di Tuhan om kotoimo’ tokou di tinan om zaa’ di Kristus mooi do kavakas dii kozo’ ii kotumbazaan dotokou.

Tobpinai kou ngaavi’, kopiuman tokou dati’ do kotoimo tokou nopo do Sakramentum do kopodsuan, momuondom tokou do ogonop no om au’ nodii’ mongiho’ kozo taahom ahom kokomoi dii om miaga kozo do nosontob no ginavo dotokou do nokotoimo noopo di sakramentum do kopodsuan. Nung ingkaa’ tokou nopo, om kopiuman tokou mai’ di kokuangan id pamaamasi dotokou, au’ tokou mai’ kalati’ do nunu’ kozo ii tuduvan do kotumbazaan dotokou. Tobpinai kou ngaavi’, saviavi’ nga’ sumuni’ i’ do tavasi’ nung toinaon kozo dotokou tavaavasi’ ii, tumihombus do mintamong dii miampai do sambayang do au’ kotootood. Kada’ tokou tood do mongindahom om papavakas di kotumbazaan dotokou mooi do kotihombus tokou do sumuni id kotumbazaan.

Id pambasaaan koduvo popoiho kokomoi di katabazan di Apostol Paulus do maso’ id kalaja dau id Korin. Nokotoboi om nakataan isido do tuminoguvang di koundasaan om kosusaan ngaavi’ do papaabal di kaajalan di Kristus. Nangatan disido izioho’ do popotuddu di pomuandaman dioho’ kumaa’ di Jesus om mamazada’ di ula do kosumbungan ginavo. Kavasa’ tokou do momit  di Apostol Paulus ii kotoboi om kataan do id timpu’ do osusa’ om id kobohingkaangan sabap otumbazan i Apostol Paulus  do kotoimo isido di vava’ do pomolintaan do Surga tu’ mikot i’ i Tuhan do manakadai ontok do kikobohingkaangan toi’ id kosusaan tokou. Id pambasaan diti popoiho’ do kivaa ahal i au’ tokou dati’ okito do baabaino’ diti nga’ koimbuhai ii do ontok koikatan di Jesus do kumoinduvo’, ii kopolintaan do surga. Iho nodii poogi’ do monuu’ id pambasaan diti do tumihombus tokou do mimang ngaavi’ di tangavasi’, tomoimo’ id katapatan om mamaamasi id pibabasan miampai dovokon dotokou. Mositi’ do avakas om apantod tokou doid di Kristus sundung potuu id kobohingkaangan toi’ au’ toimoon do tuhun. Kada’ tokou daa’ do kohomi’ toi otungkong o ginavo’ om momoduan di Tuhan sabap otumbazaan tokou do kotoimo tokou di vava’ do kalajaan do Surga ontok koikatan di Jesus do kumoinduvo om bisalaon tokou tumanud di koimaan tokou di tavasi’ om di talaat.

Id pambasaan koiso’, popoiho’ ii kokomoi di kuasa’ do Kinoingan. Nung poinsavaton do Kinoingan o tuhun nga’ koinsavat ii om nung poinsiboon Disido ii nga’ koinsiibo’ ii. Id pambasaan diti, nanu do Kinoingan o iso’ tubus  do mantad di iso’ kazu talanggou om potonomo’ no ii id iso’ nuhu’ di takavas no kozo’ id Israel. Mantad doiho’, nokosuni o iso tinau tuhun,  ii Jesus sondii om id kuasa’ do Kinoingan, minomulaan ii do osompug om nadadi do susuton om sokoon di tombohog ngaavi’. Zotokou nga’ kavasa’ do adadi do miaga nogi diho’ kazu’ do sabaagi’ do mononompuan om momumuu’an id paganakan toi’ id panambazangan dotokou. Kaanu tokou do kuminam do mogovit do paganakan om di tuhun ngaavi’ do hobi’ minsomok doid di Jesus mooi do au’ koinsodu mantad di Jesus om kabaagi’ dii di vava’ do kopomolintaan Disido id Surga.

Kanou no sumambayang do kaanu tokou no daa do kavakasan om katabazan do tumaan di kobohingkaangan toi’ kosusaan ngaavi’ ii otoguvang dotokou do ontok papapanau diti kalaja ii pinataak doid dotokou  do kapantod nodii daa’ kozo ii kotumbazaan dotokou om ahansan tokou do ontok koikatan di Jesus do komoinduvo, zotokou nga’ kabaagi nogi’ di kopomolintaan disido id Surga.

Amen.

Albert Mining

Paroki Penampang