RENUNGAN MINGGUAN – 25th SUNDAY IN ORDINARY TIME YR B

RENUNGAN MINGGUAN
25^TH SUNDAY OF ORDINARY TIME YEAR B
TEMA: I KRISTUS II TANAK DO KINOINGAN

Pambasaan do tadau di baino nopo nga monuu do tokou do sumamba di Kristus i Tanak do Kinoingan ii mininsiibo mantad savat om duminadi do suupu do tuhun ngaavi. Minikot Isido do manampasi do tuhun miampai duminaa sondii, pinapapak om napatai doid salip

I pambasaan koiso pinopoiho do tokou do poingkuo i tuhun ngaavi do minongukum Disido do patazon. Tuhun nopo ngaavi diti nga ii aiso do kotumbazaan doid Kinoingan. Ka dioho, “kanou avangai do tokou i tuhun tavasi kogiiginovoo, tu popoimbuingot do tokou isido, om magantob do lahan do koposizon, momohodong do tokou sabap dii kadaandangan ngaavi do tokou di undang-undang.. Kanou ukumo do tokou isido doid kapatazon.” Om noboos maza do paambasaan do Gospel songian id pinamanaan dioho duminaapas do Galilee. Pinopoiho Isido di mokikiia ngaavi Dau do, ii nopo Tanak do Tuhun nga pataakon i doid doid hongon ngaavi do tuhun; pokoozon i Isido doid kapatazon om tohu tadau katahib tumungag i vagu Isido. Nga au nakalati izioho do nunu i noboos Disido, bagahon i dioho do migiuva-uva do toombo dioho i tindama no kozo. Minoboos i Jesus doid dioho, nung iisai noopo i mimang do dumadi do kumoiso, mositi do tonini no kozo do savi-avi om suupu do savi-avi.

Poposoou do tokou iti do mositi do ohuduk tokou doid koponompuuanan do tokou. Ada tokou pogium do kuasa, pangkat. Monuu do tokou do monompuan id kohudukan id koginavaan, hohobi no di momoguno do kotuhungan, sakadai. Monompuan tokou do vokon miampai kohudukan ginavo, tumanud tokou di poombitanan di Jesus do monompuan id kohudukan. Okonko popoopokito ka mai dii. Iti no i lahan do tokou do mizon di kotumbazaan do tokou.

Itia pambasaan ko-duvo nga kokomoi nogi do kohudukan, koinsiibaan ginavo tumanud di kaandak di Kinoingan om okonko tumanud do hizab sondii. Kivaa dati do tokou i au koponontob ginavo doiho no do humodong tokou. Nung kivaa di hizab ginavo do mokituhung nga sumambayang tokou mokiinsian do Kinoingan.

Amen.

Andrew Sipajan