RENUNGAN MINGGUAN – 21ST SUNDAY IN ORDINARY TIME YR B

RENUNGAN MINGGUAN

 25 – 8 – 2024
TADAU MINGGU’ KODUVO NGOOPOD OM ISO’
ID TIMPU’ TOOMOD TOUN B
II SONGUHUN TOBITUA DI KINOINGAN

Pambasaan Koiso’

Pambasaan mantad dii buuk di Joshua 24:1-2. 15-18

Isai kopizo i Joshua diti tobpinai ngaavi? Isido nopo diti, nointutunan nogi do Yehoshua toi Josue. Songuhun mananakadai toi assistant di Moses (id Buuk do Kinohobusan om Numbers). Ontok do kapatai ii Moses, Isido no ii suminovohi sabaagi huguan do tuhun Israel ii minogovit mantad dii tana’ do Egypt (Mesir) kuminaa doid tana’ do pidondian, tana’ Kanaan.

Minonimung om minoboos, minuot i Joshua do isai  pihi’ kohizaban do tuhun ngaavi di suku-tinau’ Israel. ‘ Nung au’ kou monompuan di Tuhan, pomihi’ no do tadau-baino do isai kohizaban diozu do monompuan, ii naku kinoingan ngaavi; ii tinompuan dii taki-aki ngaavi’diozu doihuu’ id-tahib dii Bavang (bavang Efrat), toi’ ii Kinoingan ngaavi’ dii tuhun ngaavi’ Amor ii sanganu diti tana’ izonon diozu do baabaino. Montok dogo’ om kohominan ku nopo, nga’ monompuan zikoi i’ di Tuhan.’

Suminimba ii tuhun ngaavi’, Aiso atag dagai do mamazada’ di Tuhan Kinoingan dotokou om monompuan do kinoingan ngaavi’ suvai.

Zotokou i kakaal mamaamasi id’ vinoun diti nga’ nonuan nogi do’ Kinoingan pihi’, tumanud Disido toi’ ko au. Vookon dotokou ounsikou, aanangan kumalaja id pongumaan di Tuhan. Montok kovosian om kobuu’on do Paroki om adat dotokou Kristian Katolik.  Dumadi do songuhun Kategis, Mamambasa toi lectors, monuhung papasambut @EMC, umampazat id tinimungan miaga do LOM, CFC, CCR  om ogumu po’ suvai.  Nokuo? Sasabab no do otumbazaan tokou do i Kristus no ii’ kaanu manaak dotokou do koponomposizan do koduuduvo om koposizon selajur. Kalaja tavasi dotokou diti, kotoimo tokou nodaa do tungkus, tingadan vava’ songian insan tadau do hoovon tokou di Kinoingan mahik kumaa id hamin i’ pinosodia, pinotounda, id’ Surga.

Iti nogi sabab, mikot  ngaavi’ tokou doiti id panambazangan toi’ Chapel mokinongou di boos Tobitua i Abal Tavasi di Tuhan, mangakun do kinahasaan om monoimo do tinan di Kristus (Louti i poimpasi, id Eukaristia Tobitua). Koponumad do koduuduvo dotokou.

Id Hozou Kosimbaan minggu diti, Unonomo’ om bio’ no do avasi’ i Tuhan.

Aiso no suvai ii’ ozoon om sambaon dotokou nga’ i Tuhan Jesus, tu tomoimo do avasi’ Isido. Monuhung, mokinongou om mintamong Isido tomoimo dotokou, nung kikotumbazaan tokou kumaa id Disido om au’ miduvo ginavo.

Id Pambasaan Koduvo,

Pambasaan mantad dii suat di Sangti Paul doid dii tuhun ngaavi’ do Ephesus 5: 21-32

Pogitaataak no do lahan id kobingimazaan doid di Kristus. Pambasaan diti manaak do poungkadanan, kopononsudan, kopoingatan, kapasaavan kumaa doid sinavaan om sansavo. Migiiginavo kumaa doid tiso’ om tiso’ miaga di Tuhan Jesus do gumininavo ngaavi’ dotokou. Nga’ kivaa somoonu aantakan id nomboo nokopisasavo id panambazangan, nabalakatan nokotoimo do Sakramen Pisasavaan, nga’ au kopipio hinaid pinisasavaan om miada’, mitongkizad no. Aiso piangazan id pisasavaan. Iti kopusou kopizo tu’ au’ daa aantakan miaga diti.

Suat di Mark 10: 6-9  Minoboos i Jesus, “Mantad dii tinimpuunon do kinopomongunan minonoodo i Kinoingan do kusai om tondu’. Itia no do nokuo o kusai tu’ mositi tumongkizad di ama’ om di ina’, om ii duvo dumadi do iso’ tinan. Okon nodii ko’ duvo izioho’, okon, nga’ iso’ tinan. Nunu ii piniiso’ di Kinoingan, mositi’ au’ pitongkizadon do tuhun.”

Poguhuonon dotokou i Kristus id koposizon, paganakan dotokou. Au’ momoduung kumaa doid sinavaan toi sansavo, ouhi, baakason tokou iti’ koposizon dotokou, mogipaapantang, mamantang, otohuod om ohinuud moboos kumaa doid paganakan, tanak ngaavi dotokou om nogi sungkad-tukad ngaavi’ dotokou. Otumbazaan tokou do I Kristus no ii tuhu di Eklizia om manampasi dii saviavi’ tinan.

Id Pambasaan mantad dii Abal-tavasi’ tobitua sinuat di John 6:60-69.

Pinopointahang i Tuhan Jesus do kivaa piuvahan id kopomolotian, koponoimaan, pomusaavan id piahatan tutumanud Dau om i nogi mokiki’ia’ Disido.

Kivaa nogi di minogiduan, tuminongkizad Disido om tuminood do mugad miampai Disido, tu avagat, aahom do lotion om tonudon i kaajalan ngaavi’ Disido.

Id koposizon dotokou, id pamanaan dotokou diti, au’ aantai tobpinai ngaavi, kotoguvang tokou do mogikavo-kavo ponginaman. Kivaa dii avagat do saanon, om somoonu do alatu tokou tu’ omungkang ngaavi’ tokou. Kivaa do komungkangan dotokou. Nga’ soovon dotokou, sontob di koompuvangan om ponginaman ngaavi’ diti kivaa do gontob dau, tu’ miampai i Kristus dotokou. Pataakon dotokou doid di Tuhan Kinoingan koukatan ngaavi’ diti, tu’ Isido i sanganu dotokou i kaanu monguhan ngaavi sontob di otoguvang dotokou.

Ingkuo tokou mamaamasi, kivaa piombohutan, poingiso miampai di Kristus? Kada tokou nodaa insodu toi’ mogidu mantad Disido.

Nung nokopiuman tokou do nakahavan ponuu ngaavi Dau, nakahasa, nokopomidouso kumaa doid Disido, sikapon no do’ mongoi pangakun do douso ngaavi ii noimaan dotokou. Koiho i Kinoingan do nunu pokionuon om kaandak dotokou. Vinangun ngaavi tokou miaga di upa Dau sondii, noponu do kobinsianan om koginavaan. Au’ i Kinoingan mogiduan toi au’ popoduli dotokou. Miampai Isido tomoimo dotokou. Isido no i abal do koposizon selajul, Songuhun Tobitua di Kinoingan minikot montok dotokou, pinapapak om napatai id Salip montok koponobusan do douso ngaavi dotokou.

Kanou nodii poogi monongkotuod kumaa doid Disido om di  Ama id Surga dii sontob pinataak ngaavi Dau montok dotokou, miampai tumanud, mimozo di ponuu tangavasi Dau, papapanau di kalaja Eklizia tongobitua Dau sabaagi tutumanud Disido di’ touhi, do naamot dotokou mamaamasi id vinoun diti. Abalakatan tokou no daa ngaavi di Kinoingan. Amen.

Sinuat di: Kategis George Maison